ກະຊວງການເງິນ ໄຟຂຽວ ຖ້າພົບເຫັນພະນັກງານເຮັດຜິດຕໍ່ລະບຽບກົດໝາຍ ໂທແຈ້ງ 1519




ປັດຈຸບັນພັກ-ລັດຖະບານພະຍາຍາມແກ້ໄຂບັນຫາການສໍ້ລາດບັງຫຼວງ, ການລະເມີດລະບຽບກົດໝາຍຂອງເຈົ້າໜ້າທີ່ພະນັກງານໃນກົງຈັກລັດຢ່າງເຂັມງວດ. ພ້ອມທັງໃຫ້ປະຕິບັດໜ້າທີ່ຢ່າງໂປ່ງໃສ, ຍຸຕິທຳ ແລະ ສາມາດກວດສອບໄດ້; ແຕ່ຖ້າຫາກພົບເຫັນການສໍ້ລາດບັງຫຼວງ, ການລະເມີດລະບຽບກົດໝາຍ ໂດຍສະເພາະພະນັກງານ-ລັດຖະກອນໃນຂະແໜງການເງິນທັງຢູ່ສູນກາງ ແລະ ທ້ອງຖິ່ນຈະຖືກລົງວິໄນຢ່າງເຂັ້ມງວດ, ຊຶ່ງໃນໄລຍະຜ່ານມາມີພະນັກງານບາງຄົນຖືກກ່າວເຕືອນ ແລະ ປະຕິບັດວິໄນເຖິງຂັ້ນໄລ່ອອກຈາກລັດຖະກອນ.


ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໃຫ້ສໍາພາດໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ 2 ປະຈໍາປີ 2019 ຜ່ານມາວ່າ: ໃນໄລຍະຜ່ານມາກະຊວງການເງິນໄດ້ເອົາໃຈໃສ່ກວດກາ ແລະ ຕ້ານບັນດາປະກົດການຫຍໍ້ທໍ້ໃນຖັນແຖວພະນັກງານຂະແໜງການຂອງຂະແໜງການເງິນຢ່າງຈິງຈັງຕະຫຼອດມາເປັນຕົ້ນແມ່ນ: ດຳເນີນການແຈ້ງຊັບສິນຂອງພະນັກງານ, ເປີດບັ້ນດຳເນີນຊີວິດການ ເມືອງ, ກວດກາການປະຕິບັດໜ້າທີ່ຂອງພະນັກງານຢູ່ບັນດາດ່ານພາສີ, ຂະແໜງສ່ວຍສາອາກອນ, ຂະແໜງຊັບສິນເພື່ອໃຫ້ການເກັບລາຍຮັບໄດ້ຕາມແຜນ.


ແຕ່ໃນຂະນະດຽວກັນ, ຂະແໜງການເງິນໄດ້ມີການປະຕິບັດວິໄນຢ່າງເຂັ້ມງວດຕໍ່ພະນັກງານ-ລັດຖະກອນ ຜູ້ທີ່ກະທຳຜິດໃນຫຼາຍກໍລະນີຕາມລະບຽບກົດໝາຍກຳນົດໄວ້, ເພື່ອເຮັດໃຫ້ການປະຕິບັດໜ້າທີ່ຂອງພະນັກງານໃນຂະແໜງການເງິນມີຄວາມເຂັ້ມແຂງ, ບໍລິສຸດ-ໂປ່ງໃສ. ຄຽງຄູ່ກັນນັ້ນ, ຮຽກຮ້ອງມາຍັງທຸກພາກສ່ວນໃນສັງຄົມຈົ່ງຊ່ວຍກັນຕິດຕາມກວດກາ ແລະ ປະກອບສ່ວນຢ່າງຈິງໃຈໃນການແຈ້ງຜູ້ມີພຶດຕະກຳທີ່ບໍ່ດີຈາກການກະທຳຂອງພະ ນັກງານທີ່ເຫັນວ່າເປັນການກະທຳທີຜິດຕໍ່ລະບຽບກົດໝາຍ, ເພື່ອຈະໄດ້ພ້ອມກັນກວດກາ ແລະ ແກ້ໄຂປາກົດການຫຍໍ້ທໍ້ດັ່ງກ່າວໄດ້ທ່ວງທັນເວລາເຫດການ.

ຖ້າຫາກໃນກໍລະນີພະນັກງານພາສີ-ອາກອນທີ່ມີການຕໍ່ລອງກັບຜູ້ປະກອບການ, ການລະເມີດ 10 ຂໍ້ຫ້າມຂອງກະຊວງການເງິນວາາງອອກ, ການຫຼີກລຽງ ຫຼື ລັກສະນະມອບເໝົາເພາະຜູ້ປະກອບການ, ພະນັກງານເຈົ້າໜ້າທີ່ບໍ່ປະຕິບັດເພາະເປັນຄວາມຊິນເຄີຍ, ຊຶ່ງໃນໄລຍະຜ່ານມາທາງກະຊວງການເງິນໄດ້ພະຍາຍາມແກ້ໄຂຢ່າງຕັ້ງໜ້າເພື່ອຫຼີກລຽງຫາງສຽງຈົ່ມວ່າຈາກສັງຄົມ ແລະ ຜ່ານມາກໍ່ມີຫຼາຍຄົນຖືກກ່າວເຕືອນ, ໄລ່ອອກຈາກລັດຖະກອນ ແລະ ຖ້າຫາກມີຄວາມຜິດຮ້າຍແຮງເຖິງຂັ້ນຖືກດໍາເນີນຄະດີຢູ່ຂັ້ນສານ.

ຂໍ້ມູນຈາກ: ກະຊວງການເງິນ

Post a Comment

0 Comments