ດ່ານສາກົນຂົວມິດຕະພາບ ລາວ-ໄທ ແຫ່ງທີ 2 ວາງມາດຕະການເຂັ້ມງວດຕໍ່ແຮງງານລາວ ທີ່ເດີນທາງກັບຄືນປະເທດ



ແຂວງສະຫວັນນະເຂດ ເປັນແຂວງໜຶ່ງ ທີ່ມີແຮງງານລາວ ໄປເຮັດວຽກຢູ່ປະເທດເພື່ອນບ້ານ ເດີນທາງເຂົ້າມາຫລາຍພໍສົມຄວນ, ເຊິ່ງນັບແຕ່ຕົ້ນເດືອນມິຖຸນາ 2020 ເປັນຕົ້ນມາ ມີແຮງງານລາວ ເດີນທາງເຂົ້າມາຜ່ານແຂວງສະຫວັນນະເຂດ ເກືອບ 2.000 ຄົນ ຕໍ່ສະພາບການດັງກ່າວ, ດ່ານສາກົນຂົວມິດຕະພາບ ລາວ-ໄທ ແຫ່ງທີ 2 ສະຫວັນນະເຂດ-ມຸກດາຫານ ກໍໄດ້ເອົາໃຈໃສ່ເຮັດໜ້າທີ່ ໃນການກວດກາ, ກັ່ນກອງ, ວັດແທກອຸນຫະພູມ ໃຫ້ຖືກຕ້ອງຕາມຂັ້ນຕອນ, ຕາມມາດຕະການປ້ອງກັນການຕິດເຊື້ອໂຄວິດ-19 ຂອງຄະນະສະເພາະກິດວາງອອກຢ່າງເຄັ່ງຄັດ.

Image may contain: one or more people and people sitting

ທ່ານ ພັນຕີ ສັງວານ ແກ້ວບຸນຊູ ຮອງຫົວໜ້າດ່ານ ຕມ ສະຫວັນນະເຂດ-ມຸກດາຫານ ລາຍງານໃຫ້ຮູ້ເມື່ອບໍ່ດົນມານີ້ວ່າ: ປັດຈຸບັນ ຍັງມີແຮງງານລາວ ທີ່ເຮັດວຽກຢູ່ປະເທດເພື່ອນບ້ານ ຖະຍອຍ ເດີນທາງເຂົ້າມາ ຜ່ານດ່ານສາກົນຂົວມິດຕະພາບ ລາວ-ໄທ ແຫ່ງທີ 2 ໃນແຕ່ລະວັນ, ເຈົ້າໜ້າທີ່ ທຸກພາກສ່ວນພາຍໃນດ່ານ ກໍໄດ້ເອົາໃຈໃສ່ກວດກາ, ກັ່ນກອງແຮງງານລາວ ທີ່ເດີນທາງເຂົ້າມາຢ່າງເຄັ່ງຄັດ ຫລັງຈາກນັ້ນ ກໍນໍາເອົາແຮງງານດັ່ງກ່າວ, ໄປກັກກັນຢູ່ສູນກັກກັນຊົ່ວຄາວຂອງແຂວງ, ສ່ວນການຂົນສົ່ງສິນຄ້າພາຍໃນດ່ານ ແມ່ນເຂົ້າ-ອອກ ເປັນປົກກະຕິ ແຕ່ຕ້ອງເອົາໃຈໃສ່ຕໍ່ມາດຕະການປ້ອງກັນ, ຄວບຄຸມການແຜ່ລະບາດ, ລົດບັນທຸກແຕ່ລະຄັນ ຕ້ອງໄດ້ຜ່ານການພົ່ນຢາຂ້າເຊື້ອ, ຕ້ອງໄດ້ຜ່ານການກວດກາ ແລະ ວັດແທກອຸນຫະພູມ, ຜູ້ຂັບຂີ່ລົດບັນທຸກສິນຄ້າທຸກຄັນ ກຳນົດໃຫ້ 2 ຄົນຕໍ່ 1 ຄັນ.

Image may contain: outdoor

ທ່ານ ພັນຕີ ສັງວານ ແກ້ວບຸນຊູ ຍັງໄດ້ຮຽກຮ້ອງເຖິງແຮງງານລາວ ທີ່ເຮັດວຽກຢູ່ປະເທດເພື່ອນບ້ານແບບຖືກກົດໝາຍ ແລະ ບໍ່ຖືກກົດໝາຍ ທີ່ມີຄວາມຕ້ອງການຢາກຈະເດີນທາງເຂົ້າມາ ສປປ ລາວ ໃຫ້ເດີນທາງເຂົ້າມາແບບຖືກກົດໝາຍ (ບໍ່ໃຫ້ລັກລອບເຂົ້າມາແບບຜິດກົດໝາຍ) ບໍ່ໃຫ້ວິຕົກກັງວົນ ວ່າເຈົ້າໜ້າທີ່ ຈະປັບໃໝ ຫລື ລົງໂທດ, ເຈົ້າໜ້າທີ່ ຢືນຢັນວ່າ ຈະບໍ່ມີການປັບໃໝ, ໃສ່ໂທດ ແຮງງານລາວ ທີ່ເດີນທາງເຂົ້າມາແບບຖືກຕ້ອງແຕ່ຢ່າງໃດ, ພຽງແຕ່ໃຫ້ປະຕິບັດຕາມມາດຕະການປ້ອງກັນການຕິດເຊື້ອໂຄວິດ-19 ທີ່ທາງຄະນະສະເພາະກິດ ວາງອອກຢ່າງເຄັ່ງຄັດ.

ຂ່າວ-ພາບ: ທະນູທອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments