ເຈົ້າແຂວງສະຫວັນນະເຂດ ຕ້ອນຮັບການເຂົ້າຢ້ຽມຢາມຂອງທ່ານເອກອັກຄະລາຊະທູດ ສະຫະລັດອາເມລິກາ ປະຈຳ ສປປ ລາວ.



ຕອນເຊົ້າວັນທີ 29 ກໍລະກົດ 2020 ນີ້. ທີ່ຫ້ອງຮັບແຂກຫ້ອງວ່າການປົກຄອງແຂວງ ທ່ານ ສັນຕິພາບ ພົມວິຫານ ເຈົ້າແຂວງ ສະຫວັນນະເຂດໄດ້ຕ້ອນຮັບການເຂົ້າຢ້ຽມຢາມຂອງທ່ານ ປອ ປີເຕີ ເຮມ້ອນ ເອກອັກຄະລາຊະທູດແຫ່ງສະຫະລັດອາເມລິກາປະຈຳ ສປປລາວ ໃນໂອກາດທີ່ເດີນທາງມາເຮັດວຽກຢູ່ແຂວງສະຫວັນນະເຂດ.

Image may contain: 6 people, people sitting and indoor

ໂອກາດນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ລາຍງານສະພາບ,ຈຸດພິເສດແລະທ່າແຮງໃນການພັດທະນາເສດຖະກິດຂອງແຂວງ,ເຊິ່ງເປັນແຂວງທີ່ໃຫຍ່,ມີເນື້ອທີ່ທຳການຜະຫຼິດກວ້າງຂວາງ,ໃນປີຜ່ານມາສາມາດຜະຫຼິດເຂົ້າກຸ້ມກິນແລະສົ່ງຂາຍອອກຕ່າງປະເທດ ແລະ ມີສ່ວນແຮໄວ້ອີກຈຳນວນໜຶ່ງ.ອີກດ້ານໜຶ່ງແມ່ນຕັ້ງຢູ່ໃນແລວທາງເສດຖະກິດຕາເວັນອອກ-ຕາເວັນຕົກຕາມເສັ້ນທາງເລກທີ 9, ມີເຂດເສດຖະກິດພິເສດສະຫວັນ-ເຊໂນ,ເຊິ່ງເປັນທີ່ສົນໃຈຂອງນັກລົງທຶນພໍສົມຄວນ,ປະຈຸບັນມີນັກລົງທຶນຈາກຫຼາຍປະເທດໄດ້ມາລົງທຶນໃນເຂດດັ່ງກ່າວ.ໂດຍລວມການພັດທະນາເສດຖະກິດແມ່ນມີການຂະຫຍາຍຕົວດີ.ສ່ວນທີ່ຍັງມີຄວາມຫຍຸ້ງຍາກແມ່ນບັນດາພື້ນຖານໂຄງລ່າງ,ລະບົບເສັ້ນທາງຄົມະນາຄົມຢູ່ໃນບັນດາເມືອງ ລົງຫາບ້ານ, ສ່ວນເນື້ອທີ່ການຜະລິດແມ່ນມີຫຼາຍແຕ່ບໍ່ມີແຫຼ່ງນ້ຳຕອບສະໜອງແລະກໍ່ຍັງມີຫຼາຍດ້ານທີ່ຍັງບໍ່ທັນບັນລຸຄາດໝາຍ.ປະຈຸບັນຍັງດຳເນີນຫຼາຍໂຄງການ ເພື່ອແກ້ໄຂຄວາມທຸກຍາກຂອງປະຊາຊົນ.

Image may contain: 2 people, people sitting, living room and indoor

ຈາກນັ້ນທ່ານ ປອ ປີເຕີ ເຮມ້ອນ ໄດ້ສະແດງຄວາມຊົມເຊີຍຕໍ່ການພັດທະນາເສດຖະກິດ-ສັງຄົມຂອງແຂວງ ສ.ຂ ທີ່ມີການເຕີບໂຕ ແລະເຂັ້ມແຂງ,ຊົມເຊີຍຕໍ່ການນຳແຂວງ ກໍ່ຄືລັດຖະບານລາວ ທີ່ເອົາໃຈໃສ່ປະຕິບັດມາດຕະການ ປ້ອງກັນ ການແຜ່ລະບາດຂອງພະຍາດ ໂຄວິດ 19,ທ່ານໄດ້ສະແດງຄວາມຂອບໃຈຕໍ່ລັດຖະບານລາວ ກໍ່ຄືການນຳທຸກຂັ້ນ ທີ່ໃຫ້ການຮ່ວມມື ຂອງໂຄງການຕ່າງໆ ທີ່ສະຫະລັດນໍາເຂົ້າມາສະໜັບສະໜູນ,ໂດຍສະເພາະກໍ່ແມ່ນ ໂຄງການອາຫານກາງເວັນຂອງນັກຮຽນ ບ້ານເປົ້າໝາຍ,ໂຄງການ ຊອກຄົ້ນຫາສິ່ງເສດເຫຼືອຂອງທະຫານອາເມລິກາທີ່ເສຍຊິວິດໃນປາງສົງຄາມ,ແຕ່ກໍ່ຍັງມີຫຼາຍໂຄງການທີ່ຈະສືບຕໍ່ ເປັນຕົ້ນ ໂຄງການເກັບກູ້ລະເບີດທີ່ບໍ່ທັນແຕກ,ໂຄງການຕ້ານການຄ້າມະນຸດ,ການຄ້າຂາຍສິ່ງເສບຕິດ,ໂຄງການສົ່ງເສີມທຸລະກິດຂະໜາດກາງ ແລະຂະໜາດນ້ອຍ ເພື່ອຈະໃຫ້ສິນຄ້າຂອງລາວສາມາດສົ່ງອອກໄດ້ຫຼາຍຂຶ້ນ.
















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments