ບ້ານຊ້ອງໃຕ້ ມີນ້ຳລິນ ແລະ ວິດຖ່າຍຊົມໃຊ້ແລ້ວ



ມອບ - ຮັບ ຢ່າງເປັນທາງການສໍາລັບໂຄງການກໍ່ສ້າງນໍ້າລິນຢູ່ບ້ານຊ້ອງໃຕ້ ໜ່ວຍນາສານ ເມືອງ ຈອມເພັດ ແຂວງຫຼວງພະບາງ ພາຍຫຼັງທີ່ດຳເນີນມາແຕ່ວັນທີ່ 25 ພະຈິກ 2018 ພິທີດັ່ງກ່າວໄດ້ຈັດຂຶ້ນໃນວັນທີ 7 ກຸມພາ 2020 ທີ່ຫ້ອງປະຊຸມບ້ານຊ້ອງໃຕ້ ໂດຍການເຂົ້າຮ່ວມຂອງທ່ານ ນາງ ສົມສະໝອນ ຄຳສຸກສະຫວັດ ປະທານແນວລາວສ້າງຊາດເມືອງ,ມີພະນັກງານ, ວິຊາການ, ອົງການຈັກຕັ້ງບ້ານ, ປະຊາຊົນພາຍໃນບ້ານ ແລະ ແຂກຖືກເຊີນເຂົ້າຮ່ວມ. 




ບ້ານຊ້ອງໃຕ້ ໜ່ວຍນາສານ ເປັນບ້ານຊົນເຜົ່າມົ້ງ ມີທັງໝົດ 30 ຄອບຄົວມີປະຊາກອນ 231ຄົນ, ຍິງ 105 ຄົນ, ໂຄງການກໍ່ສ້າງນ້ຳລິນ ແລະ ວິດຖ່າຍ ຄັ້ງນີ້ໄດ້ແບ່ງອອກເປັນ 2 ໄລຍະຄື: ໄລຍະທີ 1 ເລີ່ມລົງມືປະຕິບັດມາແຕ່ວັນທີ 25 ພະຈິກ 2018 ຫາ ວັນທີ20 ມີນາ 2018 ເປັນການກໍ່ສ້າງນ້ຳລິນ ແລະ ໄລຍະທີ 2 ໄດ້ເລີ່ມລົງມືມາແຕ່ວັນທີ 17 ພະຈິກ 2019 ຫາວັນທີ 25 ມັງກອນ 2020 ເປັນຊ່ວງການກໍ່ສ້າງວິຖ່າຍ ມາຮອດປັດຈຸບັນແມ່ນສຳເລັດແລ້ວ 100% 




ໂຄງການດັ່ງກ່າວໄດ້ຮັບການຊ່ວຍເຫຼືອສົບທົບລະຫວ່າງບ້ານຊ້ອງໃຕ້ ໜ່ວຍນາສານ ກັບ ບໍລິສັດອາສາສະມັກທ່ອງທ່ຽວຈາກ ປະເທດອົດສະຕາລີ ແລະ ໂຄງການ ລາວຝຣັ່ງເດເຊີນ, ກິດຈະກຳການກໍ່ສ້າງປະກອບມີ: ກໍ່ສ້າງອຸ່ງເກັບນ້ຳຂະໜາດ 4×4×2ແມັດ 1ອຸ່ງ, ເດີນສາຍທໍ່ນ້ຳແຕ່ຫົວງານຫາອຸ່ງເກັບນ້ຳຄວາມຍາວ 1700 ແມັດ, ແຈກກ໋ອກນ້ຳ 3ກ໋ອກ, ກໍ່ສ້າງຫົວງານ1ຈຸດຄວາມກວ້າງ 13ແມັດ, ກໍ່ສ້າງວິຖ່າຍ 30ວິດໃນນັ້ນ,ກໍ່ດ້ວຍດິນບ໋ອກ 19 ຫຼັງ ແລະ ກໍ່ດ້ວຍແທ໋ງ 11ຫຼັງເຊິ່ງມີມູນຄ່າທັງໝົດ 281.167.000 ກີບ,ໃນນັ້ນໂຄງການຊ່ວຍເຫຼືອ 198.667.000 ກີບ ແລະ ບ້ານສົມທົບທຶນ 82. 500.000 ກີບ.

ຈາກນັ້ນ ທ່ານ ນາງ ຂັນທະລີ ປະທານໂຄງການ ກໍ່ສ້າງນ້ຳລິນແລະ ວິດຖ່າຍຢູ່ບ້ານຊ້ອງໃຕ້ໜ່ວຍນາສານໄດ້ຂຶ້ນມອບໂຄງການດັ່ງກ່າວໃຫ້ເມືອງຄຸມຄອງ ແລະ ເມືອງໄດ້ມອບຕໍ່ໃຫ້ບ້ານ ຊົມໃຊ້ຕໍ່ໄປ. 

ຂ່າວ: ເມືອງ ຈອມເພັດ

Post a Comment

0 Comments