ບ້ານນາປຸ່ງ ເມືອງຫົງສາ ຈັດງານບຸນກິນຈຽງ (ນໍເປເຈົ໋າ) ຂອງເຜົ່າມົ້ງ ຢ່າງຄຶກຄັກມວ່ນຊື່ນ



ບ້ານນາປຸ່ງ ເມືອງຫົງສາ ແຂວງໄຊຍະບູລີ ໄດ້ຈັດງານບຸນກິນຈຽງ ຫຼື ນໍເປເຈົ໋າຂອງເຜົ່າມົ້ງ ຂຶ້ນຢ່າງຄຶກຄັກມວ່ນຊື່ນ ຢູ່ທີ່ບ້ານດັ່ງກ່າວ ໃນທ້າຍປີ 2019 ຜ່ານມານີ້,  ໂດຍມີທ່ານ ຄໍາຫຼ້າ ຜີວວັນນາ ເຈົ້າເມືອງໆ ຫົງສາ ພ້ອມດ້ວຍການນຳຂອງເມືອງ, ແຂກຖືກເຊີນ, ມີຄະນະອໍານາດການປົກຄອງບ້ານ,  ເຈົ້າກົກເຈົ້າເຫຼົ່າ, ຫົວໜ້າຊິງຊາວ ແລະ ຕະຫຼອດປະ​ຊາ​ຊົນປະຊາຊົນບັນດາເຜົ່າ​​ເຂົ້າ​ຮ່ວມຢ່າງຫຼວງຫຼາຍ​.



ທ່ານ ສົມຈັນ ໄຊຈະ ນາຍບ້ານໆ ນາປຸ່ງ ໄດ້ຂຶ້ນລາຍງານການກະກຽມ ແລະ ສະເໜີຄວາມເປັນມາຂອງບຸນກິນຈຽງ ຫຼື ນໍເປ່ເຈົ໋າເຜົ່າມົ້ງວ່າ:  ບຸນກິນຈຽງປີນີ້, ຖືວ່າມີຄວາມໝາຍສຳຄັນຫຼາຍ ເພາະໄດ້ຈັດຂຶ້ນໃນໄລຍະທີ່ທົ່ວພັກ, ທົ່ວກຳລັງປະກອບອາວຸດ, ທົ່ວປວງຊົນລາວທັງຊາດ ພວມກັນສະເຫຼີມສະຫຼອງວັນຊາດທີ 2 ທັນວາ. ນອກຈາກຈະຈັດຂຶ້ນ ເພື່ອເປັນການປົກຮັກສາຮີດຄອງປະເພນີ ສົ່ງທ້າຍປີເກົ່າ ຕ້ອນຮັບໃໝ່ ຂອງເຜົ່າມົ້ງແລ້ວ, ຍັງເປັນການສະເຫຼີມສະຫຼອງ ວັນສຳຄັນຂອງຊາດຕື່ມອີກ. ທັງມີຄວາມພາກພູມໃຈທີ່ໄດ້ເຫັນລູກຫຼານຂອງປະຊາຊົນເຜົ່າມົ້ງ ໄດ້ພ້ອມກັນນຸ່ງຖືຊຸດປະຈຳເຜົ່າທີ່ໄດ້ຜະລິດຈາກພູມປັນຍາ ສີໄມ້ລາຍມືຂອງເຜົ່າມົ້ງ. ບຸນກິນຈຽງ ຫລື ນໍເປເຈົ໋າ ຂອງພີ່ນ້ອງເຜົ່າມົ້ງ ແມ່ນຈັດຂຶ້ນ ໃນທຸກໆປີ ເພື່ອເປັນການສະເຫຼີມ ສະຫຼອງສົ່ງທ້າຍປີເກົ່າ ຕ້ອນຮັບປີໃໝ່ ທັງເປັນການສະຫຼຸບຜົນງານໃນການທຳ, ການຜະລິດໃນໄລຍະໜຶ່ງປີຜ່ານມາ ພ້ອມທັງວາງແຜນການຜະລິດໃນຊຸມປີຕໍ່ໄປ ເພື່ອໃຫ້ໄດ້ຮັບຜົນດີ ສຸມໃສ່ເຮັດໃຫ້ຄອບຄົວມີຢູ່ມີກິນ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.



ໂອກາດນີ້, ທ່ານເຈົ້າເມືອງຫົງສາ ​ໄດ້​​ກ່າວ​ອວຍພອນ​ປີ​ໃໝ່​ໃຫ້​ປະຊາຊົນເຜົ່າ​ມົ້ງ ຈົ່ງ​ມີ​ສຸຂະພາບ​ແຂງ​ແຮງ​, ອາຍຸ​ໝັ້ນຍືນ​ຍາວ, ​ເປັນ​ຫຼັກ​ແຫຼ່ງ​ໃນ​ການ​ເຕົ້າ​ໂຮມ​ຄວາມ​ສາມັກຄີ​ປອງ​ດອງ​ປະຊາຊົນ ​ໃຫ້​ເປັນ​ປຶກ​ແຜ່ນ​ແໜ້ນໜາ​ ເພື່ອ​ພ້ອມ​ກັນ​ປົກ​ປັກ​ຮັກສາ, ສ້າງສາ​ພັດທະນາປະ​ເທດ​ຊາດ ​ແລະ ພ້ອມກັນພັດທະນາໃຫ້​ກ້າວຂຶ້ນ​ຢ່າງ​ບໍ່​ຢຸດ​ຢັ້ງ. ພ້ອມ​ນີ້, ທ່ານຍັງ​ຮຽກຮ້ອງ​ເຖິງປະຊາຊົນເຜົ່າ​ມົ້ງ ຈົ່ງ​​ພ້ອມ​ກັນ​ສ້າງ​ທ່ວງທ່າ ​ແລະ ບາດກ້າວ​ໃໝ່ ​ເພື່ອ​ຍົກ​ລະດັບ​ຊີວິດ​ການ​ເປັນ​ຢູ່​ຂອງ​ຕົນ​ເອງ ​ແລະ ຄອບຄົວ​ໃຫ້​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​​ເທື່ອລະກ້າວຕື່ມອີກ. ເຊິ່ງພາຍໃນງານໄດ້ມີຈັດກິດຈະກຳການຊົນງົວ, ການຍິງໜ້າເກັກ, ການຟ້ອນ  ແລະ ການໂຍນໝາກຄອນ ອີກຕື່ມ.

ພາບ-ຂ່າວ: ກິດຕິສັກ ບົວໄລ 

Post a Comment

0 Comments