ເຈົ້າແຂວງເຊກອງ ປະດັບຫລຽນໄຊແຮງງານ ໃຫ້ ສະຫາຍ ປອ ວິໄລວົງ ບຸດດາຄຳ



ຂ່າວ: ພຸດທະສອນ 
     ໂດຍໄດ້ຮັບການມອບໝາຍຈາກນາຍົກລັດຖະມົນຕີແຫ່ງ ສປປ ລາວ, ໃຫ້ແຂວງເຊກອງ ຕາງໜ້າພັກ-ລັດ ຈັດພິທີປະດັບຫລຽນໄຊແຮງງານຊັ້ນ 2 ໃຫ້ແກ່ບຸກຄົນທີ່ມີຜົນງານໃນການປະກອບສ່ວນພັດທະນາເສດຖະກິດ-ສັງຄົມຂອງແຂວງເຊກອງ ມາໃນວັນທີ 31 ມັງກອນ 2020 ທີ່ຫ້ອງປະຊຸມຊັ້ນ3 ຫ້ອງວ່າການແຂວງ, ສະຫາຍ ຄໍາເຜີຍ ບຸດດາວຽງ , ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ຕາງຫນ້າໃຫ້ລັດຖະບານລາວ ປະດັບຫລຽນໄຊແຮງງານ ຊັ້ນII ໃຫ້ແກ່ ສະຫາຍ ປອ ວິໄລວົງ ບຸດດາຄໍາ ກຳມະການສູນກາງພັກ, ຄະນະປະຈໍາສະພາແຫ່ງຊາດ ເຂດເລືອກຕັ້ງທີ 16 ແຂວງເຊກອງ ທີ່ມີຜົນງານດີເດັ່ນ ປະກອບສ່ວນຂົນຂວາຍທຶນຮອນ ຢູ່ພາຍໃນ ແລະຕ່າງປະເທດ ເຂົ້າໃນການພັດທະນາເສດຖະກິດ-ສັງຄົມ ແຂວງເຊກອງ ໃນໄລຍະຜ່ານມາ ລວມມູນຄ່າ 2 ຕື້ກວ່າກີບ.
   

ການປະດັບຫລຽນໄຊແຮງງານ ໃຫ້ແກ່ບຸກຄົນດີເດັ່ນໃນຄັ້ງນີ້ ແມ່ນໄດ້ຈັດຂຶ້ນໃນທ່າມກາງບັນຍາກາດຊົມເຊີຍກອງປະຊຸມສະໄຫມສາມັນເທື່ອທີ8 ສະພາຊາຊົນແຂວງເຊກອງ ຊຸດທີI ຊຶ່ງມີຄວາມໝາຍ, ຄວາມສໍາຄັນຢ່າງຍິ່ງ, ທັງເປັນການປະກອບສ່ວນເຂົ້າໃນການເພີ່ມພູນຄູນສ້າງ, ການພັດທະນາເສດຖະກິດ-ສັງຄົມຂອງແຂວງເຊກອງ ຢ່າງຫລວງຫລາຍ.

ຂ່າວເຊກອງ

Post a Comment

0 Comments