ຈັດງານຕະຫລາດນັດພົບແຮງງານ ໃນລະຫວ່າງວັນທີ 13 - 15 ກຸມພາ 2020 ທີ່ວິທະຍາໄລເຕັກນິກວິຊາຊີບ, ແຂວງຫຼວງພະບາງ




ເຊີນເຂົ້າຮ່ວມງານຕະຫລາດນັດພົບແຮງງານ ເຊິ່ງ 8 ແຂວງພາກເໜືອນ ຮ່ວມກັນຈັດງານຕະຫລາດນັດພົບແຮງງານ ໃນລະຫວ່າງວັນທີ 13 - 15 ກຸມພາ 2020 ທີ່ວິທະຍາໄລເຕັກນິກວິຊາຊີບ, ແຂວງຫຼວງພະບາງ. 

ພາຍໃນງານຕະຫລາດນັດພົບແຮງງານ ເຊິ່ງມີຫລາຍກິດຈະກຳທີ່ໜ້າສົນໃຈ ເປັນຕົ້ນແມ່ນ: ການວາງສະແດງຫັດຖະກຳຈັກສານ, ແກະສະລັກ ດ້ວຍສີມືຂອງແຂວງ, ການລົງທະບຽນຮັບສະໝັກງານ, ການໃຫ້ຂໍ້ມູນຂ່າວສານຕະຫລາດແຮງງານ, ຂໍ້ມູນກ່ຽວກັບການຝຶກອົບຮົມວິຊາຊີບ ແລະ ການແນະນຳສາທິດການຮຽນ, ການເຜີຍແຜ່ເວບໄຊບໍລິການຈັດຫາງານ ສາທາລະນະຊົນ (www.lmi.molsw.gov.la ) ການຈັດຫາງານ ກໍຄືຕໍາແໜ່ງງານ ທີ່່ຫວ່າງຫຼາຍພັນຕຳແໜ່ງ ແລະ ກົດໝາຍແຮງງານ.

ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.​ກ່າວວ່າ: ການຈັດງານຕະຫລາດນັດໃນຄັ້ງນີ້ ຍັງມີກິດຈະກຳສາທິດການເຮັດຕົວຈິງຂອງບາງສາຂາອາຊີບ ເຊັ່ນ: ສາຂາຕັດຫຍິບ, ໄຟຟ້າອາຄານ, ເສີມສວຍ ແລະ ອື່ນໆ. ນອກນັ້ນ, ຍັງມີ ກິດຈະກຳວາງສະແດງຮູບພາບ ການເຄື່ອນໄຫວຂອງວຽກງານພັດທະນາສີມືແຮງງານ ແລະ ຈັດຫາງານໃນແຕ່ລະໄລຍະແລະ ວາງສະແດງສິນຄ້າ ເຊິ່ງຈະມີຫຼາຍກວ່າຮ້ອຍ ຫ້ອງ ຫຼື ບູດວາງສະແດງ ລວມໄປເຖິງການແຂ່ງຂັນສີມືແຮງງານ, ຄາດວ່າຈະມີມີຜູ້ມາທ່ຽວຊົມຈໍານວນຫຼາຍພັນຄົນ. ພ້ອມທັງເຊື່ອໝັ້ນວ່າ ເວທີ ແຫ່ງນີ້ ເປັນໂອກາດອັນດີ ໃຫ້ແກ່ພາກສ່ວນຕ່າງ ເຂົ້າເຖິງຂໍ້ມູນ-ຂ່າວສານຕະຫຼາດແຮງງານ ໃນ 8 ແຂວງພາກເໜືອ ແລະ ຂົງເຂດໃກ້ຄຽງ ນຳມາເຊິ່ງການກະຕຸກຊຸກຍູ້ ການສ້າງວຽກເຮັດງານທຳ, ການແລກປ່ຽນບົດຮຽນ ແລະ ປະສົບການດີໆ ຂອງການເປັນຜູ້ປະກອບການໃນຂະແໜງຫັດຖະກຳ, ອຸດສາຫະກຳຂະໜອດນ້ອຍ ແລະ ກາງ, ການຮັບສະໝັກ ແລະ ບັນຈຸແຮງງານເຂົ້າໃນຕຳແໜ່ງງານ ທີ່ເໝາະສົມ ເພື່ອ ຊ່ວຍດັດສົມຄວາມຕ້ອງການແຮງງານ ແລະ ການສະໜອງກຳລັງແຮງງານ ເຊິ່ງ ຖືວ່າ ເປັນການຊ່ວຍສ້າງຄວາມສົມດູນຂອງກະລັງແຮງງານໃນຂະແໜງເສດຖະກິດ ຕິດພັນກັບ ການຫັນເປັນອຸດສາຫະກຳ ແລະ ທັນສະໄໝ, ການຄວບຄຸມອັດຕາການຫວ່າງງານໃຫ້ຫຼຸດຈາກ 6.7% ( 8 ແຂວງພາກເໜືອ) ທັງສືບຕໍ່ຜັນຂະຫຍາຍວຽກງານສາມສ້າງ ໂດຍສະເພາະ ການສ້າງບ້ານພັດທະນາ ແລະ ການສ້າງ 1 ບ້ານ 1 ຜະລິດພັນ, ຊຸກຍູ້ ແລະ ສົ່ງເສີມການສ້າງພື້ນຖານໃຫ້ແກ່ອາຊຽນເປັນຕະຫຼາດອັນດຽວ.

ໂອກາດນີ້ ທ່ານ ປອ ຄຳແພງ ຍັງຮຽກຮ້ອງ ມາຍັງທຸກພາກສ່ວນ ທັງພາກລັດ ແລະ ເອກະຊົນ ນັບທັງ ຫົວໜ່ວຍແຮງງານ, ຫົວໜວ່ຍທຸລະກິດ ແລະ ໂຄງການລົງທຶນຕ່າງໆ ຈົ່ງພ້ອມກັນເຊີດຊູການປະສານງານ ແລະ ການຮ່ວມແຮງຮ່ວມໃຈການວາງແຜນການ ສ້າງ ແລະ ພັດທະນາສີມືແຮງງານ ໃຫ້ມີຄຸນນະພາບດີກວ່າເກົ່າ ບໍ່ວ່າຈະເປັນດ້ານວິຊາສະເພາະ, ຄວາມຊຳນານງານ, ຄວາມປານີດ, ລະບຽບວິໃນ, ຄວາມດຸໝັ່ນ ແລະ ອົດທົນ ເພື່ອໃຫ້ເປັນທີ່ຍອມຮັບທັງພາຍໃນ ແລະ ສາກົນ, ສາມາດດຶງດູດການລົງທຶນໃຫ້ນັບມື້ນັບຫຼາຍຂຶ້ນ, ຊ່ວຍສ້າງວຽກເຮັດງານທໍາ, ສ້າງລາຍຮັບເປັນກ້າວໆ. ທັງນີ້, ກໍເພຶ່ອແນໃສ່ສ້າງໂອກາດ ແລະ ເອື້ອອຳນວຍຄວາມສະດວກໃຫ້ຜູ້ຊອກວຽກເຮັດງານທຳ ລແລະ ບັນດາຫົວໜ່ວຍແຮງງານ ໄດ້ມີເວທີພົບປະກັນແລ້ວນຳໄປສູ່ການຈັດຫາງານ.

ໂດຍ: ຂ່າວສານແຮງງານ ແລະ ສະຫວັດດີການສັງຄົມ 

Post a Comment

0 Comments