ປະຊາຊົນ 4ເຂດ 3ເມືອງ ແຂວງໄຊຍະບູລີ ໄດ້ຊົມໃຊ້ນໍ້າປະປາ


ພິທີມອບ-ຮັບການນໍາໃຊ້ນໍ້າປະປາ 4 ເຂດຄື: ເຂດບ້ານ ນາຫີນ ເມືອງແກ່ນທ້າວ, ເຂດສຸວັນນະພູມ ເມືອງປາກລາຍ, ເຂດບ້ານຕາກແດດ ເມືອງປາກລາຍ ແລະ ເຂດບ້ານບໍ່ແຕນເມືອງບໍ່ແຕນ ແຂວງໄຊຍະບູລີ ໄດ້ຈັດຂຶ້ນໃນວັນທີ່ 11 ມິຖຸນາ 2020 ນີ້ຢູ່ທີ່ຫ້ອງປະຊຸມເມືອງແກ່ນທ້າວແຂວງໄຊຍະບູລີ. ໂດຍໃຫ້ກຽດເຂົ້າຮ່ວມມີ ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ, ມີຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ຫົວໜ້າ, ຮອງຫົວໜ້າຫ້ອງການ, ມີຕາງໜ້າມູນນິທິ ອິດມິດເວດ ປະຈໍາລາວ ແລະ ຜູ້ໃຫ້ທຶນຈາກ KOICA ແລະ Charity Water ພ້ອມດ້ວຍອໍານາດການປົກຄອງນາຍບ້ານໃນ 4 ເຂດເຂົ້າຮ່ວມ.

Image may contain: one or more people, people standing, sky and outdoor

ທ່ານ ສົມປອງ ສິດທິວົງ ຫົວໜ້າກົມນໍ້າປະປາ ໄດ້ໃຫ້ຮູ້ວ່າ: ໂຄງການກໍ່ສ້າງນໍ້າປະປາ 4 ເຂດຂອງແຂວງໄຊຍະບູລີ ເປັນໂຄງການທີ່ນໍາໃຊ້ງົບປະມານຂອງມູນນິທິອິດມິດເວດ ງົບປະມານຂອງແຂວງ ແລະ ຂອງເອກະຊົນ ມີທັງໝົດ 1 ລ້ານ 441,062 ໂດລາສະຫະລັດ. ໃນນີ້ທຶນຂອງລັດສົມທົບ 60 ພັນໂດລາ, ທຶນຂອງມູນນິທິອິດມິດເວດ 277.000 ໂດລາ ແລະ ທຶນຂອງເອກະຊົນລົງທຶນ 1 ລ້ານ 109,062 ໂດລາ; ໂຄງການດັ່ງກ່າວມີປະຊາຊົນໄດ້ຮັບຜົນປະໂຫຍດມີ 16 ບ້ານ, 1987 ຄົນ ແລະ ມີ 3.897 ຄົວເຮືອນ. ໂຄງການກໍ່ສ້າງນໍ້າປະປາໃນ 4 ເຂດແມ່ນເລີ່ມມາແຕ່ເດືອນມີນາ 2019 ມາຮອດເດືອນ ມີນາ 2020 ແມ່ນສໍາເລັດໃຊ້ເວລາກໍ່ສ້າງ 1 ປີ ໃນນີ້ເຂດ ບ້ານນາຫີນ ເມືອງແກ່ນທ້າວ ມີມູນຄ່າກໍ່ສ້າງ 356.427 ໂດລາ, ມີກໍາລັງການຜະລິດ 30m3 ຕໍ່ຊົ່ວໂມງ, ມີປະຊາກອນໄດ້ຊົມໃຊ້ 4.247 ຄົນ ມີ 4 ບ້ານຄື: ບ້ານ ນາຫີນ, ບ້ານກ້ວຍແຂ້, ບ້ານ ດົງສາມແສນ ແລະ ບ້ານສາມຊົງ ຕິດຕັ້ງກົງເຕີແລ້ວ 134 ກົງເຕີ ໂດຍແມ່ນບໍລິສັດ ລັດວິສາຫະກິດນໍ້າປະປາແຂວງ ເປັນຜູ້ຮັບເໝົາກໍ່ສ້າງ.

Image may contain: 15 people, people standing and outdoor

ເຂດສຸວັນນະພູມເມືອງປສກລາຍ ມີກໍາລັງການຜະລິດ 75m3 ຕໍ່ຊົ່ວໂມງ ປະຊາຊົນໄດ້ຮັບຜົນປະໂຫຍດມີ 9.204 ຄົນ, ມີ 1689 ຫຼັງຄາເຮືອນ, ມີ 5 ບ້ານຄື: ບ້ານສຸບັນນະພູມ, ຫາດດ້າຍ, ບ້ານກາງ, ບ້ານທ່າປໍ ແລະ ບ້ານໂພນໄຊ ຕິດຕັ້ງກົງເຕີແລ້ວ 1.200 ກົງເຕີ ເຊິ່ງແມ່ນ ທ່ານ ໄຊຍາ ແສງກັນນາລີ ເປັນຜູ້ຮັບເໝາກໍ່ສ້າງ ໃນມູນຄ່າກໍ່ສ້າງທັງໝົດ 511,681 ໂດລາສະຫະລັດ, ເຂດບ້ານຕາກແດດ ເມືອງປາກລາຍ ມີກໍາລັງການຜະລິດ 30m3/ຊົ່ວໂມງ ປະຊາຊົນໄດ້ຮັບຜົນປະໂຫຍດມີ 3.427 ຄົນ, ມີ 3 ບ້ານຄື: ບ້ານຕາກແດດ, ບ້ານບຸ່ງມ່າ ແລະ ບ້ານແກ້ງສາວ ໂດຍບໍລິສັດສີປະເສີດກໍ່ສ້າງຂົວທາງເຄຫາສະຖານ ເປັນຜູ້ກໍ່ສ້າງມູນຄ່າ 294,727 ໂດລາສະຫະລັດ, ຕິດຕັ້ງກົງເຕີແລ້ວ 550 ກົງເຕີ, ເຂດບ້ານບໍ່ແຕນ ມີກໍາລັງການຜະລິດ 30m3/ຊົ່ວໂມງ ປະຊາຊົນໄດ້ຮັບຜົນປະໂຫຍດ 3.093 ຄົນ, ມີ 4 ບ້ານຄື: ບ້ານບໍ່ແຕນ, ບ້ານດອນສະຫວ່າງ, ບ້ານເຕົາເກືອ ແລະ ບ້ານໃຫຍ່ ໂດຍແມ່ນບໍລິສັດ ສີວິໄລ ກໍ່ສ້າງເປັນຜູ້ຮັບເໝົາກໍ່ສ້າງກໍ່ ມູນຄ່າ 288,277 ໂດລາ ຕິດຕັ້ງກົງເຕີແລ້ວ 175 ກົງເຕີ. ຈາກນັ້ນ ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ໃຫ້ກຽດກ່າວມອບໂຄງການນໍ້າປະປາໃນ 4 ເຂດ ໃຫ້ກຽດກ່າວຮັບຂອງ ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ພ້ອມທັງຮ່ວມກັນຕັດແຖບຜ້າ ແລະ ເປີດໃຊ້ນໍ້າປະປາ 4 ເຂດຂອງແຂວງໄຊຍະບູລີ ຢ່າງເປັນທາງການ.
ຂ່າວ: ບຸນທີ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments