ສະພາປະຊາຊົນຂັ້ນແຂວງຫຼວງພະບາງຈະພິຈາລະນາ 16 ບັນຫາໃນກອງປະຊຸມສະໄໝສາມັນເທື່ອທີ່ 8




ວັນທີ່ 22 ມັງກອນ 2020 ນີ້ ທ່ານ ກໍລະກັນ ພົມມະວົງ ເລຂາທິການ ສະພາປະຊາຊົນແຂວງຫຼວງພະບາງ ຊຸດທີ I ໄດ້ຖະແຫຼງຂ່າວ ການດຳເນີນກອງປະຊຸມສະໄໝສາມັນ ເທື່ອທີ 8 ທ່ານກ່າວວ່າ: ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງຫຼວງພະບາງ ຊຸດທີ I ຈະເປີດຂຶ້ນຢ່າງເປັນທາງການ ໃນລະຫວ່າງວັນທີ 4 ຫາ ວັນທີ 6 ກຸມພາ 2020 ທີ່ຈະມາເຖິງນີ້, 


ໃນນັ້ນ ຈະຮັບຟັງການລາຍງານໂດຍສັງເຂບ ກ່ຽວກັບການບໍລິຫານວຽກງານຂອງອົງການປົກຄອງແຂວງ ປະຈໍາປີ 2019 ແລະ ທິດທາງແຜນການ ປີ 2020 ຈາກທ່ານເຈົ້າແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິປະບັດແຜນພັດທະນາເສດຖະກິດ-ສັງຄົມ ຂອງແຂວງຫຼວງພະບາງ ປະຈຳປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າພະແນກແຜນການ ແລະ ການລົງທຶນແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດແຜນງົບປະມານ ຂອງແຂວງຫຼວງພະບາງ ປະຈໍາປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າພະແນກການເງິນແຂວງ, ຮັບຟັງການລາຍງານ ກ່ຽວກັບການເຄື່ອນໄຫວວຽກງານກວດສອບ ປະຈຳປີ 2019, ທິດທາງແຜນການ ປີ 2020 ແລະ ບົດສະຫຼຸບຂາດຕົວການຈັດຕັ້ງປະຕິບັດງົບປະມານ ປະຈຳປີ 2018 ຈາກປະທານອົງການກວດສອບປະຈຳພາກເໜືອ, 


ຮັບຟັງການລາຍງານ ກ່ຽວກັບການຈັດຕັ້ງປະຕິບັດການແກ້ໄຂຜົນການກວດສອບ ຈາກປະທານອົງການກວດກາລັດແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດການສົ່ງເສີມການປູກພືດສະບຽງອາຫານໃຫ້ກາຍເປັນສິນຄ້າ,  ຮັບຟັງການລາຍງານ ກ່ຽວກັບການຈັດຕັ້ງປະຕິບັດມະຕິວ່າດ້ວຍການຄຸ້ມຄອງລາຄາສິນຄ້າປະເພດເຄື່ອງບໍລິໂພກ, ຮັບຟັງການລາຍງານ ກ່ຽວກັບການຈັດສັນທີ່ຢູ່ອາໄສ, ອາຊີບຄົງທີ່ ແລະ ການຊົດເຊີຍຕ່າງໆ ໃຫ້ປະຊາຊົນທີ່ຖືກຜົນກະທົບຈາກໂຄງການພັດທະນາຕ່າງໆ ຈາກທ່ານຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດມະຕິກອງປະຊຸມຂອງສະພາປະຊາຊົນແຂວງ ວ່າດ້ວຍການຄຸ້ມຄອງ ຄວາມເປັນລະບຽບຮຽບຮ້ອຍຢູ່ນະຄອນຫຼວງພະບາງ ຈາກເຈົ້ານະຄອນຫຼວງພະບາງ, ຮັບຟັງການລາຍງານ ກ່ຽວກັບຜົນການຈັດຕັ້ງປະຕິບັດການແກ້ໄຂບັນຫາອັດຕາປະລະຂອງນັກຮຽນມັດທະຍົມຕອນຕົ້ນ-ຕອນປາຍ ປີ 2019 ແລະ ຍົກສູງຄຸນນະພາບການສຶກສາແຕ່ລະຊັ້ນຮຽນ ປີ 2020 ຈາກຫົວໜ້າພະແນກສຶກສາທິການ ແລະ ກິລາແຂວງ, 


ຮັບຟັງການລາຍງານ ກ່ຽວກັບການຈັດຕັ້ງປະຕິບັດການຄຸ້ມຄອງຄົນເຂົ້າ-ອອກເມືອງ ຂອງຄົນຕ່າງປະເທດ ພາຍໃນແຂວງຫຼວງພະບາງ ປະຈຳປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າກອງບັນຊາການປ້ອງກັນຄວາມສະຫງົບແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງອົງການໄອຍະການປະຊາຊົນແຂວງ ຈາກທ່ານຫົວໜ້າອົງການໄອຍະການປະຊາຊົນແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງສານປະຊາຊົນແຂວງ ຈາກປະທານສານປະຊາຊົນແຂວງ, ຮັບຟັງການລາຍງານ ການເຄື່ອນໄຫວວຽກງານ ປະຈໍາປີ 2019 ແລະທິດທາງແຜນການ ປີ 2020 ຂອງຄະນະປະຈຳສະພາປະຊາຊົນແຂວງ ແລະຈະມີການປະກອບຄຳເຫັນຈາກຫຼາຍພາກສ່ວນ ທັງພິຈາລະນາ ແລະ ຮັບຮອງເອົາ ການສະເໜີແຕ່ງຕັ້ງບຸກຄະລາກອນຂອງແຂວງ ຈຳນວນໜື່ງ. 


ເລຂາທິການສະພາປະຊາຊົນແຂວງຫຼວງພະບາງກ່າວຕືມວ່າ: ໃນລະຫວ່າງການດຳເນີນກອງປະຊຸມ ຍັງຈະໄດ້ມີການຮັບຟັງການຊີ້ແຈງ ເພີ້ມເຕີມຈາກພາກສ່ວນຕ່າງໆ ຕໍ່ຄໍາຊັກຖາມຂອງສະມາຊິກສະພາປະຊາຊົນແຂວງ ແລະຈະເປີດໂອກາດໃຫ້ປະຊາຊົນລາວບັນດາເຜົ່າ ໃນທົ່ວແຂວງຫຼວງພະບາງ ໄດ້ໃຊ້ສິດ ປະຊາທິ ປະໄຕ ເພື່ອສະເໜີບັນດາຄຳຄິດເຫັນອັນເປັນປະໂຫຍດ ຕໍ່ກອງປະຊຸມຂອງພວກເຮົາ ຜ່ານໂທລະສັບສາຍດ່ວນ, ໝາຍເລກ 071 156 ໂດຍບໍ່ໄດ້ເສຍຄ່າ

Post a Comment

0 Comments