ແຂວງບໍ່ແກ້ວ ໄຂກອງປະຊຸມຄົບຄະນະບໍລິຫານງານພັກແຂວງເປີດກວ້າງ ຄັ້ງທີ 11 ສະໄໝທີ V


ວັນທີ 23 ກໍລະກົດ 2020 ນີ້ ແຂວງບໍ່ແກ້ວ ໄຂກອງປະຊຸມຄົບຄະນະບໍລິຫານງານພັກແຂວງເປີດກ້ວາງຄັ້ງທີ 11 ສະໄໝທີ V ໂດຍການເປັນປະທານຂອງ ສະຫາຍ ປອ ບົວຄົງ ນາມມະວົງ ກຳມະການສຳຮອງສູນການພັກ ເລຂາພັກແຂວງເຈົ້າແຂວງບໍ່ແກ້ວ, ມີຮອງເລຂາພັກແຂວງ, ຄະປະຈຳພັກແຂວງ, ກຳມະການພັກແຂວງ, ເຈົ້າເມືອງ 5 ເມືອງ, ຫົວໜ້າ, ຮອງຫົວໜ້າພະແນກການອ້ອມຂ້າງແຂວງເຂົ້າຮ່ວມ.



ສະຫາຍ ປອ ບົວຄົງ ນາມມະວົງ ເຈົ້າແຂວງບໍ່ແກ້ວ ກ່າວວ່າ: ການດຳເນີນກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 11 ສະໄໝທີ V. ແມ່ນໄລຍະທີ່ແຂວງບໍ່ແກ້ວ ພວກເຮົາໄດ້ສຸມໃສ່ ໄລຍະທ້າຍແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດສັງຄົມແຫ່ງຊາດຄັ້ງທີ 8. ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ(ແຕ່ປີ 2016-2020). ແລະ ເປັນຊ່ວງໄລຍະທີ່ທົ່ວປະເທດເຮົາພວມສຸມໃສ່ສືບຕໍ່ປ້ອງກັນ, ສະກັດກັ້ນ ການແຜ່ລະບາດພະຍາດໂຄວິດ 19, ອັນພິເສດແມ່ນໄລຍະທີ່ພວກເຮົາ ຂຸ້ນຂ້ຽວຫ້າງຫາ, ກະກຽມດຳເນີນກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ VI ຢ່າງເປັນຂະບວນຟົດຟື້ນ, ເຊິ່ງກອງປະຊຸມຈະໄດ້ລົງເລິກ ບາງເນື້ອໃນອັນຕົ້ນຕໍຄື:ຈະໄດ້ພ້ອມກັນສະຫຼຸບຕີລາຄາ ການຊີ້ນຳ-ນຳພາ ຈັດຕັ້ງປະຕິບັດວຽກງານຮອບດ້ານໃນ 6ເດືອນຕົ້ນປີ ແລະ ວາງໜ້າທີ່ວຽກງານຈຸດສຸມ 6 ເດືອນທ້າຍປີ 2020.ພ້ອມກັນຄົ້ນຄວ້າ ການກະກຽມດຳເນີນກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີVI ເຊິ່ງຈະໄດ້ລົງເລິກທັງ 3 ດ້ານຄື: ທາງດ້ານຂະບວນການ, ດ້ານເນື້ອໃນ, ບຸກຄະລາກອນ ແລະໃຫ້ດຳເນີນກອງປະຊຸມໃຫຍ່ ຕາມກໍານົດເວລາທີ່ໄດ້ກຳນົດໄວ້.ຈະໄດ້ປະຕິບັດການຍ້ອງຍໍ, ການປະກາດພະນັກງານການນຳຮັບນະໂຍບາຍເບ້ຍບໍານານ.ຊຶ່ງບັນດາເນື້ອໃນທີ່ກ່າວມານັ້ນ ລ້ວນແຕ່ເປັນບັນຫາທີ່ສໍາຄັນ, ສະນັ້ນຈຶ່ງ ຂໍຮຽກຮ້ອງມາຍັງບັນດາສະຫາຍຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບຂອງຕົນ ເຂົ້າໃນການຄົ້ນຄວ້າ, ປະກອບຄຳເຫັນ ຕໍ່ກັບແຕ່ລະບັນຫາໃຫ້ຈະແຈ້ງ, ມີເນື້ອໃນອັນເລິກເຊິ່ງ ແລະ ຄົບຖ້ວນ.


Image may contain: 1 person, stripes


ສະຫາຍ ຄຳກິ່ງ ເອື້ອຍມະນີຮັກ ຮອງເລຂາພັກແຂວງ ຮອງເຈົ້າແຂວງໄດ້ສະຫຼູບ ການຈັດຕັ້ງປະຕິບັດວຽກງານ 6ເດືອນຕົ້ນປີ ແລະ ທິດທາງແຜນການ 6ເດືອນທ້າຍປີ 2020,ທົ່ວເເຂວງ ມີ 85 ຄະນະພັກຮາກຖານມີ 566ໜ່ວຍພັກ, ມີໜ່ວຍພັກປອດໃສ, ເຂັ້ມແຂງ, ໜັກແໜ້ນ 332 ໜ່ວຍພັກ; ສ້າງມະຫາຊົນຜູ້ກ້າວໜ້າເຂົ້າເປັນສະມາຊິກພັກສໍາຮອງໄດ້ 119 ສະຫາຍ (ໃນນີ້ພະແນກການອ້ອມຂ້າງເເຂວງ 38 ສະຫາຍ; ບັນດາເມືອງ 5 ເມືອງໄດ້ 81 ສະຫາຍ) ແລະ ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນໄດ້ 178 ສະ ຫາຍ; ປັດຈຸບັນມີສະມາຊີກພັກທັງໝົດ 9.272 ສະຫາຍ; ສໍາເລັດກອງປະຊຸມໃຫຍ່ຂອງຄະນະພັກຮາກຖານອ້ອມຂ້າງແຂວງ 82ຄະນະຮາກຖານ, 559 ໜ່ວຍພັກ; ສໍາເລັດກອງປະຊຸມໃຫຍ່ອົງຄະນະພັກກອງບັນຊາການ ປກຊ-ປກສ ແຂວງ,ໄດ້ມອບບັດໃຫ້ສະມາຊິກພັກສົມບູນໄດ້ ຈຳນວນ 6.252 ສະຫາຍ, ຍິງ 1.420 ສະຫາຍ ແລະ ສໍາເລັດກອງປະຊຸມໃຫຍ່ຜູ້ແທນຂອງ 3 ອົງການຈັດຕັ້ງມະຫາຊົນ.


Image may contain: 4 people, people sitting, table and indoor


ອັດຕາການເຕີບໂຕຂອງລວມຍອດຜະລິດຕະພັນພາຍໃນ GDP 3.323,44 ຕື້ກີບ, ເສດຖະກິດຂະຫຍາຍຕົວໃນລະດັບ 4,5%, ທຽບໃສ່ແຜນການປະຕິບັດໄດ້ 69,23%, ສະເລ່ຍລາຍຮັບຕໍ່ຫົວຄົນປະຕິບັດໄດ້1.895,08 ໂດລາສະຫະລັດ/ຄົນ/ປີ ໃນນັ້ນ:ຂະແໜງກະສິກຳ-ປ່າໄມ້: 1.226,69 ຕື້ກີບ ເພີ່ມຂຶ້ນ 4,6% ກວມ 36,91% ຂອງ GDP.ຂະແໜງອຸດສາຫະກຳ: 670,09 ຕື້ກີບ ເພີ່ມຂຶ້ນ 4,5% ກວມ 20,16% ຂອງ GDP.ຂະແໜງການບໍລິການ: 1.426,66 ຕື້ກີບ ເພີ່ມຂຶ້ນ 4,3% ກວມ 42,93% ຂອງ GDP. ການປະຕິບັດລາຍຮັບ-ລາຍຈ່າຍ: ສາມາດປະຕິບັດ ລາຍຮັບໄດ້ທັງໝົດ 131,77ຕື້ກີບ( ຮອດວັນທີ 29 ພຶດສະພາ 2020) ເທົ່າກັບ 29,38% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາ ຫຼຸດລົງ 13,60%.ໃນນີ້: ລາຍຮັບພຸດຂອງສູນກາງປະຕິບັດໄດ້: 88,42 ຕື້ກີບ, ເທົ່າກັບ 31,28% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາ ຫຼຸດລົງ 14,92% ແລະລາຍຮັບທ້ອງຖິ່ນປະຕິບັດໄດ້ 43,34 ຕື້ກີບ, ເທົ່າກັບ26,14% ຂອງແຜນການປີ,ທຽບໃສ່ໄລຍະດຽວຂອງປີຜ່ານມາ ຫຼຸດລົງ10,78%, ລາຍຈ່າຍທົ່ວແຂວງ ແຜນການປີ: ປະຕິບັດໄດ້ 114,43 ຕື້ກີບ, ເທົ່າກັບ 37,20% ຂອງແຜນການປີ, ທຽບໃສ່ໄລຍະດຽວຂອງປີຜ່ານມາ ເພີ່ມຂື້ນ 4,39%.ການລົງທຶນທົ່ວສັງຄົມ ເພື່ອການພັດທະນາ: ໃນ 6 ເດືອນຕົ້ນປີ ປະຕິບັດໄດ້ທັງໝົດ 570,85 ຕື້ກີບທຽບໃສ່ ແຜນການ 1.561,91 ຕື້ກີບ ) ເທົ່າກັບ 36,54% .ກອງປະຊຸມໄດ້ປະກອບຄຳເຫັນຢ່າງກົງໄປກົງມາເພື່ອແນໃສ່ສ້າງແຜນພັດທະນາເສດຖະກິດສັງຄົມໃຫ້ມີທ່ວງທາອັນໃຫມ່ເຮັດໃຫ້ແຂວງບໍ່ແກ້ວກາຍເປັນແຂວງທີພັດທະນາແບບຍື່ນຍົງຍິ່ງໆຂຶ້ນ.


Image may contain: 1 person, sitting, table and indoor


ຂ່າວ: ຄຳພັນ ແກ້ວມະນີ












------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments