ເປີດດ່ານສາກົນ ປາງມອນ ຢ່າງເປັນທາງການ



  ພິທີເປີດດ່ານປາງມອນ ເມືອງຄອບ ແຂວງ ໄຊຍະບູລີ ໄດ້ຈັດຂຶ້ນ ຢ່າງເປັນທາງການ ໃນຕອນເຊົ້າຂອງວັນທີ 1 ກຸມພາ 2020, ໂດຍການໃຫ້ກຽດເຂົ້າຮ່ວມຂອງ ທ່ານ ທອງສະຫວັນ ພົມວິຫານ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ, ມີທ່ານ ຍັນຍົງ ສີປະເສີດ ຮອງເຈົ້າແຂວງ ໆ ໄຊຍະບູລີ ພ້ອມດ້ວຍຄະນະ; ທ່ານ ກະມົນ ຊຽງວົງ ເຈົ້າແຂວງໆ ພະເຍົາ ລາຊະອານາຈັກໄທ ພ້ອມດ້ວຍພັນລະຍາ ແລະ ຄະນະ ພ້ອມດ້ວຍແຂກທີ່ຖືກເຊີນທັງຝ່າຍລາວ, ໄທ ແລະ ຕ່າງປະເທດເຂົ້າຮ່ວມ.


    ໃນພິທີດັ່ງກ່າວ ທ່ານ ຍັນຍົງ ສີປະເສີດ ຮອງເຈົ້າແຂວງໆ ໄຊຍະບູລີໄດ້ກ່າວຕ້ອນຮັບ ພ້ອມທັງລາຍງານປະຫວັດຄວາມເປັນມາຂອງດ່ານໂດຍສັງເຂບ. ດ່ານປາງມອນ ເມືອງ ຄອບ ແຂວງ ໄຊຍະບູລີ ຂອງສາທາລະນະລັດ ປະຊາທິປະໄຕ ປະຊາຊົນລາວ ຕັ້ງຢູ່ເຊິ່ງໜ້າກັບດ່ານ ບ້ານ ຮວກ ເມືອງພູຊາງ ແຂວງ ພະເຍົາ ລາຊະອານຈັກໄທ ເປັນດິນຕໍ່ແຜນ ທີ່ມີເສັ້ນທາງເຊື່ອມຕໍ່ກັນ. ໃນວັນທີ 30 ພະຈິກ 1992 ລັດຖະບານສາທາລະນະລັດ ປະຊາທິປະໄຕ ປະຊາຊົນລາວ ໄດ້ເຫັນດີອະນຸມັດ ໃຫ້ເປີດເປັນດ່ານປະເພນີປາງມອນ ເພື່ອອຳນວຍຄວາມສະດວກໃນການໄປມາຫາສູ່ກັນ ແລະ ແລກປ່ຽນສິນຄ້າ ລະຫວ່າງ ປະຊາຊົນຊາວເມືອງຄອບ ແຂວງ ໄຊຍະບູລີສາທາລະນະລັດ ປະຊາທິປະໄຕ ປະຊາຊົນລາວ  ແລະ ເມືອງ ພູຊາງ ເມືອງ ຊຽງຄຳ ແຂວງ ພະເຍົາ ລາຊະອານາຈັກໄທ.


     ມາຮອດປີ 2015 – 2016 ລັດຖະບານສາທາລະນະລັດ ປະຊາທິປະໄຕ ປະຊາຊົນລາວ ໄດ້ສ້າງເສັ້ນທາງເຊື່ອມຕໍ່ລະຫວ່າງຊາດ  ແລະ ສຳເລັດການກໍ່ສ້າງພື້ນຖານໂຄງລ່າງ ຂອງດ່ານປາງມອນ ຕາມການອະນຸມັດຂອງກະຊວງໂຍທາທິການ ແລະ ຂົນສົ່ງ ເພື່ອເຮັດໃຫ້ມີຄວາມສະດວກ ໃນການພົວພັນຮ່ວມມືທາງດ້ານການຄ້າ, ການລົງທຶນ ແລະ ການທ່ອງທ່ຽວ ຂອງສອງແຂວງ  ໄຊຍະບູລີ ກັບ ແຂວງ ພະເຍົາ ກໍ່ຄື ສາທາລະນະລັດ ປະຊາທິປະໄຕ ປະຊາຊົນລາວ ກັບ ລາຊະອານາຈັກໄທ ໃຫ້ນັບມື້ມີການຂະຫຍາຍຕົວ ແລະ ເພີ່ມຂຶ້ນເລື້ອຍໆ ແລະ ເປັນການຮອງຮັບໃຫ້ແກ່ການເປັນປະຊາຄົມເສດຖະກິດອາຊຽນ.


     ການຍົກລະດັບຈາກດ່ານປະເພນີ ເປັນດ່ານສາກົນປາງມອນ ເມືອງ ຄອບ ແຂວງ ໄຊຍະບູລີ ເພາະຈຸດດັ່ງກ່າວນີ້ ມີທີຕັ້ງຍຸດທະສາດ ທາງດ້ານການບໍລິການທາງຜ່ານ ແລະ ການຄ້າໃນລະດັບອະນຸພາກພື້ນ, ເປັນປະຕູດ່ານເຊື່ອມໂຍງລະບຽງເສດຖະກິດລະຫວ່າງ 8 ແຂວງພາກເໜືອ ສາທາລະນະລັດ ປະຊາທິປະໄຕ ປະຊາຊົນລາວ ຫາພາກເໜືອຕອນເທິງ ຂອງລາຊະອານາຈັກໄທ ( ນະຄອນຊຽງໃໝ່ ), ທັງຍັງເປັນແລວທາງເຊື່ອມຕໍ່ລະຫວ່າງ ພາກເໜືອຕອນເທິງ ຂອງລາຊະອານາຈັກໄທ ກັບ ເມືອງມໍລະດົກໂລກຫລວງພະບາງ ເຊິ່ງຈະເຮັດການພົວພັນທາງດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງສອງແຂວງ ແລະ ແຂວງ ໃກ້ຄຽງຂອງສອງປະເທດ ມີຄວາມສະດວກຂຶ້ນກວ່າເກົ່າ ເຊິ່ງບໍ່ພຽງແຕ່ຈະນຳເອົາຜົນປະໂຫຍດມາສູ່ແຂວງ ໄຊຍະບູລີເທົ່ານັ້ນ, ແຕ່ຍັງປະກອບສ່ວນເຂົ້າໃນການພັດທະນາລວມຂອງປະເທດຊາດ ເພື່ອບັນລຸແຜນຍຸດທະສາດ ໃນການລຶບລ້າງຄວາມທຸກຍາກ ແລະ ຫລຸດພົ້ນອອກຈາກຖານະພາບດ້ອຍພັດທະນາອີກດ້ວຍ.


   ໂອກາດດຽວກັນນີ້, ທ່ານ ທອງສະຫວັນ ພົມວິຫານ ຮອງລັດຖະມົນຕີ ກະຊວງການຕ່າງປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ກໍ່ໄດ້ໃຫ້ກຽດກ່າວປາໄສເປີດດ່ານສາກົນປາງມອນຢ່າງເປັນທາງການ  ພ້ອມທັງລັ່ນຄ້ອງ 9 ບາດ ແລະ ຮ່ວມປ່ອຍໝາກປຸ່ມເປົ່າຂຶ້ນສູ່ທ້ອງຟ້າ ເພື່ອເປັນສິລິມຸງຄຸນ.
          

 ຂ່າວ: ທອງແກ້ວ

Post a Comment

0 Comments