ໄຂກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງອຸດົມໄຊຊຸດທີ I



ຂ່າວ ໄມພອນ
-----
 ກອງປະຊຸມ ສະໄໝສາມັນເທື່ອທີ 8 ຂອງສະພາປະຊາຊົນແຂວງອຸດົມໄຊຊຸດທີ I ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 22 ມັງກອນ 2020 ນີ້ ຢູ່ທີ່ສະໂມສອນຂອງແຂວງ ພາຍໃຕ້ການເປັນປະທານຂອງ ທ່ານ ບຸນລອດ ອ່ອນພະຈັນ ຮອງເລຂາພັກແຂວງ ປະທານສະພາປະຊາຊົນແຂວງ. 

ເຂົ້າຮ່ວມເປັນກຽດ ມີທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງ ອຸດົມໄຊ. ມີ ບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ການນຳ-ອາດີດການນຳແຂວງ, ນັກປະຕິວັດອາວຸໂສ, ຜູ້ຊົງຄຸນວຸດທິ, ອາດີດສະມາຊິກສະພາແຫ່ງຊາດ, ຕາງໜ້າອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ຕົວແທນນັກທຸລະກິດເຂົ້າຮ່ວມ.


 ກອງປະຊຸມ ສະໄໝສາມັນເທື່ອທີ 8 ຂອງສະພາປະຊາຊົນແຂວງອຸດົມໄຊຊຸດທີ I ຈະໄດ້ດຳເນີນເປັນເວລາ 3 ວັນຈິ່ງສຳເລັດ ເຊິ່ງ ກອງປະຊຸມຈະໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນພື້ນຖານຂອງແຂວງຄື: ຄົ້ນນຄວ້າ, ພິຈາລະນາ, ຮັບຮອງເອົາການສະເໜີແຕ່ງຕັ້ງບຸກຄະລາກອນ ຂອງສະພາປະຊາຊົນແຂວງ ແລະ ອົງການປົກຄອງ ແຂວງ, ຄົ້ນຄ້ວາ, ພິຈາລະນາ, ຮັບຮອງເອົາການປະເມີນຜົນການປະຕິບັດໜ້າທີ່ຂອງບຸກຄະລາກອນດຳລົງຕໍາແໜ່ງທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ, ຮັບຟັງການລາຍງານຂອງທ່ານເຈົ້າແຂວງກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນເປັນຕົ້ນແມ່ນ ການບໍລິຫານລັດຂອງອົງການປົກຄອງປະຈຳປີ 2019 ແລະ ຄາດໝາຍສູ້ຊົນ ປີ 2020, 

ພ້ອມທັງ ສະເໜີວິໄສທັດຂອງທ່ານເຈົ້າແຂວງກ່ຽວກັບໂຄງການຕົວເມືອງທັນສະໄໝຂອງບໍລິສັດອຳມະຕະຢູ່ເມືອງຮຸນ ແລະ ບໍລິສັດ ບໍ່ເຕນແດນງາມ ຢູ່ເມືອງນາໝໍ້ ແລະ ເມືອງໄຊ, ຄົ້ນຄວ້າ ພິຈາລະນາ, ຮັບຮອງເອົາ ບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2019 ແລະ ທິດທາງແຜນການ ປະຈໍາປີ 2020 ຂອງອົງການປົກຄອງແຂວງ, ຄົ້ນຄວ້າ ພິຈາລະນາ, ຮັບຮອງເອົາ ບົດລາຍງານ ຂອງອົງການກວດສອບແຫ່ງລັດປະຈໍາພາກເໜືອ ກ່ຽວກັບ ບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2018 ແລະ ຜົນກວດສອບປະຈຳປີ 2019 ແລະ ທິດທາງປະຈຳປີ 2020 ຢູ່ແຂວງ ອຸດົມໄຊ, ຮັບຟັງການລາຍງານການແກ້ໄຂຜົນຂອງການກວດສອບປະຈຳປີ 2017-2018 ຂອງຄະນະຮັບຜິດຊອບແກ້ໄຂຜົນກວດສອບ, ຮັບຟັງການປະກອນຄຳເຫັນຂອງຄະນະປະຈຳສະພາປະຊາຊົນແຂວງ ຕໍ່ກັບບົດລາຍງານຂອງອົງການປົກຄອງແຂວງ ແລະ ອົງການກວດສອບປະຈຳພາກເໜືອ ແລະ ຄະນະຮັບຜິດຊອບແກ້ໄຂຜົນກວດສອບ, ຄົ້ນນຄວ້າ ພິຈາລະນາ, 

ຮັບຮອງເອົາ ບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2019 ແລະ ທິດທາງແຜນການ ປະຈໍາປີ 2020 ຂອງອົງການໄອຍະການປະຊາຊົນ ແລະ ສານປະຊາຊົນແຂວງ, ຄົ້ນນຄວ້າ ພິຈາລະນາ, ຮັບຮອງເອົາ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2019 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2020 ຂອງສະພາປະຊາຊົນ ແຂວງອຸດົມໄຊ, ຄົ້ນຄວ້າ, ພິຈາລະນາ, ຮັບຮອງເອົາ ນິຕິກໍາຂອງເຈົ້າແຂວງ ວ່າດ້ວຍການປະເມີນລາຄາທີ່ດິນ ແຂວງອຸດົມໄຊ. 

ນອກຈາກນີ້, ກອງປະຊຸມ ຍັງຈະໄດ້ຮັບຟັງການລາຍງານ, ຊີ້ແຈງບາງບັນຫາສຳຄັນ ແລະ ພົ້ນເດັ່ນ ຂອງບັນດາພະແນກການຂອງແຂວງຈຳນວນໜຶ່ງ ໃນການຄຸ້ມຄອງບໍລິຫານລັດທາງດ້ານເສດຖະກິດ-ສັງຄົມ ຕາມການຊັກຖາມຂອງກອງປະຊຸມ.
ໃນໂອກາດກ່າວເປີດກອງປະຊຸມ ທ່ານ ບຸນລອດ ອ່ອນພະຈັນ ປະທານກອງປະຊຸມ ກ່າວວ່າ.ຕະຫລອດໄລຍະ 1 ປີຜ່ານມາ,ບັນດາອົງການຈັດຕັ້ງລັດ ອ້ອມຂ້າງແຂວງ ໄດ້ສຸມໃສ່ຈັດຕັ້ງປະຕິບັດມະຕິກອງປະຊຸມ ສະໄໝສາມັນ ເທື່ອທີ 6 ແລະ ເທື່ອທີ 7 ຂອງສະພາປະຊາຊົນ ແຂວງ ອຸດົມໄຊ ຊຸດທີ I, ເຊິ່ງມີທັງຂໍ້ສະດວກ, ຂໍ້ຫຍຸງຍາກ ແລະ ສິ່ງທ້າທາຍຫຼາຍປະການ ເປັນຕົ້ນ ບັນຫາໄພພິບັດທາງທໍາມະຊາດ ນໍ້າຖ້ວມ, ແຫ້ງແລ້ງ, ພະຍາດອະຫິວາໝູອາຟຣິກາລະບາດ, ການຜັນແປຂອງສະພາບໂລກ ແລະ ອື່ນໆເຊິ່ງໄດ້ສ້າງຜົນກະທົບໃຫ້ແກ່ຊັບສິນ, ຜົນການຜະລິດຂອງປະຊາຊົນ ໄດ້ຮັບຄວາມເສຍຫາຍ ແລະ ລາຄາສິນຄ້າຫຼາຍປະເພດເໜັງຕີງຂຶ້ນສູງ. ແຕ່ຍ້ອນຄວາມເອົາໃຈໃສ່ຊີ້ນໍາຢ່າງໃກ້ຊິດ ຂອງອົງຄະນະພັກແຂວງ, ຄວາມເປັນເຈົ້າການ ແລະ ຄວາມຮັບຜິດຊອບສູງ ຂອງທຸກພາກສ່ວນ ທັງພາກລັດ, ພາກເອກະຊົນ ແລະ ປະຊາຊົນບັນດາເຜົ່າແຂວງ ອຸດົມໄຊ ໄດ້ເຮັດໃຫ້ສະພາບເສດຖະກິດຍັງສືບຕໍ່ມີສະຖຽນລະພາບສັງຄົມມີຄວາມສະຫງົບ, ປອດໄພໂດຍພື້ນຖານບັນດາຄາດໝາຍ ແລະ ມາດຕະການຕ່າງໆ ທີ່ກອງປະຊຸມສະພາປະຊາຊົນແຂວງ ຮັບຮອງເອົານັ້ນ ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ແລະ ມີຜົນສໍາເລັດໃນລະດັບດີ ເປັນການປະກອບສ່ວນເຮັດໃຫ້ຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງນັບມື້ນັບດີຂຶ້ນກວ່າເກົ່າ.

Post a Comment

0 Comments