ເປີດການຮຽນ-ການສອນຄືນ ໄປຄຽງຄູ່ກັບ ການເຂັ້ມງວດ ປ້ອງກັນການຕິດເຊື້ອໂຄວິດ-19



ບັນດາໂຮງຮຽນລ້ຽງເດັກ ແລະ ອະນຸບານ, ໂຮງຮຽນປະຖົມຊັ້ນ ປ1-ປ4, ໂຮງຮຽນມັດທະຍົມຊັ້ນ ມ1-ມ3, ມ5-ມ6, ປີສຸດທ້າຍຂອງວິທະຍາໄລອາຊີວະສຶກສາ, ວິທະຍາໄລຄູ ແລະ ມະຫາວິທະຍາໄລ ທົ່ວປະເທດ ນັບທັງພາກລັດ ແລະ ເອກະຊົນ ໄດ້ເລີ່ມເປີດການຮຽນ-ການສອນຄືນ ນັບແຕ່ວັນທີ 2 ມິຖຸນາ 2020 ເປັນຕົ້ນໄປ, ພ້ອມເນັ້ນມາດຕະການປ້ອງກັນການຕິດເຊື້ອພະຍາດໂຄວິດ-19 ຢ່າງເຂັ້ມງວດ ເປັນຕົ້ນ ການຮັກສາໄລຍະຫ່າງ, ການເພີ່ມຫ້ອງຮຽນຫລຸດຜ່ອນຄວາມແອອັດ, ໃຫ້ຄໍາແນະນໍານັກຮຽນກ່ຽວກັບຜົນຮ້າຍ ແລະ ຄວາມອັນຕະລາຍຂອງພະຍາດໂຄວິດ-19 ໄປພ້ອມໆກັບການເນັ້ນໃຫ້ການຮຽນ-ການສອນໃຫ້ມີຄຸນນະພາບ ແລະ ຈົບຕາມຫລັກສູດ.

Image may contain: 1 person, sitting and indoor

ທ່ານ ຄຳຫລ້າ ແອນພອນໄຊ ອຳນວຍການໂຮງຮຽນມັດທະຍົມຕອນຕົ້ນສີໄຄ ໄດ້ໃຫ້ສຳພາດວ່າ: ພາຍຫລັງທີ່ໄດ້ຮັບແຈ້ງການໃຫ້ເປີດການຮຽນ-ການສອນຄືນ, ພວກເຮົາກໍໄດ້ກະກຽມຄວາມພ້ອມໃນດ້ານຕ່າງໆ ເພື່ອຮັບປະກັນໃຫ້ການຮຽນ-ການສອນ ບັນລຸຕາມຄາດໝາຍທີ່ວາງໄວ້ ກໍຄື ຈົບຕາມຫລັກສູດ ແລະ ໄດ້ຄຸນນະພາບ, ໄປພ້ອມໆກັບການປະຕິບັດມາດຕະການປ້ອງກັນ ການຕິດເຊື້ອພະຍາດໂຄວິດ-19 ຂອງຄະນະສະເພາະກິດ ກໍຄື ກະຊວງສຶກສາທິການ ແລະ ກິລາ ວາງອອກ ຢ່າງເຂັ້ມງວດ, ເຊິ່ງການຈັດຕັ້ງການຮຽນ-ການສອນ ແມ່ນມີການຜັດປ່ຽນກັນໃນແຕ່ລະມື້ເຊັ່ນ: ມ1 ແລະ ມ2 ຮຽນວັນຈັນ, ພຸດ ແລະ ສຸກ, ສ່ວນ ມ3 ຮຽນວັນອັງຄານ, ພະຫັດ ແລະ ເສົາ, ທັງນີ້ ກໍເພື່ອຮັບປະກັນການຮັກສາໄລຍະຫ່າງຂອງນັກຮຽນ, ສ່ວນຊັ້ນ ມ4 ແລະ ມ7 ແມ່ນຮຽນປົກກະຕິ ຈັນ-ສຸກ ແຕ່ມີການເພີ່ມຫ້ອງຮຽນ. ພ້ອມກັນນັ້ນ ກໍໄດ້ເນັ້ນໃຫ້ຄູ-ອາຈານ ແລະ ນັກຮຽນທຸກຄົນ ໃສ່ຜ້າອັດປາກ-ດັງ, ໝັ່ນລ້າງມືດ້ວຍສະບູ ຫລື ເຈວລ້າງມື, ແທກອຸນຫະພູມທຸກໆມື້ກ່ອນເຂົ້າຮຽນ ແລະ ອະນາໄມສະຖານທີ່ເປັນປະຈຳ.

Image may contain: 4 people, people sitting, table and indoor

ທ່ານ ຄຳຫລ້າ ແອນພອນໄຊ ຍັງໃຫ້ຮູ້ອີກວ່າ: ເພື່ອຮັບປະກັນໃຫ້ການຮຽນໄດ້ຄຸນນະພາບ ພວກເຮົາໄດ້ເນັ້ນໃຫ້ຄູ-ອາຈານ ເອົາໃຈໃສ່ໃນການສິດສອນ ໂດຍໃຫ້ຄັດເອົາເນື້ອໃນໃຈຄວາມທີ່ສຳຄັນຂອງບົດຮຽນມາສອນໃຫ້ນັກຮຽນ ໝາຍຄວາມວ່າ ເຖິງຊິສອນໜ້ອຍ ແຕ່ຄຸນນະພາບແມ່ນສ່ຳກັບຮຽນປົກກະຕິ, ພ້ອມກັນນັ້ນ ກໍເພີ່ມວຽກບ້ານໃຫ້ຫລາຍຂຶ້ນ ແລະ ແນະນຳຜູ້ຄອງໃຫ້ເອົາໃຈໃສ່ຊ່ວຍອີກ ໃນການສິດສອນຢູ່ເຮືອນ ລວມທັງໄດ້ເນັ້ນໃຫ້ນັກຮຽນ ເອົາໃຈໃສ່ໃນການຮຽນໃຫ້ຫລາຍຂຶ້ນ.

Image may contain: 1 person, sitting

ຂະນະດຽວກັນ, ທ່ານ ພອນສະຫວັນ ບຸນພະທີ ອຳນວຍການໂຮງຮຽນມັດທະຍົມຕອນປາຍທົ່ງປົ່ງ ກໍໄດ້ກ່່າວຕໍ່ຜູ້ສື່ຂ່າວວ່າ: ຄູ-ອາຈານພວກເຮົາ ແມ່ນດີໃຈທີ່ໄດ້ເຫັນນັກຮຽນ, ນັກສຶກສາ ກໍຄື ລູກຫລານເຍົາວະຊົນລາວ ໄດ້ກັບມາຮຽນໜັງສືຄືນ ພາຍຫລັງຢຸດພັກຊົ່ວຄາວມາເປັນເວລາດົນສົມຄວນ. ເນື່ອງຈາກວ່າເລລາພັກຮຽນດົນເກີນໄປ ຢ້ານນັກຮຽນລືມບົດຮຽນ, ລວມທັງເຮັດໃຫ້ການຮຽນ-ການສອນບໍ່ຈົບຕາມຫລັກສູດ ເຊິ່ງຈະເຮັດໃຫ້ຄຸນນະພາບການສຶກສາຂອງເຮົາຕ່ຳລົງ. ເມື່ອເປີດການຮຽນ-ການສອນຄືນໃໝ່ແລ້ວ ພວກເຮົາ ໄດ້ເນັ້ນການຈັດຕັ້ງປະຕິບັດມາດຕະການປ້ອງກັນການຕິດເຊື້ອ ຕາມຄະນະສະເພາະກິດວ່າງອອກຢ່າງເຂັ້ມງວດ, ພ້ອມທັງຮັກສາໄລຍະຫ່າງ 1 ແມັດຂຶ້ນໄປ, ໃສ່ຜ້າອັດປາກ-ດັງ, ຜັດປ່ຽນກັນຮຽນແຕ່ລະມື້ສຳລັບ ມ5 ແລະ ມ6 ແລະ ມາດຕະການອື່ນໆ, ທັງນີ້ ກໍເພື່ອປ້ອງກັນບໍ່ໃຫ້ນັກຮຽນຕິດເຊື້ອພະຍາດໂຄວິດ-19 ເພື່ອປະກອນສ່ວນຊ່ວຍພັກ-ລັດຖະບານ ໃນການຫລຸດຜ່ອນຄວາມສ່ຽງໃນການຕິດເຊື້ອພະຍາດດັ່ງກ່າວ.



ຂ່າວ-ພາບ: ສິງຄຳ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments