ທາງການສິງກະໂປເລັ່ງເສີມຕຽງ ໃຊ້ຫຸ່ນຍົນ, ເພື່ອຊ່ວຍຮອງຮັບຜູ້ຕິດເຊື້ອໂຄວິດ-19 ຢູ່ພາຍໃນປະເທດທີ່ເພີ່ມຈຳນວນຂຶ້ນສູງ




ໃນວັນທີ 26 ເມສາ 2020 ສິງກະໂປປະເທດນ້ອຍໆ ທີ່ມີປະຊາກອນປະມານ 5.7 ລ້ານຄົນ ຍັງພົບກັບບັນຫາຕົວເລກຜູ້ຕິດເຊື້ອໂຄວິດ-19 ທີ່ເພີ່ມຂຶ້ນບໍ່ຢຸດ ໂດຍມີຍອດຜູ້ຕິດເຊື້ອຢ່າງເປັນທາງການແລ້ວກວ່າ 12,000 ຄົນ ໃນຈຳນວນນີ້ເປັນແຮງງານຕ່າງຊາດຫລາຍເຖິງຮ້ອຍລະ 80 ຂອງຜູ້ປ່ວຍທັງໝົດ ຫຼັງຈາກພົບການລະບາດເປັນວົງກວ້າງໃນກຸ່ມແຮງງານຕ່າງດ້າວ ຈົນເຮັດໃຫ້ສິງກະໂປກາຍເປັນອີກໜຶ່ງປະເທດໃນເອເຊຍທີ່ມີຜູ້ຕິດເຊື້ອສູງສຸດເປັນອັນດັບຕົ້ນໆ ຮອງຈາກຈີນ ອິນເດຍ ຍີ່ປຸ່ນ ແລະ ປາກີສະຖານ ຢ່າງໃດກໍຕາມ ແມ່ນຈະພົບຜູ້ຕິດເຊື້ອຫຼັກໝື່ນ ແຕ່ຈຳນວນຜູ້ເສຍຊີວິດຖືວ່າຍັງຢູ່ໃນອັດຕາທີ່ຕ່ຳ ໂດຍມີຜູ້ເສຍຊີວິດພຽງ 12 ຄົນເທົ່ານັ້ນ





ສູນສະແດງສິນຄ້າຊາງຮີ ເປັນໜຶ່ງໃນສະຖານທີ່ທີ່ຖືກດັດແປງໃຫ້ເປັນໂຮງໝໍຊົ່ວຄາວ. ໂດຍໃຊ້ເວລາໃນການຈັດຕຽມສະຖານທີ່ ແລະ ອຸປະກອນຈຳເປັນ 6 ມື້ ກໍສາມາດເປີດໃຫ້ບໍລິການໄດ້ທັນທີ ໂດຍມີຕຽງຮອງຮັບຜູ້ປ່ວຍທີ່ມີອາການບໍ່ຮຸນແຮງ 2,700 ຕຽງ ແລະ ຂະຫຍາຍພື້ນທີ່ກາງແຈ້ງເພື່ອເສີມຕຽງໄດ້ອີກ 1,700 ຕຽງ ໂດຍແຕ່ລະຫ້ອງຈະຖືກແບ່ງພື້ນທີ່ດ້ວຍສາກກັ້ນ ມີຕູ້ເກັບເຄື່ອງພລາດຕິກ ແລະ ພັດລົມຈັດຕຽມໄວ້ໃຫ້ຜູ້ປ່ວຍ ໂດຍຂະນະນີ້ມີຜູ້ປ່ວຍຊາວບັງກະລາເທດ ແລະ ອິນເດຍເຂົ້າມາຮັບການຮັກສາເປັນກຸ່ມທໍາອິດ




ນອກ​ຈາກ​ນີ້ ສູນ​ການ​ສະແດງ​ສິນ​ຄ້າ​ຊາງ​ຮີ​ຍັງ​ຖືກ​ແບ່ງ​ມາ​ໃຊ້​ເປັນ​ສະຖານ​ທີ່​ກັກ​ຕົວ​ຂອງ​ຜູ້​ຕ້ອງ​ສົງ​ໄສ​ຕິດ​ເຊື້ອ​ໂຄ​ວິດ​-19 ໂດຍ​ຫ້ອງ​ພັກ​ແຕ່​ລະ​ຫ້ອງ​ຈະ​ມີ​ເຄື່ອງ​ວັດແທກ​ຄວາມ​ດັນ​ເລືອດ ແລະ ອຸປະກອນ​ທາງ​ການ​ແພດ​ທີ່​ຈຳ​ເປັນ ເພື່ອ​ໃຫ້​ຄົນ​ໄຂ້​ສາມາດ​ກວດ​ສຸຂະພາບ​ເບື້ອງ​ຕົ້ນ​ຂອງ​ຕົນເອງ​ໄດ້​ມື້​ລະ 3 ເທື່ອ ແລະ​ ຍັງມີ​ຫຸ່ນ​ຍົນ​ທີ່​ບັງຄັບ​ດ້ວຍ​ຣີ​ໂມດ​ຄວບຄຸມ​ທີ່​ຈະ​ເຮັດ​ໜ້າທີ່​ສົ່ງ​ອາຫານ​ ແລະ ​ບໍລິການ​ປະ​ຊຸມ​ທາງ​ໄກຕິດ​ຕໍ່​ສື່​ສານ ເພື່ອ​ລຸດ​ການ​ສໍາ​ຜັດ​ໃກ້​ຊິດ​ກັບ​ເຈົ້າ​ຫນ້າທີ່ ນອກ​ຈາກ​ນີ້​ຍັງມີ​ຫຸ່ນ​ຍົນ​ໝາ​ສີ່​ຂາ ທີ່​ສາມາດ​ເຮັດ​ຫນ້າທີ່​ສົ່ງ​ຢາ​ແລະ ​ກວດ​ວັດ​ໄຂ້​ໃຫ້​ຄົນ​ໄຂ້​ໄດ້​ອີກ.

ໂດຍ​ນອກ​ຈາກ​ສູນ​ສະແດງ​ສິນ​ຄ້າ​ຊາງ​ຮີ​ແລ້ວ ຍັງມີ​ສູນ​ການ​ປະ​ຊຸມ ເອັກ​ຊ​​ໂປ ຄ້າຍ​ທະຫານ ສະໜາມ​ກີລາ ທ່າ​ເຮືອ​ທີ່​ຖືກ​ຕຽມ​ດັດ​ແປງ​ມາ​ໃຊ້ ເພື່ອ​ຮອງ​ຮັບ​ກັບ​ການ​ກັກ​ຕົວ ​ແລະ ​ຖືຮັກສາ​ອາການ​ຜູ້​ຕິດ​ເຊື້ອ​ໂຄ​ວິດ​-19 ອີກດ້ວຍ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments