ພິທີເປີດຝຶກອົບຮົມໄລຍະສັ້ນ ວຽກງານວິຊາສະເພາະສຳມະໂນຄົວ ແລະ ປກສ ກຸ່ມບ້ານ ປະຈຳປີ 2020




     ໃນວັນທີ 10 ກຸມພາ 2020 ຢູ່ກອງບັນຊາການ ປກສ ນະຄອນຫລວງ ຈັດພິທີເປີດຝຶກອົບຮົມໄລຍະສັ້ນ ວຽກງານວິຊາສະເພາະສຳມະໂນຄົວ ແລະ ປກສ ກຸ່ມບ້ານ ທົ່ວກອງບັນຊາການ ປກສ ນະຄອນຫລວງວຽງຈັນ ປະຈຳປີ 2020 ຂື້ນ, ເຂົ້າຮ່ວມເປັນປະທານໂດຍ ທ່ານ ພົຈວ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະກໍ່ສ້າງຮາກຖານ ມີຮອງກອງບັນຊາການ ປກສ ນະຄອນຫລວງ, ຫົວໜ້າ, ຮອງຫົວໜ້າຫ້ອງການຄຸ້ມຄອງສຳມະໂນຄົວ ແລະກໍ່ສ້າງຮາກຖານ, ຄູ ອາຈານ ແລະສຳມະນາກອນ ເຂົ້າຮ່ວມ.



    ຈຸດປະສົງຂອງການເປີດຝຶກອົບຮົມໄລຍະສັ້ນ ໃນຄັ້ງນີ້ແມ່ນການຍົກລະດັບຄວາມຮູ້, ຄວາມສາມາດທາງດ້ານທິດສະດີ ແລະພຶດຕິກຳຂອງສຳມະນາກອນໃຫ້ສູງຂື້ນ ແລະປັດໄຈສຳຄັນຄືການແລກປ່ຽນບົດຮຽນ ລະຫວ່າງ ຄູ ອາຈານ ເພື່ອພ້ອມກັນຊອກໃຫ້ເຫັນດ້ານດີ, ຈຸດບົກຜ່ອງ ຂອງການແກ້ໄຂວຽກງານໃນໄລຍະຜ່ານມາ ພ້ອມກັນຊອກຫາວິທີທາງ, ທິດທາງແກ້ໄຂ ເພື່ອເຮັດໃຫ້ການຈັດຕັ້ງເຄື່ອນໄຫວວຽກງານຄຸ້ມຄອງສຳມະໂນຄົວ ໃຫ້ມີຄວາມເປັນເອກະພາບ ແລະໄດ້ຮັບການປັບປຸງທາງດ້ານຄຸນນະພາບໃຫ້ສູງຂື້ນ ແລະທັງເປັນການຢັບຢັ້ງຫາງສຽງທີ່ບໍ່ດີຂອງສັງຄົມຕໍ່ກັບວຽກງານນີ້.



    ເນື້ອໃນເອກະສານທີ່ນຳມາຝຶກອົບຮົມຄັ້ງນີ້ ແມ່ນພື້ນຖານການສ້າງບ້ານ ປ້ອງກັນຄວາມສະຫງົບ, ເອກະສານກ່ຽວກັບວຽກງານສາມສ້າງ, ບົດແນະນຳ ເລກທີ 4164/ຄກຖ ຂອງກົມຄຸ້ມຄອງສຳມະໂນຄົວ ແລະກໍ່ສ້າງຮາກຖານ ກ່ຽວກັບການປັບປຸງກຳລັງ ປກສ ບ້ານ, ຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກຳລັງ ປກສ ກຸ່ມບ້ານ ແລະ ປກສ ບ້ານ, ຂໍ້ຕົກລົງ ເລກທີ 655/ປກສ ວ່າດ້ວຍການຈົດທະບຽນຄຸ້ມຄອງສຳມະໂນຄົວລາວ ແລະຕ່າງດ້າວ, ຂໍ້ຕົກລົງເລກທີ 653/ປກສ ວ່າດ້ວຍການຄຸ້ມຄອງອາຊີບ-ພາຫະນະພິເສດ, ຂໍ້ຕົກລົງວ່າດ້ວຍການສ້າງບ້ານປ້ອງກັນຄວາມສະຫງົບດີ, ເອກະສານວຽກງານສືບສວນ-ສອບສວນຂັ້ນພື້ນຖານ ແລະປ້ອງກັນສະຖານທີ່ເກີດເຫດ, ເອກະສານຄວາມຮູ້ພື້ນຖານກ່ຽວກັບການຄຸ້ມຄອງເປົ້າໝາຍ ແລະຂໍ້ຕົກລົງວ່າດ້ວຍການຈົດທະບຽນປະຫວັດ ແລະອອກບັດປະຈຳຕົວໃຫ້ພົນລະເມືອງລາວ, ຄົນຕ່າງດ້າວ ໂດຍມີສຳມະນາກອນ ເຂົ້າຮ່ວມ 103 ສະຫາຍ, ຍິງ 8 ສະຫາຍ ຊຶ່ງຈະໄດ້ດຳເນີນການຝຶກອົບຮົມ ໄປເປັນເວລາ 05 ວັນ.

ຂ່າວ: ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ

Post a Comment

0 Comments