ກະຊວງສຶກສາທິການ ແລະ ກິລາ ປະກາດພະນັກງານການນຳຂັ້ນສູງຮັບອຸດໜູນບຳນານ 2 ທ່ານ


ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີປະກາດພະນັກງານການນຳຂັ້ນສູງອອກພັກການ-ຮັບອຸດໜູນບຳນານ ຈຳນວນ 2 ທ່ານ ເພື່ອເປັນການປະຕິບັດຕາມລະບຽບຂອງລັດຖະກອນຂອງຂັ້ນເທິງວາງອອກ. ພ້ອມກັນນັ້ນ, ຍັງໄດ້ປະດັບຫຼຽນກາແຮງງານ ແລະ ຍ້ອງຍໍສັນລະເສີນຜົນງານຄຸນງາມຄວາມດີທີ່ທັງ 2 ທ່ານໄດ້ປະກອບສ່ວນເຫື່ື່ອແຮງເຂົ້າໃນການພັດທະນາວຽກງານການສຶກສາຕະຫຼອດໄລຍະຜ່ານມາ.

Image may contain: 1 person, eating, sitting, table, indoor and food

ພິທີດັ່ງກ່າວ, ໄດ້ຈັດຂຶ້ນເມື່ອວັນທີ 16 ມິຖຸນາ ຜ່ານມາ ທີ່ຫ້ອງປະຊຸມ ກະຊວງສຶກສາທິການ ແລະ ກິລາ ໂດຍພາຍໃຕ້ການເປັນປະທານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ, ມີຄະນະລັດຖະມົນຕີ, ຜູ້ຕາງໜ້າຈາກກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ, ຫົວໜ້າກົມ, ສູນ ຕະຫຼອດຮອດພະນັກງານທີ່ກ່ຽວຂ້ອງພາຍໃນເຂົ້າຮ່ວມ.

Image may contain: 3 people

ໃນໂອກາດດັ່ງກ່າວ, ທ່ານ ສຸລິວົງ ບຸນຍະເລດ ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບຳນານ ໂດຍອະນຸມັດໃຫ້ທ່ານ ຮສ.ປອ ກອງສີ ແສງມະນີ ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງສຶກສາທິການ ແລະ ກິລາ ເກີດເມື່ອວັນທີ 13 ພຶດສະພາ 1953 ລວມອາຍຸກະສຽນ 67 ປີ, ເຂົ້າສັງກັດລັດ ວັນທີ 10 ກັນຍາ 1969 ລວມອາຍຸການ 51 ປີ ອອກພັກການ-ຮັບອຸດໜູນບຳນານ; ທ່ານ ບົວລານ ສິລິປັນຍາ ຄະນະປະຈຳພັກ, ຮອງລັດຖະມົນຕີ ກະຊວງສຶກສາທິການ ແລະ ກິລາ ເກີດເມື່ອວັນທີ 1 ພຶດສະພາ 1957 ລວມອາຍຸກະສຽນ 63 ປີ, ເຂົ້າສັງກັດລັດ ວັນທີ 10 ຕຸລາ 1975 ລວມອາຍຸການ 45 ປີ ອອກພັກການ-ຮັບອຸດໜູນບຳນານ.

Image may contain: 2 people, people standing, suit and indoor

ນອກຈາກນັ້ນ, ທ່ານ ນາງ ວຽງແກ້ວ ພົມມະວົງ ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ ໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການປະດັບຫຼຽນກາແຮງງານໃຫ້ພະນັກງານການນຳ ກະຊວງສຶກສາທິການ ແລະ ກິລາ ຈຳນວນ 2 ທ່ານ ຄື: ທ່ານ ຮສ.ປອ ກອງສີ ແສງມະນີ ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ບົວລານ ສິລິປັນຍາ ຄະນະປະຈຳພັກ, ຮອງລັດຖະມົນຕີ ກະຊວງສຶກສາທິການ ແລະ ກິລາ ທີ່ມີຜົນງານ ຄຸນງາມຄວາມດີປະກອບສ່ວນດ້ານເຫື່ອແຮງ ແລະ ສະຕິປັນຍາ ໃນການປະຕິບັດໜ້າທີ່ວຽກງານການສຶກສາຕະຫຼອດໄລຍະຜ່ານມາ, ຊຶ່ງຜົນງານດັ່ງກ່າວ ເປັນການປະກອບສ່ວນອັນສຳຄັນໃນການພັດທະນາປະເທດຊາດ.

Image may contain: 3 people, people standing

ຂະນະດຽວກັນ, ພະນັກງານການນຳຂັ້ນສູງທັງ 2 ທ່ານ ໄດ້ຜັດປ່ຽນກັນຂຶ້ນເລົ່າເຖິງປະຫວັດການຕໍ່ສູ້ ແລະ ຜົນງານທີ່ທ່ານໄດ້ອຸທິດເຫື່ອແຮງ, ຄວາມດີ, ສະຕິປັນຍາ ແລະ ຄວາມຮູ້ຄວາມສາມາດເຂົ້າໃນການປະກອບສ່ວນພັດທະນາປະເທດຊາດຕະຫຼອດໄລຍະຜ່ານມາ ເວົ້າລວມ ເວົ້າສະເພາະແມ່ນປະກອບສ່ວນເຂົ້າໃນການພັດທະນາວຽກງານໃນຂະແໜງການສຶກສາ ໃຫ້ມີບາດກ້າວທີ່ດີຂຶ້ນ. ພ້ອມກັນນັ້ນ, ທ່ານຍັງໄດ້ມີຄຳເຫັນແນະນຳໃຫ້ການນຳກະຊວງ ແລະ ຜູ້ບໍລິຫານການສຶກສາທຸກຂັ້ນ ໃຫ້ພ້ອມກັນສືບຕໍ່ພັດທະນາວຽກງານການສຶກສາ, ສ້າງພະນັກງານຜູ້ໜຸ່ມນ້ອຍ, ໃຫ້ສືບຕໍ່ພົວພັນຮ່ວມມືດ້ານຕ່າງໆກັບຕ່າງປະເທດ ແລະ ພັດທະນາພື້ນຖານໂຄງລ່າງຂອງການສຶກສາໃຫ້ດີຂຶ້ນເທື່ອລະກ້າວ.

Image may contain: 7 people, people standing and indoor

ໂອກາດດຽວກັນ, ທ່ານ ນາງ ແສງເດືອນ ຫຼ້າຈັນທະບູນ ໄດ້ກ່າວວ່າ: ພິທີປະກາດພະນັກງານການນຳຂັ້ນສູງອອກພັກການ-ຮັບອຸດໜູນບຳນານ ຈຳນວນ 2 ທ່ານ ຖືວ່າເປັນພິທີທີ່ກະທັດຮັດ ແລະ ມີຄວາມໝາຍອັນໜັກແໜ້ນຫຼາຍ, ຊຶ່ງທັງ 2 ທ່ານລ້ວນແຕ່ເປັນພະນັກງານອາວຸໂສ ແລະ ມີປະສົບການລະອິດລະອ້ຽວຫຼາຍ ລວມອາຍຸການທີ່ເຂົ້າສັງກັດລັດນີ້ຖືວ່າຢູ່ໃນໄລຍະຂອງການອຸທິດເຫື່ອແຮງໃຫ້ແກ່ວຽກງານການສຶກສາ, ການສ້າງຊັບພະຍາກອນມະນຸດ ແລະ ວຽກງານອື່ນໆຂອງປະເທດຊາດຢູ່ໃນທ້ອງຖິ່ນ ແລະ ສູນກາງ. ເຖິງຢ່າງໃດກໍຕາມ, ຕາງໜ້າຄະນະນຳກະຊວງສຶກສາທິການ ແລະ ກິລາ ຂໍສະແດງຄວາມຍ້ອງຍໍຊົມເຊີຍ ແລະ ຂອບໃຈຕໍ່ຜົນງານຄວາມດີຂອງທັງ 2 ທ່ານໄດ້ອຸທິດ ແລະ ປະກອບສ່ວນເຂົ້າໃນວຽກງານການສຶກສາ ແລະ ກິລາຂອງລາວໃຫ້ດີຂຶ້ນ. ສ່ວນຄຳເຫັນຂອງ 2 ທ່ານທີ່ໄດ້ປະກອບມານີ້ ແມ່ນຂໍໃຫ້ບັນດາການນຳ ແລະ ບັນດາຄະນະກົມ ພາຍໃນກະຊວງສຶກສາທິການ ແລະ ກິລາ ນຳໄປຄົ້ນຄວ້າ ປຶກສາຫາລືກັນ ພ້ອມກັນສືບຕໍ່ຈັດຕັ້ງປະຕິບັດ ແນໃສ່ເຮັດໃຫ້ວຽກງານການສຶກສາຂອງເຮົາເດີນແມ່ນແລ່ນສະດວກ ແລະ ພັດທະນາຂຶ້ນເປັນກ້າວໆ.

ບົວລະພາ












------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments