ການແພ່ກະຈາຍຂອງໄວຣັສໂຄວິດ-19 ຢູ່ເຢຍລະມັນເລີ່ມກັບມາເພີ່ມຂຶ້ນອີກ ຫຼັງຈາກລັດຖະບານຫາກໍ່ເລີ່ມຜ່ອນຄາຍມາດຕະການລັອກດາວໄດ້ບໍ່ດົນ


ສຳ​ນັກ​ຂ່າວ ແຊນເນວເອເຊຍນິວ ລາຍ​ງານ​ໃນວັນທີ 28 ເມສາ 2020 ວ່າຂໍ້​ມູນ​ຈາກ​ສະ​ຖາ​ບັນ ‘ໂຣ​ແບ​ຄັອກ’ (RKI) ໜ່ວຍ​ງານ​ຄວບ​ຄຸມ​ພະຍາດ​ໃນ​ເຢຍ​ລະມັນ ລະ​ບຸ​ວ່າ ຕົວ​ເລກ​ອັດຕາ​ການ​ແພ່​ເຊື້ອ (infection rate) ຂອງ​ໄວ​ຣັສ​ໂຄ​ວິດ​-19 ເຊິ່ງ​ເຈົ້າ​ໜ້າທີ່​ເຝົ້າ​ຈັບ​ຕາ​ຢ່າງ​ໃກ້​ຊິດ

ຕົວເລກດັ່ງກ່າວເປັນຕົວບົ່ງຊີ້ວ່າ ຜູ້ຕິດເຊື້ອ 1 ຄົນຈະສາມາດແພ່ເຊື້ອໄປໃຫ້ຄົນອື່ນໆ ໄດ້ຈັກຄົນ ເຊິ່ງລັດຖະບານເຢຍລະມັນ ແລະ ນັກວິທະຍາໄວຣັສຕ່າງເຫັນກົງກັນວ່າ ເປັນເລື່ອງສຳຄັນທີ່ຕ້ອງຄວບຄຸມຕົວເລກນີ້ໃຫ້ຕ່ຳກວ່າ 1.0 ເຊິ່ງນັບຕັ້ງແຕ່ຊ່ວງກາງເດືອນເມສາ ອັດຕາການແພ່ເຊື້ອຢູ່ເຢຍລະມັນຫຼຸດລົງເຫຼືອພຽງ 0.7 ເທົ່ານັ້ນ ກ່ອນຈະກັບມາເພີ່ມຂຶ້ນ


ໃນຂະນະ​ທີ່​ອັດຕາ​ການ​ເສຍຊີວິດ​ຈາກ​ໄວ​ຣັສ​ໂຄວິດ​ນີ້​ກໍ​ເພີ່ມ​ຂຶ້ນ​ທຸກ​ມື້ ໂດຍ​ໃນ​ວັນ​ອັງ​ຄານ​ທີ 28 ເມສາ 2020 ອັດຕາ​ການ​ເສຍ​ເພີ່ມ​ຂຶ້ນ​ເປັນ 3.8% ຕາມ​ຂໍ້​ມູນ​ຂອງ RKI ແຕ່​ຍັງ​ຕ່ຳ​ກວ່າ​ປະເທດ​ເພື່ອນ​ບ້ານ​ຢ່າງ​ເຊັ່ນ​ຝ​ຣັ່ງ​
ທັງ​ນີ້ ລັດຖະບານ​ເຢຍລະມັນ​ຫາກໍ່​ປະ​ກາ​ດວ່າ​ຄວບ​ຄຸມ​ການ​ລະ​ບາດ​ຂອງ​ໄວ​ຣັສຕົວ​ນີ້​ໄດ້​ໃນຕົ້ນ​ເດືອນ​ເມ​ສາ ແລະ ​ຜ່ອນ​ຄາຍ​ມາ​ດຕະ​ການ​ລັອກ​ດາວ​ ໃຫ້​ຮ້ານ​ຄ້າ​ຂະໜາດ​ນ້ອຍ​ເປີດ​ໃຫ້ບໍລິການ​ໄດ້​ຕັ້ງ​ແຕ່​ອາທິດ​ກ່ອນ ຂະນະ​ທີ່​ນັກ​ຮຽນ​ຈະ​ສາມາດ​ໄປ​ໂຮງຮຽນ​ໄດ້​ໃນ​ມື້​ຈັນ​ໜ້າ

ແຕ່​ການ​ກັບ​ມາ​ເພີ່ມ​ຂຶ້ນ​ຂອງ​ອັດຕາ​ການ​ແພ່ເຊື້ອ ​ແລະ ​ການ​ເສຍຊີວິດ ອາດ​ເຮັດໃຫ້​ລັດຖະບານ​ຕ້ອງ​ທົບ​ທວນ​ຢ່າງ​ອ້ອມ​ຄອບ​ອີກ​ເທື່ອ ກ່ອນ​ຈະ​ມີ​ການ​ຕັດ​ສິນ​ໃຈ​ເລື່ອງ​ມາດ​ຕະການ​ລັອກ​ດາວ​ໃນ​ວັນທີ 6 ພຶດສະພາ 2020 ຊຶ່ງ​ກ່ອນ​ໜ້າ​ນີ້​ຄາດ​ການ​ວ່າ ລັດຖະບານ​ຜ່ອນ​ຄາຍ​ຂໍ້​ຈຳ​ກັດ​ຕ່າງ​ໆ ເພີ່ມ​ຂຶ້ນ​ອີກ

ທ່ານ ນາງ​ອັງ​ເກລາ ແມ​​ເຄີນ ນາຍົກ​ລັດຖະມົນຕີ​ເຢຍລະມັນ ເຄີຍ​ອອກ​ມາ​ເຕືອນ​ເລື່ອງ​ການ​ຄາຍ​ລັອກ​ດາວ​​​ໄວ​ເກີນ​ໄປ ຈົນ​ຖືກ​ໂຈມ​ຕີ​ຈາກ​ສື່ ​ແລະ ​ຝ່າຍ​ຄ້ານ​ມາ​ແລ້ວ ໂດຍ​ນາງ​ລະ​ບຸ​ວ່າ ຫາກ​ອັດຕາ​ການ​ແພ່​ເຊື້ອ​ເພີ່ມ​ເປັນ 1.1 ລະບົບ​ສາທາລະນະສຸກ​ ແລະ ​ຕຽງ​ຫ້ອງ​ໄອ​ຊີ​ຢູ​ຈະ​ເຖິງ​ຂີດ​ຈຳ​ກັດ​ພາຍ​ໃນ​ເດືອນ​ຕຸລາ ຖ້າ​ອັດຕາ​ເພີ່ມ​ເປັນ 1.2 ຂີດ​ຈະ​ເລື່ອນ​ມາ​ຢູ່​ທີ່​ເດືອນ​ກໍລະກົດ ແລະ​ ຫາກ​ອັດຕາ​ເພີ່ມ​ເປັນ 1.3 ແມ່ນ​ເບິ່ງຄື​ບໍ່​ຫລາຍ ແຕ່​ລະບົບ​ສາທາລະນະສຸກ​ຈະ​ເຖິງ​ຂີດ​ຈຳ​ກັດ​ໃນ​ເດືອນ​ມິ​ຖຸ​ນາ​ເທົ່າ​ນັ້ນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments