ເມືອງແບງ ສະຫລຸບການຈັດຕັ້ງປະຕິບັດ ມາດຕະການ ປ້ອງກັນ ໂຄວິດ 19 ໄລຍະ 2



ຂປລ. ເມື່ອບໍ່ດົນມານີ້, ເມືອງແບງ ແຂວງອຸດົມໄຊ ຈັດກອງປະຊຸມສະຫລຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ປ້ອງກັນ, ຄວມຄຸມ ແລະ ແກ້ໄຂ ການລະບາດຂອງເຊື້ອພະຍາດໂຄວິດ 19 ໃນໄລຍະທີ 2 ແຕ່ວັນທີ 20 ເມສາ ຫາ ວັນທີ 3 ພຶດສະພາ 2020 ໂດຍສືບຕໍ່ປະຕິບັດຕາມຄຳສັ່ງເລກທີ 06/ນຍ, ເລກທີ 366 ຂອງທ່ານເຈົ້າແຂວງອຸດົມໄຊ ແລະ ແຈ້ງການຂອງເມືອງຢ່າງເຂັ້ມງວດ.



ທ່ານ ຄໍາພອນ ພິມມະລາດ ຮອງເລຂາພັກເມືອງ, ທັງເປັນຫົວໜ້າຄະນະສະເພາະກິດຂັ້ນເມືອງ ໄດ້ໃຫ້ຮູ້ວ່າ: ການຈັດຕັ້ງປະຕິບັດມາດຕະການ ປ້ອງກັນ,ຄວບຄຸມ ແລະ ແກ້ໄຂ ການລະບາດຂອງເຊື້ອພະຍາດໂຄວິດ 19 ໃນໄລຍະທີ 2 ຂອງ ນີ້ ແມ່ນສືບຕໍ່ປິຕິບັດຢ່າງເຂັ້ມງວດ, ພາກສ່ວນກ່ຽວຂ້ອງໄດ້ລົງເຄື່ອນໄຫວໂຄສະນາເຜີຍແຜ່ຂໍ້ມູນຂ່າວສານ ໃນທຸກຮູບແບບ ໃນທົ່ວເມືອງ, ລົງພົ່ນຢາຂ້າເຊື້ອ ຢູ່ຕາມຈຸດຕ່າງໆ ທີ່ມີແອອັດ ແລະ ຄົນຈຳນວນຫລາຍ ເປັນຕົ້ນແມ່ນ ຕະຫລາດ ແລະ ຄິວລົດ,ລົງສົມທົບກັບເຈົ້າໜ້າທີ່ ປະຈຳຢູ່ຈຸດກວດຄົນເຂົ້າ-ອອກເມືອງ ເຊິ່ງມີ 2 ຈຸດຄື ບ້ານທ່າກາດ ແລະ ບ້ານຊຽງແລ ເພື່ອກວດອຸນຫະພູມ ແລະ ເກັບກຳຂໍ້ມູນ ຄົນເຂົ້າ-ອອກ ຢ່າງລະອຽດ.



ໃນໂອກາດນີ້, ທ່ານ ຄໍາພຽງ ຢາຈົງວາ ຮອງເຈົ້າແຂວງອຸດົມໄຊ, ທັງເປັນຫົວໜ້າຄະນະສະເພາະກິດ ຂັ້ນແຂວງ ໄດ້ໂອ້ລົມ ແລະ ເນັ້ນໜັກບາງບັນຫາ ໂດຍສະເພາະແມ່ນໃຫ້ເມືອງແບງ ສືບຕໍ່ຈັດຕັ້ງປະຕິບັດມາດຕະການປ້ອງການ, ຄວບຄຸມ ແລະ ແກ້ໄຂ ການລະບາດຂອງເຊື້ອພະຍາດໂຄວິດ 19 ໃນໄລະຍະທີ 3 ນີ້ ຕາມແຈ້ງການແນະນໍາຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 524, ແຈ້ງການແນະນຳຂອງ ທ່ານເຈົ້າແຂວງອຸດົມໄຊ, ແຈ້ງການຂອງຄະນະສະເພາະກິດຂັ້ນແຂວງ ເລກທີ 454 ແລະ ນິຕິກຳອື່ນໆໃຫ້ເຂັ້ມງວດ, ພ້ອມທັງເຜີຍແຜ່ໃຫ້ສັງຄົມທົ່ວເມືອງແບງ ຮັບຮູ້ ແລະ ເຂົ້າໃຈແຈ້ງ ໂດຍສະເພາະແມ່ນ ການຜ່ອນຜັນ, ຂໍ້ຫ້າມ ແລະ ມາດຕະການ ແລະ ຕິດພັນກັບການເອົາໃຈໃສ່ ປ້ອງກັນພະຍາດທີ່ມັກເກີດຂຶ້ນຕາມລະດຸການ ເປັນຕົ້ນແມ່ນ ພະຍາດໄຂຍຸງລາຍ, ໝາກແດງ, ຖອກທ້ອງ ແລະ ອື່ນໆ.


ຂ່າວ: ຄານມະນີ ຮຽນດໍຈັນ










------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments