ຄະນະບໍລິຫານງານຊາວໜຸ່ມກະຊວງການເງິນດຳເນີນກອງປະຊຸມໃຫຍ່ ຄັ້ງທີ IV



ໃນວັນທີ 5 ກຸມພາ 2020 ທີ່ຫ້ອງປະຊຸມກົມສ່ວຍສາອາກອນ, ຄະນະບໍລິຫານງານຊາວ ໜຸ່ມກະຊວງການເງິນ, ໄດ້ດຳເນີນກອງປະຊຸມໃຫຍ່ຜູ້ແທນຊາວໜຸ່ມກະຊວງການເງິນ ຄັ້ງທີ IV.
ໂດຍການເປັນກຽດເຂົ້າຮ່ວມເປັນປະທານຂອງສະຫາຍ ສົມດີ ດວງດີ ກໍາມະການສູນກາງພັກ ເລຂາຄະນະພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີສະຫາຍ ບຸນຕາ ເທບພະວົງ ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ມີສະຫາຍ ພູເຂົາຄຳ ວັນນະວົງໄຊ ເລຂາຄະນະບໍລິຫານງານຊາວໜຸ່ມກະຊວງການເງິນ, ມີທ່ານປະທານສະຫະພັນກຳມະບານກະຊວງການເງິນ, ເລຂາຄະນະບໍລິຫານງານສະຫະ ພັນແມ່ຍິງກະຊວງການເງິນ, ມີເລຂາຊາວໜຸ່ມບັນດາກົມອ້ອມຂ້າງກະຊວງ, ວິສາຫະກິດທີ່ຂຶ້ນກັບ, ພ້ອມດ້ວຍແຂກຖືກເຊີນເຂົ້າຮ່ວມ.




ກອງປະຊຸມໃຫຍ່ຜູ້ແທນຊາວໜຸ່ມກະຊວງການເງິນ ຄັ້ງທີ IV ໄດ້ໄຂຂຶ້ນໃນທ່າມກາງທີ່ບັນຍາກາດທົ່ວພັກ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດເວົ້າລວມເວົ້າສະເພາະກະຊວງການເງິນກໍ່ຄືພະນັກງານ, ສະມາ ຊິກຊາວໜຸ່ມທົ່ວກະຊວງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກຄັ້ງທີ X ຂອງພັກ, ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VII, ມະຕິກອງປະຊຸມໃຫຍ່ອົງຄະນະພັກກະຊວງການເງິນ ຄັ້ງທີ III, ມະຕິກອງປະຊຸມໃຫຍ່ຜູ້ແທນຊາວໜຸ່ມກະຊວງການເງິນ ຄັ້ງທີ III, ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII ກໍຄືແຜນງົບປະມານແຫ່ງລັດ 5 ປີ ຄັ້ງທີ VIII. 



ພ້ອມດຽວກັນນີ້, ຍັງເປັນການສ້າງຜົນງານຂໍ່ານັບຮັບຕ້ອນວັນປະຫວັດສາດສໍາຄັນຂອງຊາດຂອງພັກຂອງຂະແໜງການຕ່າງໆຢ່າງເປັນຂະບວນການຟົດຟື້ນ ແລະ ກວ້າງຂວາງຄຽງຄູ່ກັບການສ້າງຂະບວນການຮັກຊາດ ແລະ ພັດ ທະນາບົນພື້ນຖານຂໍ້ແຂ່ງຂັນ 4 ບຸກຂອງຊາວໜຸ່ມປະຊາຊົນ ປະຕິວັດລາວ.
ໃນກອງປະຊຸມໃຫຍ່ຜູ້ແທນຊາວໜຸ່ມກະຊວງການເງິນ ຄັ້ງທີ IV ໄດ້ພ້ອມກັນສະຫຼຸບຕີລາຄາຄືນດ້ານດີ ດ້ານອ່ອນຂໍ້ຄົງຄ້າງ ບັນດາສາເຫດທີ່ພາໃຫ້ມີຂໍ້ຄົງຄ້າງໃນການຈັດຕັ້ງປະຕິບັດວຽກງານຂອງຄະນະບໍລິຫານງານຊາວໜຸ່ມກະ ຊວງການເງິນໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.



ໃນກອງປະຊຸມໃຫຍ່ຜູ້ແທນຊາວໜຸ່ມກະຊວງການເງິນ ຄັ້ງທີ IV ຮັບການໂອ້ລົມຂອງສະຫາຍ ບຸນຕາ ເທບພະວົງ ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ ແລະ ສະຫາຍ ສົມດີ ດວງດີ ກໍາມະການສູນກາງພັກ ເລຂາຄະນະພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ເພື່ອນໍາໄປຈັດຕັ້ງປະຕິບັດເພາະຊາວໜຸ່ມຈະກາຍເປັນກໍາລັງແຮງປະກອບສ່ວນຈັດຕັ້ງປະຕິບັດວຽກງານການເງິນໃນຊຸມປີຕໍ່ໜ້າໄດ້ຮັບຜົນສໍາເລັດຢ່າງຈົບງາມ ແລະ ເຮັດໃຫ້ການຈັດຕັ້ງວິໄສທັດ ແລະ ຍຸດທະສາດພັດທະນາການເງິນແຫ່ງລັດສາມາດບັນລຸໄດ້ຕາມຄາດໝາຍທີ່ວາງໄວ້.

ພ້ອມນັ້ນ,ກອງປະຊຸມຍັງໄດ້ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມກະຊວງການເງິນຊຸດໃໝ່, ເພື່ອສືບຕໍ່ຊີ້ນຳ-ນຳພາການຈັດຕັ້ງປະຕິບັດແຜນວຽກຂອງຊາວໜຸ່ມກະຊວງການເງິນຕາມແຜນການທີ່ກຳນົດໄວ້.

ສ່ວນເນື້ອໃນ ແລະ ລາຍລະອຽດໃນແຕ່ລະວາລະສາມາດຕິດຕາມໄດ້ທາງໜັງສືພິມ ການເງິນ ລາຍສັບປະດາ, ລາຍການໂທລະພາບ “ການເງິນແຫ່ງລັດ” ໃນແລງວັນສຸກເວລາ 20:30-21:00 ໂມງ ແລະ ເຊົ້າວັນເສົາເວລາ 7:00-7:30 ໂມງອອກທາງຊ່ອງໂທລະພາບ ປກສ ແລະ ລາຍການວິທະຍຸ “ການເງິນແຫ່ງລັດ’’; ວັນພະຫັດ ແລະ ວັນເສົາ, ເວລາ 12:30-13:00 ໂມງ, ທາງວິທະຍຸກະຊວງ ປກສ ຄື້ນຄວາມຖີ່ 101,5 MHZ ແລະ ທາງ Page Facebook ກະຊວງການເງິນ, ທີ່ເປັນກະບອກສຽງໃຫ້ແກ່ຂະແໜງການເງິນ.

Post a Comment

0 Comments