ເມືອງແກ່ນທ້າວ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ, ວັນສິ່ງແວດລ້ອມໂລກ ແລະ ວັນຕ້ານການໃຊ້ແຮງງານເດັກສາກົນ


ພິທີ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ, ວັນສິ່ງແວດລ້ອມໂລກ ແລະ ວັນຕ້ານການໃຊ້ແຮງງານເດັກສາກົນ ຢູ່ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນວັນທີ 2 ມິຖຸນາ 2020 ນີ້, ທີ່ສະໂມສອນຂອງເມືອງ. ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີ ເລຂາພັກເມືອງ, ເຈົ້າເມືອງແກ່ນທ້າວ, ມີກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ກົມກອງ, ອົງການຈັດຕັ້ງ, ລັດວິສາຫະກິດ, ດ່ານສາກົນ, ບໍລິສັດ, ທະນາຄານ, ພະນັກງານ, ທະຫານ, ຕໍາຫຼວດ, ປະທານສະມາຄົມບໍານານ, ນັກທຸລະກິດຜູ້ປະກອບການ, ນາຍບ້ານເທດສະບານພ້ອມດ້ວຍຄະນະເຂົ້າຮ່ວມຢ່າງຫຼວງຫຼາຍ.

Image may contain: 1 person, standing, tree, plant and outdoor


ໃນພິທີ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ເຊິ່ງພັກ ແລະ ລັດຖະບານ ໄດ້ມີແຜນນະໂຍບາຍໃນການປູກປ່າ ແລະ ຟື້ນຟູປ່າໄມ້ ຮອດປີ 2020 ທົ່ວປະເທດຕ້ອງໃຫ້ມີເນື້ອທີ່ປ່າໄມ້ປົກຫຸ້ມກວມເອົາ 70 % ສະເພາະເມືອງແກ່ນທ້າວໃຫ້ໄດ້ 47 % ໃນປີ 2020 ມີແຜນປູກໄມ້ໃຫ້ເປັນປ່າ ໃນເນື້ອທີ 37,66 ເຮັກຕາ, ໃນນີ້ປ່າສະຫງວນຂອງແຂວງ 7,16 ເຮັກຕາ ແລະ ແບ່ງຄວາມຮັບຜິດຊອບໃຫ້ແຕ່ລະບ້ານພາຍໃນເມືອງປູກ ເປັນຂອງລວມໝູ່, ຄອບຄົວ 30,50 ເຮັກຕາ ແລະ ເລົ່າຄືນປະຫວັດຄວາມເປັນມາຂອງວັນເດັກນ້ອຍສາກົນ ວັນທີ 1 ມິຖຸນາ, ວັນສິ່ງແວດລ້ອມໂລກ ວັນທີ 5 ມິຖຸນາ ແລະ ວັນຕ້ານການໃຊ້ແຮງງານເດັກສາກົນ ວັນທີ 12 ມິຖຸນາ ໃຫ້ໄດ້ຮັບຮູ້ຄວາມສໍາຄັນຂອງວັນດັ່ງກ່າວ ແລະ ທ່ານຍັງໄດ້ຮຽກຮ້ອງມາຍັງບັນດາການຈັດຕັ້ງທຸກຂັ້ນ, ທຸກພາກສ່ວນ ນັບທັງພາກລັດ ແລະ ພາກເອກະຊົນຈົ່ງໄດ້ຍົກສູງນ້ຳໃຈຮັບຜິດຊອບຂອງຕົນໃຫ້ສູງກວ່າເກົ່າ ເຮັດໜ້າທີ່ວຽກງານນີ້ໃຫ້ກາຍເປັນຂອງທົ່ວປວງຊົນ, ເຮັດໃຫ້ແຜນການປູກໄມ້ປະຈຳປີນີ້ ໄດ້ຮັບການຈັດຕັ້ງປະຕິບັດຢ່າງມີໝາກຜົນ ແລະ ບັນລຸໄດ້ຕາມແຜນການທີ່ວາງໄວ້, ຮັບປະກັນໃຫ້ໄດ້ທັງປະລິມານ ແລະ ຄຸນນະພາບ, ເຮັດໃຫ້ເມືອງແກ່ນທ້າວຫຸ້ມລ້ອມໄປດ້ວຍຕົ້ນໄມ້ ທີ່ມີຄວາມຂຽວສົດງົດງາມຕະຫຼອດປີ.

Image may contain: 7 people, people standing, tree, wedding, outdoor and nature

ຜູ້ເປັນພໍ່ເປັນແມ່ກໍ່ຕ້ອງເອົາໃຈໃສ່ເບິ່ງແຍງດູແລລູກຫຼານຂອງຕົນໃຫ້ດີ, ຄູ-ອາຈານ ຕ້ອງເອົາໃຈໃສ່ໃນການສິດສອນ, ໝັ່ນຄົ້ນຄ້ວາແຕ່ງບົດສອນຖ່າຍທອດບົດຮຽນອັນດີ, ອັນກ້າວໜ້າໃຫ້ແກ່ລູກຫຼານນັກຮຽນ ສ້າງໃຫ້ເຂົາເຈົ້າມີຄວາມຮູ້ຄວາມສາມາດ, ເປັນຜູ້ສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຂຶ້ນໄປເລື້ອຍໆ. ເອົາໃຈໃສ່ໃນການປູກຈິດສຳນຶກໃຫ້ປະຊາຊົນ ຮູ້ປົກປັກຮັກສາສິ່ງແວດລ້ອມ ເປັນຕົ້ນແມ່ນການຖີ້ມສິ່ງເສດເຫຼືອແບບຊະຊາຍ, ການປ່ອຍນ້ຳເນົ່າ, ນ້ຳເໝັນໃສ່ຖະໜົນຫົນທາງ ແລະ ຫ້ວຍນ້ຳ ເພື່ອບໍ່ໃຫ້ມີກິ່ນເໝັນ ສ້າງຄວາມລຳຄານແກ່ຄົນອື່ນ ກໍຄືການສົ່ງຜົນກະທົບຕໍ່ສິ່ງແວດລ້ອມ ແລະ ທ່ານຍັງໄດ້ຮຽກຮ້ອງໃຫ້ບັນດາອົງການຈັດຕັ້ງ ທັງພາກລັດ ແລະ ເອກະຊົນ ຕະຫຼອດເຖິງປະຊາຊົນທຸກຊັ້ນຄົນ ຈົ່ງຍົກສູງຄວາມຮັບຜິດຊອບຂອງຕົນ ເພີ່ມທະວີ ອອກແຮງຈັດຕັ້ງປະຕິບັດວຽກງານກ່ຽວຂ້ອງກັບເດັກ ເພື່ອຮັບປະກັນການດູແລເອົາໃຈໃສ່, ການພັດທະນາ, ການປົກປ້ອງ ແລະ ການມີສ່ວນຮ່ວມຂອງເດັກ ທີ່ເປັນລູກຫຼານເຮົາໃຫ້ມີໄວເດັກທີ່ສົດໃສ ເພື່ອກ້າວເປັນຜູ້ໃຫຍ່ ທີ່ມີອານາຄົດ, ເປັນກຳລັງຕົ້ນຕໍຂອງຊາດ ໃນການປະກອບສ່ວນນຳເອົາປະເທດຊາດໃຫ້ຫລຸດພົ້ນຈາກຄວາມດ້ອຍພັດທະນາ.ຈາກນັ້ນ, ທ່ານ ເຈົ້າເມືອງແກ່ນທ້າວ ຍັງໄດ້ຢອດຢາໃຫ້ເດັກນ້ອຍ ແລະ ນໍາພາປູກຕົ້ນໄມ້ຢູ່ເດີ່ນໜ້າຫ້ອງວ່າການເມືອງຕື່ມອີກ.

Image may contain: one or more people, people standing, sky, tree, outdoor and nature


ເນື່ອງໃນໂອກາດສະເຫຼີມສະຫຼອງວັນສິ່ງແວດລ້ອມໂລກ ເມືອງແກ່ນທ້າວຍັງໄດ້ສ້າງຂະບວນການ ອານາໄມເກັບຂີ້ເຫຍື້ອຕາມເສັ້ນທາງພາຍໃນເທດສະບານເມືອງ ເພື່ອໃຫ້ສອດຄ່ອງກັບຄຳຂັວນ “ ທີ່ວ່າ: ຫຼຸດຜ່ອນ ປຼະສະຕິກ ຫຼຸດຜ່ອນມົນລະພິດ” ແລະ “ຈົ່ງພ້ອມກັນປົກປັກຮັກສາທຳມະຊາດ ເພື່ອແຫຼ່ງນໍ້າ”

Image may contain: one or more people, people walking, people standing, sky, tree and outdoor

Image may contain: one or more people, outdoor and nature













------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments