ຫ້ອງການເມືອງ ປກສ ນວ ໄດ້ເປີດກອງປະຊຸມໃຫຍ່ ແລະ ປ່ອນບັດຄັດເລືອກເອົາຄະນະພັກຊຸດໃໝ່




     ໃນກອງປະຊຸມໃຫຍ່ ຄັ້ງທີ IV ຂອງຄະນະພັກຮາກຖານ ຫ້ອງການເມືອງ ປກສ ນວ ທີ່ຈັດຂຶ້ນໃນຕອນເຊົ້າຂອງວັນທີ 15 ມັງກອນ 2020 ຢູ່ຫ້ອງປະຊຸມຊັ້ນ 4 ກອງບັນຊາການ ປກສ ນວ ບັນດາສະມາຊິກພັກສົມບູນ ໄດ້ພ້ອມກັນໃຊ້ສິດຂອງຕົນປ່ອນບັດເລືອກເອົາ ສະຫາຍ ພັທ ນາງ ບົວລະພັນ ທິລະສັກ ເປັນເລຂາ ກຳມະການພັກຮາກຖານ, ສະຫາຍ ໄກສອນ ແສງສີລິຈັນ  ເປັນຮອງເລຂາ, ສະຫາຍ ພັທ ຈຳປາ  ແສງສຸລິຍາ ເປັນປະທານກວດກາ ແລະ ພັທ ດາວວົງ ຫຸມມະວົງ, ພັທ ສຸບັນ ວົງນະລັດ, ພັທ ຄຳຈັນ ວົງສາ, ພັທ ປາດຖະໜາ ລັດຕະນະປັນຍາ ເປັນກຳມະການ.



       ກອງປະຊຸມຄັ້ງນີ້ ແມ່ນໄດ້ຈັດຂຶ້ນພາຍໃຕ້ການເປັນປະທານຂອງ ສະຫາຍ ພັທ ສຸກພະຈັນ ບຸດດາຄຳ ກຳມະການພັກ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ (ເລຂາຄະນະພັກຮາກຖານ ຫ້ອງການເມືອງ ຊຸດທີ III) ແລະ ໃຫ້ກຽດເຂົ້າຮ່ວມຂອງ ສະຫາຍ ພົຈວ ບຸບຜາ ສີພົມມາ ຄະນະປະຈໍາພັກ ນວ ເລຂາຄະນະພັກ ຫົວໜ້າກອງບັນຊາການ ປກສ ນວ, ມີເລຂາຊາວໜຸ່ມ, ຫົວໜ້າໜ່ວຍສະຫະພັນແມ່ຍິງ ຫ້ອງການເມືອງ ແລະ ແຂກຖືກເຊີນ, ສະມາຊິກພັກສົມບູນ - ສໍາຮອງຂອງຮາກຖານພັກ ຫ້ອງການ ປກສ ນວ ເຂົ້າຮ່ວມ. 



     ໃນກອງປະຊຸມ ສະຫາຍ ພັທ ສຸກພະຈັນ ບຸດດາຄຳ ໄດ້ຂຶ້ນຜ່ານຮ່າງບົດລາຍງານເມືອງ ກອງປະຊຸມໃຫຍ່ ຄັ້ງທີ IV ຂອງຄະນະພັກຮາກຖານ ຫ້ອງການເມືອງ ເຊິ່ງມີເນື້ອໃນບາງຕອນວ່າ: ໃນ 4 ປີຕໍ່ໜ້າຄະນະພັກຮາກຖານຫ້ອງການເມືອງ ປກສ ນວ ຈະສຸມໃສ່ ວຽກງານກໍ່ສ້າງພັກທາງດ້ານການເມືອງ ເພີ່ມທະວີສຶກສາອົບຮົມການເມືອງແນວຄິດ ໃຫ້ສະມາຊິກພັກ, ນາຍ ແລະ ພົນຕໍາຫຼວດ ທີ່ຂຶ້ນກັບຄວາມຮັບຜິດຊອບຂອງຄະນະພັກຫ້ອງການເມືອງ ໃຫ້ມີຄວາມເຂົ້າໃຈເລິກເຊິ່ງ ໂດຍນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມູນເຊື້ອຂອງຊາດ-ຂອງພັກ, ຂອງກຳລັງປະກອບອາວຸດ, ປັບປຸງທັດສະນະຫຼັກໝັ້ນການເມືອງ, ປັບປຸງສະຕິຕໍ່ການຈັດຕັ້ງ, ຕໍ່ລະບຽບວິໄນ, ຄຸນສົມບັດສິນທໍາປະຕິວັດ; ສຸມໃສ່ ວຽກງານດ້ານເສດຖະກິດ ແລະ ແກ້ໄຂຊີວິດການເປັນຢູ່ ໂດຍເອົາໃຈໃສ່ນໍາພາປົກປັກຮັກສາສະຖານທີ່ເຮັດວຽກ, ພາຫະນະ, ວັດຖຸອຸປະກອນຮັບໃຊ້ຕ່າງໆ, ຄຸ້ມຄອງການເງິນ, ງົບປະມານຂອງຫ້ອງ, ຮັບປະກັນການເບີກຈ່າຍ, ຄຸ້ມຄອງຮັກສາເງີິນຄັງຫ້ອງ ເພື່ອເປັນກອງທຶນຊ່ວຍເຫຼືອແກ້ໄຂຊີວິດການເປັນຢູ່ຂອງນາຍ ແລະ ພົນຕໍາຫຼວດ; ສຸມໃສ່ ວຽກງານວິຊາສະເພາະ ແລະ ອົງການຈັດຕັ້ງມະຫາຊົນ ສືບຕໍ່ເພີ່ມທະວີການນໍາພາ ວຽກງານວິຊາສະເພາະບົນພື້ນຖານ ຍົກສູງສະຕິຄວາມຮັບຜິດຊອບຂອງຄະນະພັກ, ສະມາຊິກພັກ, ນາຍ ແລະ ພົນຕໍາຫຼວດ ເປັນເຈົ້າການຜັນຂະຫຍາຍຈັດຕັ້ງປະຕິບັດແຜນງານ, ໂຄງການຕ່າງໆ ໃນຄວາມຮັບຜິດຊອບ; ພ້ອມທັງ ເອົາໃຈໃສ່ປັບປຸງກົງຈັກການຈັດຕັ້ງ ແລະ ແບບແຜນວິທີເຮັດວຽກຂອງຄະນະຊາວໝຸ່ມ-ແມ່ຍິງ  ໂດຍປຸກລະດົມຊຸກຍູ້ຂະບວນການຈັດຕັ້ງ ຂໍ້ແຂ່ງຂັນ 4 ບຸກຂອງຊາວໜຸ່ມລາວ ແລະ ຂໍ້ແຂ່ງຂັນ 3 ດີຂອງແມ່ຍິງລາວ ໃຫ້ມີຄວາມໜັກແໜ້ນ, ເຂັ້ມແຂງ ສາມາດນໍາພາສ້າງຂະບວນການຢ່າງເປັນປົກກະຕິ ແລະ ສຸມໃສ່ວຽກງານນໍາພາປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນຫ້ອງການເມືອງ ເອົາໃຈໃສ່ສຶກສາອົບຮົມສະຕິລະວັງຕົວ ໃຫ້ສະມາຊິກພັກ, ນາຍ ແລະ ພົນຕໍາຫຼວດ ທີ່ຂຶ້ນກັບຄວາມຮັບຜິດຊອບຂອງຄະນະພັກຫ້ອງ, ຕ້ານທຸກປະກົດການຫຍໍ້ທໍ້ຕ່າງໆ ໃນສັງຄົມ ເຊັ່ນ: ປຸ້ນ-ຈີ້, ຊິງຊັບ, ງັດແງະ-ລັກຊັບ, ຢາເສບຕິດ, ຫຼີ້ນການພະນັນ, ກຸ່ມແກ້ງກວນເມືອງ ແລະ ອື່ນໆ.

Post a Comment

0 Comments