ສະພາປະຊາຊົນແຂວງຫຼວງພະບາງ ຊຸດທີ I ໄດ້ໄຂກອງປະຊຸມສະໄໝສາມັນ ເທື່ອທີ 8 ຂຶ້ນຢ່າງເປັນທາງການ



ວັນທີ່ 4 ກຸມພາ 2020 ນີ້ ສະພາປະຊາຊົນແຂວງຫຼວງພະບາງ ຊຸດທີ I ໄດ້ໄຂກອງປະຊຸມສະໄໝສາມັນ ເທື່ອທີ 8 ຂຶ້ນຢ່າງເປັນທາງການ ໂດຍເປັນປະທານຂອງ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົນແຂວງ, ມີ ທ່ານ ນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 6 ແຂວງຫຼວງພະບາງ, ທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ, ພ້ອມດ້ວຍສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ອາດິດສະມາຊິກສະພາແຫ່ງຊາດ, ອາດິິດການນຳຂອງແຂວງ ແລະຫົວໜ້າພະແນກການ-ກົມກອງອ້ມຂ້າງແຂວງເຂົ້າຮ່ວມ. ທ່ານ ສາຍສະໝອນ ຄົມທະວົງ ກ່າວເປີດກອງປະຊຸມວ່າ: 


ປີຜ່ານມາແຂວງຫຼວງພະບາງໄດ້ຮັບຜົນກະທົບທາງດ້ານເສດຖະກິດ-ສັງຄົມ ຫຼາຍດ້ານ ແຕ່ອົງການປົກຄອງທຸກຂັ້ນ ແລະປະຊາຊົນບັນດາເຜົ່າ ພາຍໃນແຂວງໄດ້ສຸມໃສ່ປະຕິບັດແຜນພັດທະນາເສດຖະກິດ-ສັງຄົມ ກໍ່ຄືມະຕິກອງປະຊຸມສະໄໝສາມັນເທື່ອທີ່ 6 ແລະ 7 ຂອງສະພາປະຊາຊົນແຂວງ ເຊີ່ງໄດ້ຮັບຜົນສຳເລັດຫຼາຍດ້ານ ອັນເປັນພື້ນຖານເຮັດໃຫ້ເສດຖະກິດມີການຂະຫຍາຍຕົວຕໍ່ເນື່ອງໃນລະດັບ 7,7%, ໃນລະຫວ່າງການດຳເນີນກອງປະຊຸມຄັ້ງນີ້ ຈະໄດ້ມີການຄົ້ນຄວ້າ ແລະຮັບຮອງເອົາບັນຫາສຳຄັນຂອງແຂວງຫຼາຍດ້ານ, ກອງປະຊຸມຄັ້ງນີ້ ຈະດຳເນີນແຕ່ວັນທີ່ 4 ຫາ 7 ກຸມພາ


 ໃນນັ້ນ ຈະຮັບຟັງການລາຍງານໂດຍສັງເຂບ ກ່ຽວກັບການບໍລິຫານວຽກງານຂອງອົງການປົກຄອງແຂວງ ປະຈໍາປີ 2019 ແລະ ທິດທາງແຜນການ ປີ 2020 ຈາກທ່ານເຈົ້າແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິປະບັດແຜນພັດທະນາເສດຖະກິດ-ສັງຄົມ ຂອງແຂວງຫຼວງພະບາງ ປະຈຳປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າພະແນກແຜນການ ແລະ ການລົງທຶນແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດແຜນງົບປະມານ ຂອງແຂວງຫຼວງພະບາງ ປະຈໍາປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າພະແນກການເງິນແຂວງ, 


ຮັບຟັງການລາຍງານ ກ່ຽວກັບການເຄື່ອນໄຫວວຽກງານກວດສອບ ປະຈຳປີ 2019, ທິດທາງແຜນການ ປີ 2020 ແລະ ບົດສະຫຼຸບຂາດຕົວການຈັດຕັ້ງປະຕິບັດງົບປະມານ ປະຈຳປີ 2018 ຈາກປະທານອົງການກວດສອບປະຈຳພາກເໜືອ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດການແກ້ໄຂຜົນການກວດສອບ ຈາກປະທານອົງການກວດກາລັດແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດການສົ່ງເສີມການປູກພືດສະບຽງອາຫານໃຫ້ກາຍເປັນສິນຄ້າ,  ຮັບຟັງການລາຍງານ ກ່ຽວກັບການຈັດຕັ້ງປະຕິບັດມະຕິວ່າດ້ວຍການຄຸ້ມຄອງລາຄາສິນຄ້າປະເພດເຄື່ອງບໍລິໂພກ, ຮັບຟັງການລາຍງານ ກ່ຽວກັບການຈັດສັນທີ່ຢູ່ອາໄສ, ອາຊີບຄົງທີ່ ແລະ ການຊົດເຊີຍຕ່າງໆ ໃຫ້ປະຊາຊົນທີ່ຖືກຜົນກະທົບຈາກໂຄງການພັດທະນາຕ່າງໆ ຈາກທ່ານຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, 


ຮັບຟັງການລາຍງານ ກ່ຽວກັບການຈັດຕັ້ງປະຕິບັດມະຕິກອງປະຊຸມຂອງສະພາປະຊາຊົນແຂວງ ວ່າດ້ວຍການຄຸ້ມຄອງ ຄວາມເປັນລະບຽບຮຽບຮ້ອຍຢູ່ນະຄອນຫຼວງພະບາງ ຈາກເຈົ້ານະຄອນຫຼວງພະບາງ, ຮັບຟັງການລາຍງານ ກ່ຽວກັບຜົນການຈັດຕັ້ງປະຕິບັດການແກ້ໄຂບັນຫາອັດຕາປະລະຂອງນັກຮຽນມັດທະຍົມຕອນຕົ້ນ-ຕອນປາຍ ປີ 2019 ແລະ ຍົກສູງຄຸນນະພາບການສຶກສາແຕ່ລະຊັ້ນຮຽນ ປີ 2020 ຈາກຫົວໜ້າພະແນກສຶກສາທິການ ແລະ ກິລາແຂວງ,


 ຮັບຟັງການລາຍງານ ກ່ຽວກັບການຈັດຕັ້ງປະຕິບັດການຄຸ້ມຄອງຄົນເຂົ້າ-ອອກເມືອງ ຂອງຄົນຕ່າງປະເທດ ພາຍໃນແຂວງຫຼວງພະບາງ ປະຈຳປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າກອງບັນຊາການປ້ອງກັນຄວາມສະຫງົບແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງອົງການໄອຍະການປະຊາຊົນແຂວງ ຈາກທ່ານຫົວໜ້າອົງການໄອຍະການປະຊາຊົນແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງສານປະຊາຊົນແຂວງ ຈາກປະທານສານປະຊາຊົນແຂວງ, ຮັບຟັງການລາຍງານ ການເຄື່ອນໄຫວວຽກງານ ປະຈໍາປີ 2019 ແລະທິດທາງແຜນການ ປີ 2020 ຂອງຄະນະປະຈຳສະພາປະຊາຊົນແຂວງ ແລະຈະມີການປະກອບຄຳເຫັນຈາກຫຼາຍພາກສ່ວນ ທັງພິຈາລະນາ ແລະ ຮັບຮອງເອົາ ການສະເໜີແຕ່ງຕັ້ງບຸກຄະລາກອນຂອງແຂວງ ຈຳນວນໜື່ງ, ພ້ອມນີ້ ຈະມີການຮັບຟັງ ແລະຊີ້ແຈງ ຂອງບັນດາພະແນກການ ຕໍ່ຂໍ້ຊັກຖາມຂອງສະມາຊິກສະພາປະຊາຊົນແຂວງ ຕື່ມອີກ.

ພາບແລະຂ່າວ: ອາພຸດເດດ ບຸບຜາ

Post a Comment

0 Comments