ກະຊວງ ຖວທ ຂອບໃຈ ທຸກພາກສ່ວນທີ່ສະໜັບສະໜູນໃນການໂຄສະນາວິທີປ້ອງກັນການຕິດເຊື້ອພະຍາດໂຄວິດ-19


ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ສະແດງຄວາມຂອບໃຈຕໍ່ອົງການອຸຍນີເຊັບ ປະຈຳ ສປປ ລາວ ແລະ ອົງການຈັດຕັ້ງຕ່າງໆ ທີ່ໃຫ້ການສະໜັບສະໜູນຂະແໜງສື່ມວນຊົນລາວ ຕະຫລອດໄລຍະຜ່ານມາ ນັບທັງດ້ານວິຊາການ, ວັດຖຸອຸປະກອນ ແລະ ງົບປະມານ ເພື່ອສົ່ງເສີມໃນການໂຄສະນາ ແນະນຳວິທີປ້ອງກັນການຕິດເຊື້ອພະຍາດໂຄວິດ-19 ຢ່າງຕໍ່ເນື່ອງ. ຂະນະດຽວກັນ ກໍໄດ້ເນັ້ນໃຫ້ບັນດາສື່ມວນຊົນທຸກຂົງເຂດ ຈົ່ງນຳເອົາຂໍ້ມູນຂ່າວສານທີ່ເປັນປະໂຫຍດ ໄປເຜີຍແຜ່ອອກທຸກຊ່ອງທາງຂອງສື່ ແລະ ສືບຕໍ່ໂຄສະນາໃຫ້ແກ່ພໍ່ແມ່ປະຊາຊົນບັນດາເຜົ່າ ແລະ ນັກຮຽນນັກສຶກສາຕະຫລອດເຖິງເດັກນ້ອຍ ໃຫ້ຮັບຮູ້ເຖິງວິທີການປ້ອງກັນການຕິດເຊື້ອ ແລະ ນຳເອົາໄປປະຕິບັດຢ່າງເຂັ້ມງວດ.



ໃນໂອກາດເຂົ້າຮ່ວມກອງປະຊຸມ ການມີສ່ວນຮ່ວມຂອງສື່ມວນຊົນໃນການໂຄສະນາ “ກັບເຂົ້າໂຮງຮຽນຢ່າງປອດໄພ” ໃນວັນທີ 5 ມິຖຸນາ 2020, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ສື່ມວນຊົນເຮົາໄດ້ເຮັດບົດບາດຂອງຕົນ ໂດຍຮ່ວມແຮງຮ່ວມໃຈກັນ ປະຕິບັດໜ້າທີ່ການໂຄສະນາ ຕິດຕາມສະພາບການການລະບາດຂອງພະຍາດໂຄວິດ ທັງພາຍໃນ ແລະ ຕ່າງປະເທດ, ຕິດຕາມ ແລະ ເຄື່ອນໄຫວ ເອົາຂ່າວທຸກເຫດການ, ກິດຈະກຳຕ່າງໆ ຂອງຄະນະສະເພາະກິດ. 




ເຖິງແມ່ນວ່າການປະຕິບັດໜ້າທີ່ແຕ່ລະມື້ນັ້ນ ອາດມີຄວາມສ່ຽງສູງທີ່ຈະຕິດເຊື້ອພະຍາດໂຄວິດ-19 ກໍຕາມ ແຕ່ກໍາລັງສື່ມວນຊົນ ກໍມີຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນ ທັງປ້ອງກັນຕົນເອງຢ່າງດີ ເພື່ອບໍ່ໃຫ້ຕິດເຊື້ອພະຍາດ, ທັງເຄື່ອນໄຫວຕິດຕາມເອົາຂ່າວໃນສະຖານທີ່ຕ່າງໆຕະຫລອດວັນ ເພື່ອໂຄສະນາແນະນຳວິທີປ້ອງກັນການຕິດເຊື້ອພະຍາດໂຄວິດ-19 ອອກທຸກຊ່ອງທາງ ຄື: ໂທລະພາບ, ວິທະຍຸ, ໜັງສືພິມ, ສື່ອອນລາຍ ຮອດໂທລະໂຄ່ງປະຈຳບ້ານ ເພື່ອໃຫ້ພໍ່ແມ່ປະຊາ ຊົນບັນດາເຜົ່າ ຮັບຮູ້ເຖິງຜົນອັນຕະລາຍ ແລະ ຮູ້ເຖິງວິທີປ້ອງກັນຕົນເອງ ແລະ ຄອບຄົວ ຈາກພະຍາດດັ່ງກ່າວ. ໃນເວລາດຽວກັນ ສື່ມວນຊົນພວກເຮົາຍັງໄດ້ຮັບຜິດຊອບ ຕິດຕາມສື່ສັງຄົມອອນລາຍຕ່າງໆ ທີ່ໂຄສະນາ, ເຜີຍແຜ່ ແລະ ສົ່ງຂໍ້ມູນຂ່າວສານ ທີ່ບິດເບືອນຄວາມເປັນຈິງ ເພື່ອແນະນຳໃຫ້ສັງຄົມມີສະຕິກວດສອບໃນການຮັບຂໍ້ມູນຂ່າວສານ.



ກອງປະຊຸມດັ່ງກ່າວ, ຍັງໄດ້ເນັ້ນໜັກການໃຫ້ຂໍ້ມູນຂ່າວສານ ແກ່ສື່ມວນຊົນດ້ານມາດຕະການຄວາມປອດໄພຕ່າງໆ ຕໍ່ການເປີດເຂົ້າຮຽນຄືນຂອງນັກຮຽນ, ນັກສຶກສາ ແລະ ເດັກກ່ອນໄວຮຽນ ອີງຕາມຄຳແນະນຳ ກ່ຽວກັບການປະຕິບັດງານຂອງໂຮງຮຽນປອດໄພໃນທົ່ວໂລກ ເພື່ອສືບຕໍ່ໂຄສະນາເຜີຍແຜ່ໃຫ້ສັງຄົມໄດ້ຮັບຮູ້.




ຂ່າວ-ພາບ: ສິງຄຳ

















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments