ເມືອງຍົມມະລາດ ຍັງສືບຕໍ່ເຂັ້ມງວດບັນດາມາດຕະການປ້ອງກັນພະຍາດໂຄວິດ-19



ເມືອງຍົມມະລາດ ຍັງສືບຕໍ່ເຂັ້ມງວດບັນດາມາດຕະການປ້ອງກັນພະຍາດໂຄວິດ-19 ເຊິ່ງໄດ້ກຳນົດສູນກັກກັນ ໃໝ່ ສາມາດຮອງຮັບໄດ້ 48 ຄົນ. ປະຈຸບັນມີຜູ້ເຂົ້າກັກກັນເພື່ອຕິດຕາມອາການຈຳນວນ 12 ຄົນ.

Image may contain: 1 person, sitting

ທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ ແຂວງຄຳມ່ວນ ໄດ້ໃຫ້ສຳພາດຕໍ່ນັກຂ່າວທ້ອງຖິ່ນ ໃນວັນທີ 19 ພຶດສະພາ ນີ້ວ່າ: ໃນໄລຍະຜ່ານມາເມືອງຍົມມະລາດ ໄດ້ກຳນົດສູນເພື່ອກັກກັນແຮງງານລາວທີ່ກັບຈາກຕ່າງປະເທດ ແລະ ບັນດາແຂວງຕ່າງໆຈຳນວນ 15 ສູນ. ເຊິ່ງລວມມີຜູ້ເຂົ້າກັກກັນສະສົມທັງໝົດ 946 ຄົນ. ໃນນັ້ນມາຈາກບັນດາ ແຂວງຕ່າງໆ 557 ຄົນ, ມາຈາກປະເທດໄທ 369 ຄົນ. ຫຼັງຈາກທີ່ໄດ້ເຂົ້າກັກກັນຕິດຕາມອາການຄົບ 14 ວັນ ເຊິ່ງສູນສຸດທ້າຍກໍ່ໄດ້ປິດລົງໃນວັນທີ 03 ພຶດສະພາ 2020 ພ້ອມທັງໄດ້ສີດຢາຂ້າເຊື້ອບັນດາໂຮງຮຽນທີ່ໄດ້ກຳນົດ ເປັນສູນກັກກັນ ເພື່ອກະກຽມດຳເນີນເປີດການຮຽ-ການສອນ. ພາຍຫຼັງທີ່ໄດ້ຮັບແຈ້ງການຂອງຫ້ອງວ່າການແຂວງ ວ່າດ້ວຍການກະກຽມສູນກັກກັນຕົວຜູ້ທີ່ເດີນທາງເຂົ້າມາຈາກຕ່າງປະເທດ ໃນໄລຍະທີ 2 ເມືອງຍົມມະລາດ ກໍ່ໄດ້ກຳນົດ ເອົາຄ້າຍທະຫານເກົ່າເປັນສູນກັກກັນ ເຊິ່ງໃນປະຈຸບັນມີຜູ້ເຂົ້າກັກກັນທັງໝົດ 12 ຄົນ. ໃນນັ້ນແຮງງານລາວທີ່ເດີນທາງ ມາຈາກປະເທດໄທ ຈຳນວນ 1 ຄົນ, ຄົນຫວຽດນາມເດີນທາງເຂົ້າມາລາວ ຈຳນວນ 9 ຄົນ ແລະ ຄົນລາວ ທີ່ມີການພົວພັນກັບຄົນຫວຽດນາມດັ່ງກ່າວຈຳນວນ 2 ຄົນ. 


Image may contain: 1 person, sitting, grass, child, tree, outdoor and nature


ນອກຈາກນີ້ທາງຄະນະສະເພາະກິດຂັ້ນເມືອງຍັງໄດ້ອອກ ແຈ້ງການ ກ່ຽວກັບບັນດາມາດຕະການຜ່ອນຜັນ ແລະ ບັນດາມາດຕະການທີ່ຈະຕ້ອງໄດ້ເຂັ້ມງວດຈັດຕັ້ງປະຕິບັດ ຕາມແຈ້ງການ ຂອງຫ້ອງວ່າການສຳນັກງານນາຍົກລັດຖະມົນຕີໃນແຕ່ລະໄລຍະ ລົງເຜີຍແຜ່ໃຫ້ພໍ່ແມ່ປະຊາຊົນ ແລະ ບັນດາຫົວໜ່ວຍບໍລິການຈຳນວນໜຶ່ງໄດ້ຮັບຊາບ ເພື່ອພ້ອມກັນຈັດຕັ້ງປະຕິບັດຢ່າງເຂັ້ມງວດ. ໂດຍສະເພາະໄດ້ແຕ່ງຕັ້ງ ຄະນະຮັບຜິດຊອບຕິດຕາມ ການປະຕິບັດມາດຕະການ ຂອງສະມາຄົມລົດໂດຍສານພາຍໃນເມືອງ, ເຄື່ອນໄຫວ ຕິດຕາມ, ກວດກາ ການປະຕິບັດມາດຕະການຂອງບັນດາຫົວໜ່ວຍທຸລະກິດທີ່ໄດ້ຮັບອະນຸຍາດສືບຕໍ່ເຄື່ອນໄຫວ ເປັນຕົ້ນແມ່ນໂຮງແຮມ, ເຮືອນພັກ, ຮ້ານອາຫານ, ຮ້ານຂາຍເຄື່ອງຍ່ອຍ ແລະ ອື່ນໆ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments