ເຈົ້າແຂວງໄຊຍະບູລີ ລົງຕິດຕາມການຈັດຕັ້ງປະຕິບັດວຽກງານປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ຊຸກຍູ້ການຜະລິດ, ການກໍ່ສ້າງພື້ນຖານໂຄງລ່າງ ຢູ່ເມືອງແກ່ນທ້າວ



ໃນວັນທີ 28 ເມສາ 2020 ນີ້, ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໄຊຍະບູລີ ພ້ອມດ້ວຍທີມງານຂອງແຂວງ ໄດ້ລົງຕິດຕາມການຈັດຕັ້ງປະຕິບັດວຽກງານປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຕິດພັນກັບການຊີ້ນໍາໆພາວຽກງານຊຸກຍູ້ສົ່ງເສີມການຜະລິດ, ການກໍ່ສ້າງພື້ນຖານໂຄງລ່າງ ຢູ່ບ້ານວັງປາ ເມືອງແກ່ນທ້າວ ເປັນກຽດຕ້ອນຮັບໂດຍທ່ານ ອໍາຄາ ລັດສະໝີ ເລຂາພັກເມືອງ, ເຈົ້າເມືອງແກ່ນທ້າວ ພ້ອມຄະນະປະຈໍາພັກເມືອງ, ກໍາມະການພັກເມືອງ ແລະ ນາຍບ້ານເຂດພັດທະນາວັງປາ.

Image may contain: 1 person, standing, sky, tree, outdoor and nature


ໃນການລົງຕິດຕາມຄັ້ງນີ້, ທ່ານເຈົ້າແຂວງໄຊຍະບູລີ ໄດ້ຮັບຟັງການລາຍງານການຈັດຕັ້ງປະຕິບັດວຽກງານປ້ອງກັນ ແລະ ສະກັດກັ້ນພະຍາດ ໂຄວິດ-19 ເຊິ່ງໂດຍລວມແລ້ວ ບັນດາສະມາຊິກພັກ- ພະນັກງານ, ທະຫານ, ຕໍາຫຼວດ ແລະ ປະຊາຊົນ ຢູ່ພາຍໃນເມືອງ ແມ່ນຍັງມີຈິດໃຈອຸ່ນອ່ຽນທຸ່ນທ່ຽງ, ຕັ້ງໜ້າປະຕິບັດ ຄໍາສັ່ງ ເລກທີ 06 ທ່ານນາຍົກລັດຖະມົນຕີ, ຄໍາສັ່ງແນະນໍາຂອງທ່ານເຈົ້າແຂວງ ສະບັບເລກທີ 87/ຈຂ.ຊຍ, ຄໍາສັ່ງແນະນໍາຂອງທ່ານເຈົ້າເມືອງ ສະບັບເລກທີ 422/ຈມ.ກທ ແລະ ບັນດານິຕິກໍາຕ່າງໆຂອງຄະນະສະເພາະກິດຂັ້ນສູນກາງ, ຂັ້ນແຂວງ, ຂັ້ນເມືອງ ກ່ຽວກັບການເພີ່ມທະວີມາດຕະການສະກັດກັ້ນ, ປ້ອງກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ-19 ແລະ ປະຕິບັດໜ້າທີ່ວຽກງານວິຊາສະເພາະຂອງຕົນດ້ວຍຄວາມຮັບຜິດຊອບສູງ, ໄປຄຽງຄູ່ກັບການເຝົ້າລະວັງພະຍາດດັ່ງກ່າວ ປະຊາຊົນໄດ້ສືບຕໍ່ເກັບກູ້ຜົນຜະລິດກະສິກໍາ ແລະ ກະກຽມໃຫ້ແກ່ການຜະລິດລະດູປີ ໂດຍມີການຄຸ້ມຄອງຂອງອົງການປົກຄອງບ້ານຢ່າງເຂັ້ມງວດ, ສັງລວມແລ້ວເຫັນວ່າສະພາບໂດຍລວມຂອງເມືອງ ແມ່ນມີຄວາມສະຫງົບໂດຍພື້ນຖານ.

Image may contain: one or more people, outdoor and indoor

ທົ່ວເມືອງມີສູນກັກກັນບໍລິເວນ ທັງໝົດ 33 ສູນ, ມີຈໍານວນພົນເຂົ້າສູນທັງໝົດ 985 ຄົນ, ຍິງ 492 ຄົນ, ມາຮອດວັນທີ 27 ເມສາ 2020 ຈໍານວນທີ່ຖືກກັກກັນບໍລິເວນ ຢູ່ຄົບ 14 ວັນ ໄດ້ຮັບການອານຸຍາດອອກສູນແລ້ວ 980 ຄົນ, ຍິງ 490 ຄົນ, ໄດ້ປິດສູນ ແລະ ຂ້າເຊື້ອແລ້ວຈໍາ 30 ສູນ, ຍັງ 3 ສູນ, ມີໜ້າຢູ່ສູນຕົວຈິງ 5 ຄົນ, ຍິງ 2 ຄົນ. ຜ່ານການຕິດຕາມກວດກາຢູ່ແຕ່ລະສູນ ແມ່ນບໍ່ພົບບຸກຄົນໃດທີ່ມີອາການເຂົ້າກັບນິຍາມຂອງພະຍາດ ໂຄວິດ-19 ແຕ່ຢ່າງໃດ. ຕິດພັນກັບການເຝົ້າລະວັງ, ປ້ອງກັນ ແລະ ສະກັດກັ້ນພະຍາດ ໂຄວິດ-19 ນັ້ນ, ຄະນະພັກ, ອົງການປົກຄອງເມືອງໄດ້ເອົາໃຈໃສ່ ໃນການຊຸກຍູ້ປະຊາຊົນເກັບກູ້ຜົນຜະລິດລະດູແລ້ງ, ຜົນຜະລິດລະດູຝົນ ຕິດພັນກັບການຊຸກຍູ້ໃຫ້ແກ່ການກະກຽມຜະລິດລະດູປີ ເຊັ່ນ: ໃນປີ 2019 ເນື້ອທີ່ຜະລິດຕົວຈິງ 24.000 ກວ່າເຮັກຕາ, ເນື້ອທີ່ເສຍຫາຍ 1.600 ກວ່າເຮັກຕາ, ເນື້ອທີ່ເກັບກູ້ຕົວຈິງ 22.500 ກວ່າເຮັກຕາ, ຜົນຜະລິດໄດ້ 300.000 ກວ່າໂຕນ, ເນື້ອທີ່ປູກພືດລະດູແລ້ງຕົວຈິງ 800 ກວ່າເຮັກຕາ, ຜົນຜະລິດໄດ້ 4.000 ກວ່າໂຕນ, ສະເພາະໃນປີນີ້, ເນື້ອທີ່ແຜນການປູກເຂົ້ານາປີ 6.000 ກວ່າເຮັກຕາ, ເຂົ້າເນີນສູງ 280 ເຮັກຕາ, ເນື້ອທີ່ປູກພືດຊະນິດຕ່າງໆ 20.000 ເຮັກຕາ, ໃນນີ້ ສາລີ 3.000 ເຮັກຕາ, ຖົ່ວດິນ 2.000 ເຮັກຕາ, ຖົ່ວແດງ 1.600 ເຮັກຕາ, ມັນຕົ້ນ 13.000 ເຮັກຕາ ແລະ ພືດອື່ນໆ 400 ເຮັກຕາ. ເຊິ່ງມາຮອດປັດຈຸບັນສາມາດປູກສາລີແຂງໄດ້ 630 ກວ່າເຮັກຕາ, ເທົ່າກັບ 21,22% ຂອງແຜນການ, ປູກຖົ່ວດິນໄດ້ 800 ກວ່າເຮັກຕາ, ເທົ່າກັບ 40,03% ຂອງແຜນການ, ປູກມັນຕົ້ນໄດ້ 7.240 ກວ່າເຮັກຕາ, ເທົ່າກັບ 55,70% ຂອງແຜນການ ໂດຍມອບໃຫ້ຫ້ອງການກະສິກໍາ ແລະ ປ່າໄມ້ເມືອງ ເປັນເຈົ້າການຕິດຕາມຊຸກຍູ້ການກະກຽມການຜະລິດ ຢູ່ແຕ່ລະບ້ານຢ່າງເປັນຂະບວນ.

Image may contain: one or more people

ສະເພາະແຜນການພັດທະນາພື້ນຖານໂຄງລ່າງ ໂດຍສະເພາະແມ່ນການກໍ່ສ້າງທາງຮ່ອມ ປີ 2020-2024 ເມືອງໄດ້ຂຶ້ນແຜນ ໃນການສ້າງທາງຮ່ອມດ້ວຍເບຕົງເສີມເຫຼັກ ບ້ານ ຫາດແດງ ຮ່ອມ 2 ຍາວ 183 ແມັດ, ມູນຄ່າ 155 ລ້ານກີບ, ບ້ານ ໜອງ ຮ່ອມ 5 ແລະ ຮ່ອມ 10 ຍາວ 300 ແມັດ, ມູນຄ່າ 254 ລ້ານກີບ, ບ້ານທ້າວແກ່ນ ຮ່ອມ 4, ຮ່ອມ 13 ຍາວ 200 ແມັດ, ມູນຄ່າ 180 ລ້ານກີບ, ໃຊ້ປູນຊີມັງ 50 ກວ່າໂຕນ, ບ້ານ ດອນເມນ ຮ່ອມ 1 ຍາວ 300 ແມັດ, ມູນຄ່າ 254 ລ້ານກີບ, ໃຊ້ປູນຊີມັງ 90 ກວ່າໂຕນ, ບ້ານ ວັງປາ ຮ່ອມ 3 ຍາວ 300 ແມັດ, ມູນຄ່າ 254 ລ້ານກີບ, ໃຊ້ປູນຊີມັງ 90 ກວ່າໂຕນ. ທ່ານເຈົ້າແຂວງໄຊຍະບູລີ ໄດ້ເນັ້ນໃຫ້ເມືອງແກ່ນທ້າວ ສືບຕໍ່ເຝົ້າລະວັງ, ປ້ອງກັນ ແລະ ຕ້ານພະຍາດໂຄວິດ-19 ໄປພ້ອມກັບການຊຸກຍູ້ການຜະລິດຂອງປະຊາຊົນ ໂດຍສະເພາະການຜະລິດລະດູປີ ໃຫ້ທ່ວງທັນກັບລະດູການ ແລະ ການກໍ່ສ້າງພື້ນຖານໂຄງລ່າງ ທີ່ທາງເມືອງໄດ້ກໍານົດແຜນໄວ້ແລ້ວ ໃຫ້ໄດ້ຮັບການຈັດຕັ້ງປະຕິບັດຕົວຈິງ.

Image may contain: one or more people


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments