ກອງປະຊຸມໃຫຍ່ຜູ້ແທນອົງຄະນະພັກເມືອງງາຄັ້ງທີ XI ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 12 ທັນວາ 2019 ນີ້


ຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງສະຫາຍ  ຄໍາແສງ ຢາງຈະກິ ກຳມະການພັກແຂວງ ເລຂາພັກເມືອງ ເຈົ້າເມືອງໆງາ. ເປັນກຽດເຂົ້າຮ່ວມມີສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ. ມີ ບັນດາສະຫາຍກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ເລຂາ-ຮອງເລຂາພັກເມືອງພາຍໃນແຂວງ, ຄະນະພັກ,ຄະນະບັນຊາກອງພົນທະຫານຮາບທີ 3, ອາດີດການນໍາຂອງເມືອງ, ພະນັກງານປະຕິວັດອາວຸໂສ ແລະ ຜູ້ແທນສົມບູນ ທີ່ມາຈາກຄະນະພັກຮາກຖານ ແລະໜ່ວຍພັກທົ່ວເມືອງເຂົ້າຮ່ວມຈຳນວນ 121  ສະຫາຍ, ຍີງ  11  ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງທັງໝົດ  1.479 ສະຫາຍ, ຍິງ 320 ສະຫາຍ.


ກອງປະຊຸມ ສະຫາຍ ສະຫາຍ  ຄໍາແສງ ຢາງຈະກິ ເລຂາພັກເມືອງ ເຈົ້າເມືອງໆງາ  ກ່າວວ່າ  ພາຍໃຕ້ການຊີ້ນຳ-ນຳພາຂອງຄະນະບໍລິຫານງານພັກເມືອງ ໃນການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ສະໄໝທີ X ຕະຫຼອດໄລຍະ 5 ປີ ຜ່ານມາ  ເຫັນວ່າມີຜົນສໍາເລັດຫຼາຍດ້ານ, ເຮັດໃຫ້ເສດຖະກິດຂອງເມືອງຂະຫຍາຍຕົວຢ່າງຕໍ່ເນື່ອງ ລວມຍອດລາຍຮັບພາຍໃນສະເລ່ຍ 7 % ຕໍ່ ປີ ລວມມູນຄ່າ 269,2 ຕຶ້ກີບ,  ສະເລ່ຍໃສ່ຫົວຄົນໄດ້ 8,03 ລ້ານກີບຕໍ່ຄົນຕໍ່ປີ  ຫຼື  ປະມານ 956,52 ໂດລາສະຫະລັດຕໍ່ຄົນຕໍ່ປີ,  ທຽບໃສ່ມະຕິກອງປະຊຸມໃຫຍ່ຄັ້ງທີ X ຂອງເມືອງປະຕິບັດໄດ້ 87 %, ສັງຄົມມີຄວາມເປັນລະບຽບຮຽບຮ້ອຍ, ມີສະຖຽນລະພາບທາງດ້ານການເມືອງໜັກແໜ້ນ, ຕາມຄຳຂວັນທີ່ວ່າ: “ ຍົກສູງຄວາມສາມາດນໍາພາຂອງອົງຄະນະພັກເມືອງ, ເພີ່ມທະວີຄວາມສາມັກຄີເປັນເອກະພາບທົ່ວປວງຊົນໃຫ້ໜັກແໜ້ນ, ຢຶດໝັ້ນແນວທາງປ່ຽນແປງ  ໃໝ່ຢ່າງຮອບດ້ານຂອງພັກ, ສ້າງ ແລະປັບປຸງວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ໜັກແໜ້ນ, ເຂັ້ມແຂງ, ພັດທະນາເມືອງງາໃຫ້ພົ້ນທຸກໂດຍພື້ນຖານ.    
ກອງປະຊຸມໃຫຍ່ຜູ້ແທນອົງຄະນະພັກເມືອງງ ຄັ້ງທີ XI ຈະໄດ້ດຳເນີນເປັນເວລາສອງວັນ ເຊິ່ງຜູ້ແທນເຂົ້າຮ່ວມແມ່ນຈະໄດ້ພ້ອມກັນຄົ້ນຄວ້າ, ປະກອບຄຳເຫັນ ແລະ ຮັບຮອງເອົາ ຮ່າງລາຍງານການເມືອງ, ແຜນພັດທະນາເສດຖະກິດສັງຄົມ 5 ປີ ຄັ້ງທີ III (2020-2024), ຜ່ານ ບົດສຳຫຼວດການນຳພາລວມ ຂອງຄະນະບໍລິຫານງານພັກເມືອງຊຸດທີ X, ຮັບຟັງການປະກອບຄຳຄິດຄຳເຫັນຈາກຕ່າງໜ້າແຕ່ລະຂົງເຂດວຽກງານ, ຕົວແບບການຜະລິດກະສິກຳເປັນສິນຄ້າ ແລະ ອື່ນໆ. 


ທີ່ສຳຄັນໃນກອງປະຊຸມຈະໄດ້ປ່ອນບັດຄັດເລືອກ ເອົາຄະນະບໍລິຫານງານພັກ ເມືອງ ງາ ຊຸດທີ XI, ປ່ອນບັດຄັດເລືອກເອົາຄະນະປະຈຳພັກເມືອງ, ເລືອກເອົາເລຂາ, ຮອງເລຂາພັກເມືອງ, ປ່ອນບັດຄັດ ເລືອກເອົາປະທານ, ຮອງປະທານກວດກາພັກ ແລະເອົາຜູ້ແທນ ໄປຮ່ວມກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ທີ່ຈະຈັດຂຶ້ນໃນຕໍ່ໜ້າຕື່ມອີກ.

Post a Comment

0 Comments