ສະມາຊິກສະພາປະຊາຊົນແຂວງວຽງຈັນ ລົງຢ້ຽມຢາມ ຢູ່ເມືອງຊະນະຄາມ


ວັນທີ 27 ພຶດສະພາ 2020 ທ່ານ ນາງ ບົວວັນ ທໍາມະວົງ ຄະນະປະຈໍາສະພາປະຊາຊົນແຂວງ ປະທານຄະນະກໍາມະການວັດທະນະທໍາ-ສັງຄົມແລະ ບັນດາເຜົ່າ, ພ້ອມດ້ວຍທ່ານ ພັອ ສີນວນ ພົມມະຈັນ ສະມາຊິກສະພາປະຊາຊົນແຂວງ ປະທານກໍາມະການຍຸຕິທໍາ, ປ້ອງກັນຊາດ-ປ້ອງການກັນຄວາມສະຫງົບແຂວງແລະ ຄະນະ, ໄດ້ສົມທົບກັບຄະນະ​ສະ​ເພາະ​ກິດປ້ອງກັນ, ຄວບຄຸມ ແລະ ຕອບໂຕ້ການແຜ່ລະບາດຂອງພະຍາດ covid -19 ຂັ້ນເມືອງ ໂດຍມີທ່ານ ບຸນຊ່ວງ ວັນສີ ຄະນະປະຈໍາພັກເມືອງ ຮອງເຈົ້າເມືອງໆຊະນະຄາມ ພ້ອມຄະນະ, ໄດ້ລົງພົບປະຢ້ຽມຢາມ ແລະ ຊຸກຍູ້ແຮງງານທີ່ມາຈາກຕ່າງປະເທດ ທີ່ໄດ້ເຂົ້າມາຢູ່ສູນກັກກັນຂອງເມືອງດັ່ງກ່າວ.


ເພື່ອຮັບປະກັນ ໃນການສືບຕໍ່ປະຕິບັດ ບັນດາມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ covid-19 ຢູ່ພາຍໃນເມືອງໃຫ້ມີປະສິດທິພາບ, ຍົກສູງຄວາມຮັບຜິດຊອບຂອງບັນດາພາກສ່ວນຕ່າງໆ, ເວົ້້າລວມເວົ້າສະເພາະບັນດາຊາວຜູ່ອອກແຮງງານທີ່ມາຈາກຕ່າງປະເທດ ໄດ້ເຂົ້າຮ່ວມໃນການປະຕິບັດມາດຕະການ ເພື່ອກັກກັນຕົວເອງຕາມທິດຊີ້ນໍາຂອງຄະນະສະເພາະກິດຂັ້ນສູນກາງ ໄດ້ກໍານົດອອກຢ່າງທົ່ວເຖິງ.



ໃນປະຈຸບັນຢູ່ພາຍໃນສູນກັກກັນຂອງເມືອງດັ່ງກ່າວ ມີບັນດາຊາວຜູ່ອອກແຮງງານທີ່ມາຈາກຕ່າງປະເທດ ເຄື່ອນຍ້າຍເຂົ້າມາຢູ່ໃນສູນ ມີຈໍານວນທັງໝົດ 86 ຄົນ, ຍິງ 34 ຄົນ, ໃນນີ້ ມີແຮງງານທີ່ເປັນປະຊາຊົນມາຈາກເມືອງ ແມດ ແຂວງວຽງຈັນ ມີທັງໝົດ 7 ຄົນ, ຍິງ 2 ຄົນ ແລະ ມາຈາກເມືອງໄຊຍະບູລີ ແຂວງໄຊຍະບູລີ ມີ 2 ຄົນ, ຍິງ 1 ຄົນເຊິ່ງສູນດັ່ງກ່າວໄດ້ເລີ່ມຕົ້ນຮັບເອົາແຮງງານທີ່ມາຈາກຕ່າງປະເທດ ນັບແຕ່ວັນທີ 10 ພຶດສະພາເປັນຕົ້ນມາ, ເຊິ່ງແຮງງານທັງໝົດແມ່ນເຄື່ອນຍ້າຍເຂົ້າມາຈາກປະເທດໄທ.




ໃນໄລຍະຜ່ານມາ ບັນຄະນະຮັບຜິດຊອບສະເພາະກິດຂັ້ນເມືອງ ໄດ້ເອົາໃຈໃສ່ໃນການຈັດຕັ້ງຜັນຂະຫຍາຍວຽກງານດັ່ງກ່າວ, ລົງໂຄສະນາແຜ່ບັນດາຄໍາສັ່ງ, ແຈ້ງການຕ່າງໆລົງສູ່ຮາກຖານ, ທຸລະກິດ, ຫ້າງຮ້ານເປັນແຕ່ລະໄລຍະ, ຈັດຕັ້ງສູນກັກກັນຮັບຮອງແຮງງານທີ່ເຄື່ອນຍ້າຍເຂົ້າມາຈາກຕ່າງປະເທດ ໃຫ້ສາມາດຕອບສະໜອງພຽງພໍກັບຈໍານວນຄົນທັງໃນປະຈຸບັນ ແລະ ໃນຕໍ່ໜ້າ,
ເອົາໃຈໃສ່ໃນການຕິດຕາມ ແລະ ເກັບກໍາຕົວຢ່າງເພື່ອກວດຫາເຊື້ອພະຍາດນໍາບັນດາແຮງງານທີ່ກັກຕົວເປັນແຕ່ລະໄລຍະ, ເຊິ່ງໃນປະຈຸບັນ ສາມາດເກັບກໍາຕົວຢ່າງນໍາບັນດາແຮງງານທີ່ກັກກັນຕົວໄດ້ທັງໝົດຈໍານວນ 83 ຄົນ, ຍິງ 33 ຄົນ ແລະ ຈະສືບຕໍ່ເກັບກໍາຕົວຢ່າງຈາກແຮງງານມາເພີ່ມໃໝ່ ທີ່ຍັງບໍ່ທັນໄດ້ເກັບຕົວຢ່າງຈໍານວນ 4 ຄົນ, ຍິງ 1 ຄົນ ໃຫ້ມີຜົນສໍາເລັດ.
ໃນໂອກາດທີ່ໄດ້ລົງມາພົບປະຢ້ຽມຢາມດັ່ງກ່າວນີ້ ທ່ານ ນາງ ບົວວັນ ທໍາມະວົງ ໄດ້ມອບເຄື່ອງບໍລິໂພກຈໍານວນໜຶ່ງໃຫ້ແກ່ແຮງງານທີ່ຖືກກັກຕົວໃນຄັ້ງນີ້ ແລະ ໄດ້ມີຄໍາເຫັນໂອ້ລົມ ເຊິ່ງທ່ານຍົກໃຫ້ເຫັນຜົນກະທົບຂອງການແຜ່ລະບາດພະຍາດ covid-19 ທີ່ມີຕໍ່ບັນດາປະເທດຕ່າງໆໃນທົ່ວໂລກ ແລະ ທ່ານຍັງໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຄະນະສະເພາະກິດຂັ້ນເມືອງ ທີ່ໄດ້ເອົາໃຈສ່ຢ່າງຕັ້ງໜ້າໃນການຈັດຕັ້ງປະຕິບັດມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງດັ່ງກ່າວ,
ເຊິ່ງເຫັນໄດ້ເມືອງຊະນະຄາມບໍ່ພົບເຫັນຜູ່ຕິດເຊື້ອຕະ ຫຼອດໄລຍະຜ່ານມາ ແລະ ຊົມເຊີຍບັນດາປະຊາຊົນຈໍານວນດັ່ງກ່າວທີ່ໄດ້ປະກອບ ສ່ວນເຂົ້າຮ່ວມໃນການກັກກັນຕົວໃນຄັ້ງນີ້ດ້ວຍຄວາມຕື່ນຕົວ,ເປັນເຈົ້າການຕິດຕາມ ແລະ ເຝົ້າລະວັງການແຜ່ລະບາດຂອງພະຍາດດັ່ງກ່າວດ້ວຍຄວາມຈິງໃຈ, ເພື່ອພ້ອມກັນສືບຕໍ່ວຽກງານດັ່ງກ່າວໃຫ້ມີປະສິດພາບ ທ່ານຍັງໄດ້ຮຽກຮ້ອງມາຍັງບັນດາຄະນະຮັບຜິດຊອບແຕ່ລະຂັ້ນພາຍໃນເມືອງ, ຕະຫຼອດຮອດບັນດາປະຊາຊົນບັນດາເຜົ່າ ຈົ່ງໄດ້ເອົາໃຈໃສ່ຢ່າງເຂັ້ມງວດ ສືບຕໍ່ເຮັດໜ້າທີ່ວຽກງານດັ່ງກ່າວໃຫ້ມີປະສິດທິພາບ ເພື່ອພ້ອມກັນເອົາຊະນະພະຍາດດັ່ງກ່າວໄປພ້ອມກັນ.
ຂ່າວ: ເມືອງຊະນະຄາມ











------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments