ສະຫວັນນະເຂດ ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X


ໃນຕອນເຊົ້າວັນທີ 6 ກໍລະກົດ 2020 ນີ້ ແຂວງສະຫວັນນະເຂດ ໄດ້ຈັດກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ກອງປະຊຸມດັ່ງກ່າວໄດ້ຈັດຂຶ້ນທີ່ສະໂມສອນຂອງແຂວງ ໂດຍພາຍໃຕ້ການເປັນປະທານຂອງສະຫາຍ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ເຂົ້າຮ່ວມມີສະຫາຍກຳມະການສຳຮອງສູນກາງພັກ, ຮອງເລຂາພັກແຂວງ,ຄະນະປະຈຳພັກແຂວງ, ກຳມະການພັກແຂວງ,ເລຂາພັກເມືອງ ເຂົ້າຮ່ວມຢ່າງພ້ອມພຽງ.

Image may contain: 1 person, sitting, table and indoor

ໃນກອງປະຊຸມ ສະຫາຍ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ກໍ່ໄດ້ໃຫ້ກຽດເຜີຍແຜ່ເຊື່ອມຊຶມເນື້ອໃນຈິດໃຈທີ່ສຳຄັນຂອງມະຕິກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກສະໄໝທີ X ວ່າ: ກອງປະຊຸມຄົບຄະນະຄັ້ງທີ 10 ຂອງຄະນະບໍລິຫານງານສູນກາງພັກໄດ້ຄົ້ນຄວ້າ,ປຶກສາຫາລືບັນຫາສຳຄັນຫຼາຍດ້ານເປັນຕົ້ນແມ່ນ ໄດ້ຕີລາຄາສູງຕໍ່ການຜັນຂະຫຍາຍ ແລະ ຈັດຕັ້ງປະຕິບັດມະຕິຄັ້ງທີ 7,8,9 ຂອງຄະນະບໍລິຫານງານສູນກາງພັກ ຜ່ານມາລັດຖະບານ,ອົງການປົກຄອງແຕລະຂັ້ນ ໄດ້ເພີ່ມທະວີການຊີ້ນຳແກ້ໄຂຄວາມທຸກຍາກທາງດ້ານເສດຖະກິດມະຫາພາກ ກໍ່ຄືການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ,ແຜນງົບປະມານ - ເງິນຕາ ແນໃສ່ສ້າງຄວາມໜັກແໜ້ນ,ເຂັ້ມແຂງ ແລະ ເປັນລະບົບໃຫ້ແກ່ພື້ນຖານເສດຖະກິດແຫ່ງຊາດ,ໃນນັ້ນໄດ້ອອກນະໂຍບາຍ ແລະ ມາດຕະການຈັດຕັ້ງປະຕິບັດທີ່ສຳຄັນຈຳນວນໜຶ່ງ ເພື່ອກະຕຸ້ນ ແລະ ຍູ້ແຮງການເຕີບໂຕຂອງເສດຖະກິດເປັນຕົ້ນປັບປຸງສະພາບແວດລ້ອມການລົງທຶນ,ການດຳເນີນທຸລະກິດ-ບໍລິການ,ການແບ່ງຂັ້ນຄຸ້ມຄອງການລົງທຶນ,ການແກ້ໄຂໜີ້ສິນ,ການປັບປຸງປະສິດທິພາບການດຳເນີນທຸລະກິດຂອງລັດວິສາຫະກິດຈຳນວນໜຶ່ງ,ແກ້ໄຂການຮົ່ວໄຫຼຂອງງົບປະມານ,ການຈຳກັດລາຍຈ່າຍບໍລິຫານ ແລະ ບັນຫາອື່ນໆ. 


Image may contain: 2 people, people sitting and indoor

ແຕ່ທຽບໃສ່ການເລັ່ງທວງໃນການແກ້ໄຂບັນຫາທີ່ເປັນຍຸດທະສາດໃຫຍ່ໆ ເຫັນວ່າບາງດ້ານຍັງມີຄວາມຊັກຊ້າ,ບໍ່ເປັນລະບົບຄົບຊຸດ,ເຖິງວ່າໄດ້ມີການປັບປຸງ ແລະ ປະຕິບັດນິຕິກຳ ຕິດພັນກັບການຫັນເປັນທັນສະໄໝ ແລະ ສາມາດແກ້ໄຂການຮົ່ວໄຫຼຂອງງົບປະມານໄດ້ລະດັບໜຶ່ງ ແຕ່ການຈັດຕັ້ງຜັນຂະຫຍາຍຍັງບໍ່ທັນເອົາໃຈໃສ່ຢ່າງຈິງຈັງ,ກວ້າງຂວາງ ແລະ ເຂັ້ມງວດ ການດຳເນີນມາດຕະການປະຢັດລາຍຈ່າຍບໍລິຫານຍັງຊັກຊ້າ,ບໍ່ເດັດຂາດ,ການປັບປຸງກົງຈັກແກ້ໄຂບັນຫາພະນັກງານເຫຼືອບໍ່ພໍ ກໍ່ຄືການຫັນຫົວໜ່ວຍວິຊາການຈຳນວນໜຶ່ງໄປສູ່ການກຸ້ມຕົນເອງດ້ານງົບປະມານບໍ່ທັນໄດ້ຮັບການຄົ້ນຄວ້າ ແລະ ປະຕິບັດຢ່າງເປັນຮູບປະທຳ ລວມທັງບັນຫາອື່ນໆທີ່ຍັງຈະຕ້ອງສືບຕໍ່ຈັດຕັ້ງປະຕິບັດໃຫ້ປະສົບຜົນສຳເລັດ.

Image may contain: 4 people, people sitting, table and indoor

ຈາກນັ້ນໃນກອງປະຊຸມສະຫາຍ ປອ ໂພໄຊ ໄຊຍະສອນ ກຳມະການສຳຮອງສູນກາງພັກ ຮອງເລຂາພັກແຂວງ ຮອງເຈົ້າແຂວງສະຫວັນນະເຂດ ກໍ່ໄດ້ເຜີຍແຜ່ມະຕິວ່າດ້ວຍເພີ່ມທະວີວຽກງານປ້ອງກັນຄວາມສະຫງົບໃນສະພາບການໃໝ່ ແລະ ສະຫາຍ ສົມເພັດ ອິນທະທິລາດ ຄະນະປະຈຳພັກແຂວງ ປະທານແນວລາວສ້າງຊາດແຂວງ ກໍ່ໄດ້ເຜີຍແຜ່ມະຕິວ່າດ້ວຍວຽກງານແນວໂຮມ ແລະ ວຽກງານມະຫານຊົນຂອງພັກໃນໄລຍະໃໝ່ ຕື່ມອີກ.



ພາບ - ຂ່າວ: ອັກສອນສິນ ພົມມະຈັນ

































------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments