ສາທາ ແຂວງອັດຕະປື ສືບຕໍ່ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ



ທ່ານ ດຣ. ນາງ ອ່ອນຜິວ ໂພທິລາດ ຫົວໜ້າພະແນກສາທາລະນະສຸກ ແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 8 ກໍລະກົດ 2020 ນີ້ວ່າ ໃນໄລຍະທີ່ພະຍາດໂຄວິດ-19 ຍັງບໍ່ທັນເຂົ້າມາ ສປປ ລາວ ທາງພະແນກສາທາລະນະສຸກແຂວງອັດຕະປືກໍ່ໄດ້ເອົາໃຈໃສ່ຕິດຕາມຂໍ້ມູນຂ່າວສານຢ່າງຈົດຈໍ່ ຜ່ານທາງວິທະຍຸ, ໂທລະພາບ, ສື່ສິ່ງພິມ ແລະ ສື່ອອນລາຍ. ເປັນຕົ້ນແມ່ນການລາຍງານໂຕເລກກໍລະນີຜູ້ຕິດເຊື້ອສະສົມ, ກໍລະນີຜູ້ຕິດເຊື້ອເພີ່ມ ແລະ ກໍລະນີຜູ້ເສຍຊີວິດ ໃນແຕ່ລະວັນ ຢູ່ບັນດາປະເທດອ້ອມຂ້າງ ແລະ ທົ່ວໂລກ ເຊິ່ງມີແນວໂນ້ມວ່າຈະມີການແຜ່ລະບາດໄປທົ່ວໂລກ.


ໄດ້ເອົາໃຈໃສ່ປະຕິບັດຕາມທິດຊີ້ນຳຂອງຂັ້ນເທິງ ໃນການຜັນຂະຫຍາຍທຸກໆມາດຕະການ ໃຫ້ລົງສູ່ທ້ອງຖິ່ນໂດຍໄວ ແລະ ທົ່ວເຖິງ ໂດຍການແຕ່ງຕັງບຸກຄະລາກອນລົງໃຫ້ຄວາມຮູ້ແກ່ປະຊາຊົນ, ການລົງຕິດຕາມສະພາບການຢູ່ໂຮງໝໍ, ຕາມບ້ານ, ມີການໂຄສະນາຜ່ານທາງວິທະຍຸ, ໂທລະພາບ ແລະ ເຟສບຸກຂອງແຂວງ, ນອກຈາກນີ້ກໍ່ໄດ້ລົງໂຄສະນາຕາມບ້ານ ແລະ ສະຖານທີ່ຕ່າງໆ,
ມີການກະກຽມສະຖານທີ່ເພື່ອຮອງຮັບຜູ້ທີ່ເດີນທາງຜ່ານດ່ານສາກົນ ທີ່ອາດຈະຕິດເຊື້ອ ເພື່ອແຍກໂຕໃນການກັກບໍລິເວນ, ມີການກະກຽມອຸປະກອນ ແລະ ມີການຂຶ້ນແຜນງົບປະມານໃນການຈັດຕັ້ງປະຕິບັດເຊົ່ນ: ຢາ, ອຸປະກອນການແພດ ແລະ ອຸປພກອນຮັບໃຊ້ທີ່ຈຳເປັນ ໃນການຮັບມືກັບກໍລະນີທີ່ເກີດມີຜູ້ຕິດເຊື້ອ.
ດ່ານສາກົນພູເກືອ ທີ່ເປັນຊາຍແດນລະຫວ່າງ ສປປ ລາວ ແລະ ສສ ຫວຽດນາມ ແລະ ດ່ານທ້ອງຖິ່ນ ເຊິ່ງເປັນບ່ອນທີ່ຕ້ອງເຝົ້າລະວັງ ທາງພະແນກສາທາລະນະສຸກກໍ່ໄດ້ມີການແຕ່ງຕັ້ງຈຸທີມງານແພດ ລົງໄປຕິດຕາມ ກວດກາ.
ທ່ານຫົວໜ້າພະແນກສາທາລະນະສຸກ ແຂວງອັດຕະປື ຍັງໄດ້ໃຫ້ຮູ້ວ່າພາຍຫຼັງທີ່ພະຍາດໂຄວິດ-19 ເຂົ້າມາລະບາດໃນລາວແລ້ວ ທາງພະແນກສາທາລະນະສຸກແຂວງອັດຕະປື ໄດ້ມີມາດຕະການປ້ອງກັນ, ຄວບຄຸມການລະບາດຂອງພະຍາດໂຄວິດ-19 ໂດຍການເອົາໃຈໃສ່ປະຕິບັດຕາມທິດຊີ້ນຳຂອງຂັ້ນເທິງ ແລະ ນຳມາຈັດຕັ້ງຜົນຂະຫຍາຍຢ່າງທົ່ວເຖິງ ພ້ອມນັ້ນກໍ່ໄດ້ມີມາດຕະການຄື:
  1. ໄດ້ຫັນນິຕິກຳທີ່ສູນກາງວາງອອກທັງໝົດ 64 ສະບັບ ມາເປັນຂອງແຂວງ ແລະ ຈັດຕັ້ງປະຕິບັດໃຫ້ແທດເໝາກັບທ້ອງຖິ່ນ.
  2. ໄດ້ມີການແຕ່ງຕັງຍຄະນະສະເພາະກິດຂັ້ນແຂວງ, ຂັ້ນເມືອງ ແລະ ຂັ້ນບ້ານ ທຸກໆບ້ານ.
  3. ໄດ້ໂຄສະນາສຸຂະສຶກສາ ໃຫ້ຄວາມຮູ້ແກ່ສັງຄົມ ຢ່າງທົ່ວເຖິງ ໂດຍຜ່ານສື່ໂທລະພາບ, ວິທະຍຸກະຈາຍສຽງ ແລະ ເຟສບຸກຂອງແຂວງ, ເຟສບຸກຂອງພະແນກສາທາລະນະສຸກຂອງແຂວງ ແລະ ອື່ນໆ ຄື: ລົງໂຄສະນາສຸກຂະສຶກສາກ່ຽວກັບ ການປ້ອງກັນຄວບຄຸມ ພະຍາດ ໂຄວິດ-19 ມີຢູ່ 108 ເທື່ອ, ລົງໂຄສະນາສຸຂະສຶກສາກ່ຽວກັບ ວຽກງານອະນາໄມ 3 ສະອາດ ຕິດພັນກັບການແພ່ລະບາດຂອງພບະຍາດໂຄວິດ-19 ໃນ 20 ບ້ານ ທັງໝົດ 40 ຄັ້ງ, ລົງເກັບກຳຂ່າວ 48 ຄັ້ງ, ອອກຂ່າວຜ່ານທາງວິທະຍຸແຂວງ 391 ຄັ້ງ, ອອກຂ່າວອອນລາຍ 99 ຄັ້ງ, ແຈກຢາຍປົດສະເຕີ ພາສາລາວ 9.200 ຄັ້ງ, ພາສາອັງກິດ 9.000 ຄັ້ງ, ແຈກຢາຍແຜ່ນຂໍ້ມູນພາສາລາວ 950 ໃບ, ພາສາອັງກິດ 1.600 ໃບ, ພິມ ແລະ ແຈກຢາຍໃບປິວ 3000 ໃບ, ຕິດຕັງປ້າຍໂຄສະນາຢູ່ບັນດາຈຸດກັ່ນກອງ (ດ່ານພູເກືອ, ດ່ານຫຼັກ 52, ດ່ານພອນມະນີ, ດ່ານໄຊດອນໂຂງ, ໂຮງໝໍແຂວງ ແລະ ທຸກໆສະຖານທີ່ບໍລິການສຸຂະພາບໃນທົ່ວແຂວງ).
  4. ໄດ້ມີການເຝົ້າລະວັງຢ່າງເຄັ່ງຄັດ ຢູ່ດ່ານສາກົນພູເກືອ, ດ່ານທ້ອງຖິ່ນ, ດ່ານແຂວງຕໍ່ແຂວງ ເພື່ອສຳຫຼວດຄົນເຂົ້າ-ອອກ ແຂວງ ແລະ ເມືອງ ທັງໝົດ 18.601 ຄົນ, ມີການເຝົ້າລະວັງຈຳກັດບໍລິເວນແຮງງານ, ນັກສຶກສາທີ່ມາຈາກຕ່າງແຂວງ ແລະ ຕ່າງປະເທດ ທັງໝົດ 457 ຄົນ, ຍິງ 212 ຄົນ, ເຝົ້າລະວັງແຮງງານທີ່ມາຈາກເຂດທີ່ມີການຕິດເຊື້ອ ທັງໝົດ 243 ຄົນ ໃນນັ້ນມາຈາກນະຄອນຫຼວງວຽງຈັນ 163 ຄົນ, ຫຼວງພະບາງ 3 ຄົນ, ມາຈາກປະເທດໄທ ແລະ ຫວຽດນາມ 77 ຄົນ (ຜ່ານການຕິດຕາມທັງໝົດແມ່ນບໍ່ມີອາການສົງໃສ). ການເຝົ້າລະວັງຄົນເຂົ້າອອກແຂວງທັງໝົດ 4499 ຄົນ ແລະ ອະນຸຍາດພາຫະນະທັງໝົດ 1.640 ຄັນ, ເຝົ້າລະວັງພະນັກງານທີ່ເຂົ້າຮ່ວມກອງປະຊຸມຕ່າງໆ ທັງໝົດ 12 ຄັ້ງ ມີແຂກເຂົ້າຮ່ວມທັງໝົດ 2.092 ຄົນ.
  5. ໄດ້ມີການເຝົ້າລະວັງຢູ່ຈຸດບໍລິການປິ່ນປົວທຸກຂັ້ນ ກວດຄົນເຈັບທັງໝົດ 20.912 ພົບຜູ້ສົງໃສ 8 ກໍລະນີ ມີການເກັບຕົວຢ່າງໄປກວດຢູ່ສູນກາງ ເຊິ່ງຜົນທັງໝົດ ບໍ່ພົບເຊື້ອ, ໄດ້ກຽມສະຖານທີ່ປິ່ນປົວ ແຍກປ່ຽວ ແລະ ຈຳກັດບໍລິເວນ ສ່ວນສະຖານທີ່ປິ່ນປົວ ແລະ ແຍກປ່ຽວຄົນເຈັບແມ່ນກຳນົດເອົາໂຮງໝໍແຂວງ. ສະຖານທີ່ກັກກັນທັງໝົດມີ 12 ສູນ ໃນ 5 ເມືອງ, ມີການພົ່ນຢາຖຕຂ້າເຊື້ອຢູ່ສະຖານທີ່ຈຳກັດບໍລິເວນ ແລະ ຈຸດສ່ຽງ 48 ຈຸດ 66 ຄັ້ງ. ມີການຝຶກອົບຮົມວິຊາການ ໃຫ້ພະນັກງານແພດໝໍ ທັງໝົດ 6 ຄັ້ງ.
ທ່ານຫົວໜ້າພະແນກສາທາລະນະສຸກແຂວງ ຍັງໃຫ້ຮູ້ຕື່ມອີກວ່າ ປະຈຸບັນສະຖານະການໄດ້ຜ່ອນຄາຍລົງຫຼາຍແລ້ວ ແຕ່ທາງສະທາລະນະສຸກແຂວງກໍ່ຍັງຈະສືບຕໍປະຕິບັດອີກຫຼາຍມາດຕະການ ເປັນຕົ້ນຊແມ່ນ ຍັງສືບຕໍປະຕິບັດມາດຕະການຜ່ອນຜັນຢ່າງເຂັ້ມງວດ, ຜັນຂະຫຍາຍນິຕິກຳທີ່ທາງສູນກາງວາງອອກແຈ້ງໄປຍັງທຸກພາກສ່ວນຢ່າງທົ່ວເຖິງ, ສືບຕໍ່ໂຄສະນາສຸຂຸສຶກສາ ກ່ຽວກັບສະພາບການແພ່ລະບາດຂອງພະຍາດໂຄວິດ-19, ສືບຕໍ່ເຝົ້າລະວັງຢູ່ດ່ານສາກົນພູເກືອ ແລະ ບັນດາດ່ານທ້ອງຖິ່ນ, ສືບຕໍ່ຕິດຕາມຢູ່ຈຸດບໍລິການປິ່ນປົວສຸຂະພາບທຸກຂັ້ນ, ສືບຕໍ່ປັບປຸງສະຖານທີ່ປິ່ນປົວ, ແຍກປ່ຽວ ຢູ່ໂຮງໝໍແຂວງ ແລະ ສູນຈຳກັດບໍລິເວນ ໂດຍກຳນົດເອົາຈຸດສູນບຳບັດຄົນຕິດຢາເສບຕິດ ແລະ ສະໜາມບິນ ແລະ ໂຮງແຮມ ສຳລັບຊ່ຽວຊານ ແລະ ນັກທຸລະກິດ, ສືບຕໍ່ຝຶກອົບຮົມດ້ານວິຊາການໃຫ້ພະນັກງານແພດໝໍທຸກຂັ້ນ, ສືບຕໍ່ປະກອບເອກະສານນຳເຂົ້າຊ່ຽວຊານ, ແຮງງານຈາກຕ່າງປະເທດ ເຂົ້າມາແຂວງອັດຕະປື, ສືບຕໍ່ສ້າງແຜນງົບປະມານ ໃນການຈັດຕັ້ງປະຕິບັດໃນຕໍ່ໜ້າ ຢາ, ອຸປະກອນການແພດ ແລະ ອຸປະກອນຮັບໃຊ້ທີ່ຈຳເປັນຕ່າງໆ.
ໃນນາມຂອງພະແນກສາທາລະນະສຸກແຂວງອັດຕະປື ຂໍຮຽກຮ້ອງມາຍັງປະຊາຊົນ ຈົ່ງເອົາໃຈໃສ່ສືບຕໍ່ປະຕິບັດຕາມມາດຕະການທີ່ທາງຂັ້ນເທິງໄດ້ວາງອອກ ເປັນຕົ້ນແມ່ນການຮັກສາສຸຂະພາບ ແລະ ຄວາມສະອາດ ເປັນຕົ້ນແມ່ນການລ້າງມື, ໃສ່ຜ້າອັດປາກ-ດັງ ກ່ອນອອກຈາກບ້ານ, ການຮັກສາໄລຍະຫ່າງ ເປັນປະຈຳເພື່ອຫຼີກລ່ຽງ ການຕິດເຊື້ອພະຍາດໂຄວິດ-19.
ການລົງເກັບກຳຂ່າວຄັ້ງນີ້ໄດ້ຮັບານສະໜັບສະໜູນຈາກສູນສື່ສານເພື່ອສຸຂະພາບ ແລະ ສຸຂະສຶກສາ, ອົງການຢູ່ນິເຊບປະຈຳ ສປປລາວ ແລະ ອົງການ USAID.
Medialaos 
















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments