ຄອບຄົວການນຳຂັ້ນສູນກາງມອບເງີນ 1 ຕື້ກີບເພື່ອປະກອບສ່ວນໃນການສ້າງໂຮງຮຽນ ມສ ຫົວນ້ຳບາກ



ໂດຍ: ສີຈັນ ເກດວົງສາ
 ໃນຕອນເຊົ້າວັນທີ 5 ກຸມພານີ້ ທີ່ຫ້ອງປະຊຸມໂຮງແຮມມິດຕະພາບແຂວງ ອຸດົມໄຊ ຄອບຄົວການນຳຂັ້ນສູນກາງນຳໂດຍທ່ານນາງ ບົວໄຫຼ ຈິດມະນີ ຄອບຄົວຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ຄະນະກວດກາສູນກາງພັກ ພ້ອມດ້ວຍຄອບຄົວການນຳຂັ້ນສູນກາງ ແລະ ຍາດພີ່ນ້ອງ ໄດ້ນຳເອົາເງີນມາມອບໃຫ້ແກ່ຄະນະພັກອົງການປົກຄອງແຂວງອຸດົມໄຊ ຮັບໂດຍທ່ານ ຄຳພຽງ ຢາຈົງວາ ຮອງເລຂາພັກແຂວງ ຮອງເຈົ້າແຂວງ ອຸດົມໄຊ ເຂົ້າຮ່ວມມີຄະນະປະຈຳພັກແຂວງພ້ອມດ້ວຍຄອບຄົວ ແລະ ຂະແໜງການທີ່ກ່ຽວຂ້ອງຂັ້ນແຂວງ-ເມືອງໄຊເຂົ້າຮ່ວມ. 



 ເງີນທີ່ນຳມາມອບໃນຄັ້ງນີ້ມີຈຳນວນ 1 ຕື້ກີບ ໂດຍໄດ້ຮັບຈາກການສະໝັກໃຈປະກອບສ່ວນຂອງບັນດາບໍລິສັດ ຫ້າງຮ້ານ ຄອບຄົວການນຳຂັ້ນສູນກາງ ຍາດພີ່ນ້ອງ ແລະ ຜູ້ປະກອບການທຸລະກິດທີ່ຢູ່ນະຄອນຫຼວງ ເພື່ອປະກອບສ່ວນໃນການກໍ່ສ້າງອາຄານຮຽນ ໂຮງຮຽນ ມສ ຫົວນ້ຳບາກ ເມືອງ ໄຊ ແຂວງ ອຸດົມໄຊ. ເຊີງໂຄງການກໍ່ສ້າງອາຄານຮຽນ ໂຮງຮຽນ ມສ ຫົວນ້ຳບາກຄັ້ງນີ້ເປັນອາຄານ 2 ຊັ້ນ ປະກອບດ້ວຍໂຕະຕັ່ງຄົບຊຸດ ມີ 10 ຫ້ອງຮຽນ 4 ຫ້ອງນ້ຳ ມີຂະໜາດ 47x14 ແມັດ ມີມູນຄ່າການກໍ່ສ້າງທັງໝົດ 2.5 ຕື້ກ່ວາກີບ. ໂອກາດດຽວກັນນີ້ຄອບຄົວການນຳຂັ້ນສູນກາງຍັງໄດ້ມອບອີກຕື່ມຈຳນວນ 20 ລ້ານກີບໃຫ້ກັບອົງການປົກຄອງເມືອງ ໄຊ ນຳໄປມອບຕໍ່ໃຫ້ກັບໂຮງຮຽນ ມສ ບ້ານຫຼັກ 32 ເມືອງ ໄຊ ເພື່ອນຳໃຊ້ເຂົ້າໃນການບູລະນະອາຄານສະຖານທີ່ໂຮງຮຽນເພື່ອນຳໃຊ້ເຂົ້າໃນການຈັດຕັ້ງການຮຽນ-ການສອນ.

 ໃນໂອກາດຮັບເງີນຄັ້ງນີ້ທ່ານ ຄຳພຽງ ຢາຈົງວາ ຮອງເຈົ້າແຂວງ ອຸດົມໄຊ ກໍໄດ້ສະແດງຄວາມຂອບໃຈຕໍ່ຄອບຄົວການນຳຂັ້ນສູນກາງ ທີ່ມີຄວາມເປັນຫ່ວງເປັນໄຍຕໍ່ການພັດທະນາຊົນນະບົດ ກໍຄືການພັດທະນາການສຶກສາຢູ່ແຂວງ ອຸດົມໄຊ ເຊີງການນຳແຂວງ ອຸດົມໄຊ ຈະສືບຕໍ່ນຳເອົາວັດຖຸປັດໃຈທີ່ໄດ້ຮັບຄັ້ງນີ້ນຳໃຊ້ໃຫ້ຖືກຕ້ອງຕາມເປົ້າໝາຍ.

Post a Comment

0 Comments