ສະຫາຍເລຂາທິການໃຫຍ່ ບຸນຍັງ ວໍລະຈິດ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຄຳມ່ວນ


ໃນວັນທີ 8 ກໍລະກົດ 2020 ນີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ພ້ອມດ້ວຍ ສະຫາຍ ທອງສະລິດ ມັງໜໍ່ເມກ ກຳມະການສູນກາງພັກ, ຫົວໜ້າຫ້ອງວ່າການສູນກາງພັກ ແລະ ຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ໂດຍໄດ້ຮັບການຕ້ອນຮັບຈາກ ສະຫາຍ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄໍາມ່ວນ ພ້ອມດ້ວຍຄະນະພັກ.

Image may contain: 1 person, text

ໃນໂອກາດນີ້ ສະຫາຍ ໂອໄດ ສຸດາພອນ ກໍໄດ້ລາຍງານສະພາບລວມໂດຍຫຍໍ້ໃນການຈັດຕັ້ງປະຕິບັດຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ກໍຄື ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກ ແຂວງຄຳມ່ວນ ເຊິ່ງມີຜົນສຳເລັດພົ້ນເດັ່ນໃນຫລາຍດ້ານ ໂດຍສະເພາະແມ່ນ ວຽກງານການເມືຶອງແນວຄິດ ຂອງສະມາຊິກພັກ-ພະນັກງານ, ທະຫານ, ຕຳຫລວດ ນັບມື້ມີຄວາມປອດໃສ, ໜັກແໜ້ນ ແລະ ເຂັ້ມແຂງ; ວຽກງານ ປກຊ-ປກສ ໄດ້ສຸມໃສ່ຫັດແອບຍຸດທະວິທີ-ສິນລະປະຍຸດ ແລະ ສ້າງພາລາທິການກັບທີ່ ຢ່າງເປັນປົກກະຕິ; ວຽກງານພັດທະນາຊົນນະບົດ-ແກ້ໄຂຄວາມທຸກຍາກຂອງປະຊາຊົນ ໄດ້ຮັບການເອົາໃຈໃສ່ແກ້ໄຂ ເຮັດໃຫ້ຕົວເລກຄອບຄົວທຸກຍາກຫລຸດລົງຍັງເຫລືອ 684 ຄອບຄົວ; ການພັດທະນາດ້ານເສດຖະກິດ ເຖິງວ່າໄດ້ຮັບຜົນກະທົບ ແລະ ມີຄວາມຫຍຸ້ງຍາກຫລາຍດ້ານ, ບວກໃສ່ກັບໄພທຳມະຊາດ ແລະ ພະຍາດລະບາດ ໂຄວິດ-19 ທີ່ບໍ່ເອື້ອຍອໍານວຍ ໃນໄລຍະຜ່ານມາ, ແຕ່ກໍເຫັນວ່າ ໃນທົ່ວແຂວງໄດ້ພ້ອມກັນພະຍາຍາມບຸກບືນ, ສູ້ຊົນດ້ວຍຄວາມຮັບຜິດຊອບສູງ ເພື່ອບັນລຸບັນດາຄາດໝາຍໃຫຍ່ທີ່ໄດ້ກໍານົດອອກໃຫ້ປະກົດຜົນເປັນຈິງ; ດ້ານວຽກງານວັດທະນະທໍາ-ສັງຄົມ ກໍໄດ້ຮັບການເອົາໃຈໃສ່ ແລະ ມີດ້ານຂະຫຍາຍຕົວທີ່ຕໍ່ເນື່ອງ. ທັງໝົດນັ້ນ ລ້ວນແຕ່ເປັນການປະກອບສ່ວນສໍາຄັນເຮັດໃຫ້ແຂວງຄຳມ່ວນ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການຍົກລະດັບດີຂຶ້ນຢ່າງບໍ່ຢຸດຢັ້ງ.

Image may contain: 1 person, text

ໃນຕອນທ້າຍ ສະຫາຍ ບຸນຍັງ ວໍລະຈິດ ໄດ້ໃຫ້ກຽດໂອ້ລົມ ແລະ ເນັ້ນໜັກວຽກງານຈຸດສຸມຈຳນວນໜຶ່ງເປັນຕົ້ນ: ເພີ່ມທະວີການນໍາພາດ້ານການເມືອງ-ແນວຄິດຂອງພະນັກງານ ແລະ ປະຊາຊົນໃຫ້ໜັກແໜ້ນ, ເຂັ້ມແຂງ ໂດຍສືບຕໍ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ຮີບຮ້ອນດຳເນີນກອງປະຊຸມໃຫຍ່ 3 ຂັ້ນ ໃຫ້ສຳເລັດ ເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ ຄັ້ງທີ XI ຂອງພັກ, ເພີ່ມທະວີສະຕິລະວັງຕົວໃຫ້ຫລາຍຂຶ້ນກວ່າເກົ່າ, ຕີຖອຍບັນຫາສິ່ງຫຍໍ້ທໍ້ ແລະ ຫາງສຽງທີ່ເກີດຂຶ້ນ ໃນຂົງເຂດການບໍລິຫານ-ຄຸ້ມຄອງລັດ, ຄຸ້ມຄອງສັງຄົມ ເພື່ອບໍ່ໃຫ້ພວກຄົນບໍ່ດີສວຍໃຊ້ໂຄສະນາໂຈມຕີພວກເຮົາ; ສືບຕໍ່ເຊື່ອມຊຶມ ແລະ ຜັນຂະຫຍາຍແນວທາງ ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ໃຫ້ເປັນເນື້ອໃນວຽກງານ ແລະ ການເຄື່ອນໄຫວຈັດຕັ້ງປະຕິບັດຕົວຈິງ ຂອງບັນດາອົງການຈັດຕັ້ງພັກ-ລັດ ແຕ່ລະຂັ້ນ, ສືບຕໍ່ຫັນລົງກໍ່ສ້າງຮາກຖານຢ່າງຕໍ່ເນື່ອງ ແລະ ແຂງແຮງກວ່າເກົ່າ ແລະ ເຮັດແນວໃດ ໃຫ້ທົ່ວສັງຄົມມີສ່ວນເຂົ້າຮ່ວມໃນວຽກງານດັ່ງກ່າວ ໃຫ້ເປັນຂະບວນກວ້າງຂວາງ ແລະ ຟົດຟື້ນ ໃນທົ່ວແຂວງ, ສືບຕໍ່ປັບປຸງ, ສັບຊ້ອນກົງຈັກການຈັດຕັ້ງ ຕາມທິດກະທັດຮັດ, ເຂັ້ມແຂງ ແລະ ມີປະສິດທິພາບ. ກ່ຽວກັບການພັດທະນາເສດຖະກິດ-ສັງຄົມ ແມ່ນສືບຕໍ່ຍູ້ແຮງຂະບວນການຜະລິດເປັນສິນຄ້າໃຫ້ແຂງແຮງຂຶ້ນກວ່າເກົ່າ, ດຶງດູດການລົງທຶນຂອງຕ່າງປະເທດ ເພື່ອຂຸດຄົ້ນທ່າແຮງບົ່ມຊ້ອນ ດ້ວຍຫລາຍວິທິ, ແກ້ໄຂຂອດຂັ້ນທີ່ບໍ່ຈຳເປັນໃຫ້ໄດ້ໂດຍໄວ, ຍູ້ແຮງຂະບວນການສ້າງວຽກເຮັດງານທຳຂອງ ປະຊາຊົນໃຫ້ແຂງແຮງທົ່ວເຖິງ, ເອົາໃຈໃສ່ຄຸ້ມຄອງຊັບພະຍາກອນທໍາມະຊາດ ແລະສິ່ງແວດລ້ອມໃຫ້ເຂັ້ມງວດແຕ່ຫົວທີ, ເອົາໃຈໃສ່ປະຕິບັດບັນດາຄາດໝາຍດ້ານສັງຄົມທີ່ແຂວງໄດ້ກຳນົດໄວ້ໃຫ້ບັນລຸເປັນຈິງໂດຍສະເພາະການແກ້ໄຂຄວາມທຸກຍາກຂອງປະຊາຊົນໃຫ້ເປັນຮູບປະທຳ.

Image may contain: 1 person, text

ສຳລັບ ການກະກຽມດຳເນີນກອງປະຊຸມໃຫຍ່ຂອງອົງຄະນະພັກແຂວງ: ສືບຕໍ່ຍູ້ຂະບວນການດ້ານຕ່າງໆໃຫ້ແຂງແຮງກວ່າເກົ່າ, ສູ້ຊົນປະຕິບັດບັນດາຄາດໝາຍ ທີ່ກອງປະຊຸມໃຫຍ່ຂອງຕົນໄດ້ຮັບຮອງຕິດພັນກັບການເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຕ່າງໆ ໃຫ້ໝົດໄປເທື່ອລະກ້າວ ໂດຍປຸກລະດົມປະຊາຊົນໃຫ້ມີສ່ວນຮ່ວມ ແລະ ສືບຕໍ່ຊຸກຍູ້ປະຊາຊົນທໍາການຜະລິດເປັນສິນຄ້າ ແກ້ໄຂຄວາມທຸກຍາກຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ; ເອົາໃຈໃສ່ກະກຽມບົດລາຍງານການເມືອງ ໂດຍເນັ້ນໃສ່ການສະຫລຸບຕີລາຄາສະພາບການພັດທະນາເສດຖະກິດ-ສັງຄົມ ໃນໄລຍະຜ່ານມາ, ສາເຫດທີ່ຍັງບໍ່ສາມາດບັນລຸໄດ້ ເພື່ອເປັນພື້ນຖານໃນການກຳນົດທິດທາງແກ້ໄຂໃນຕໍ່ໜ້າ, ສະເພາະແຜນພັດທະນາເສດຖະກິດ-ສັງຄົມ ຂອງແຂວງ ຕ້ອງສົມທົບກັບແຕ່ລະເມືອງ ແລະ ຂະແໜງການ ເພື່ອເຮັດໃຫ້ການກຳນົດຄາດໝາຍພັດທະນາ ແຕ່ລະດ້ານສອດຄ່ອງກົມກຽວກັນ ສາມາດຈັດຕັ້ງປະຕິບັດຕົວຈິງໄດ້, ການດຳເນີນຊີວິດການເມືອງພາຍໃນພັກ ຕ້ອງເອົາໃຈໃສ່ຢ່າງແຂງແຮງ, ການຕຳນິສົ່ງຂ່າວ ໃຫ້ມີລັກສະນະສຶກສາອົບຮົມ, ຕໍ່ສູ້, ສ້າງສັນ ຫລີກລ້ຽງການທັບຖົມໂຈມຕີ ເຊິ່ງກັນ ແລະກັນ; ສ່ວນການກະກຽມບຸກຄະລາກອນເຂົ້າໃນຄະນະພັກ ໃຫ້ອີງໃສ່ມາດຖານ, ເງື່ອນໄຂທີ່ກໍານົດໄວ້ ໃນມະຕິກົມການເມືອງສູນກາງພັກວາງອອກ, ສູ້ຊົນປະຕິບັດຕາມທິດຫັນເປັນໜຸ່ມ-ແໜ້ນ, ມີເພດຍິງ, ຊົນເຜົ່າໃນອັດຕາສ່ວນທີ່ເໝາະສົມ, ການແບ່ງຄວາມຮັບຜິດຊອບ ໃຫ້ຄະນະປະຈຳແຕ່ລະຂັ້ນ ປະຕິບັດຕາມຄຳສັ່ງແນະນຳ ເລກທີ 11/ຄລສພ ວ່າດ້ວຍການຄາດຄະເນແບ່ງຄວາມຮັບຜິດຊອບຂອງ ຄະນະປະຈຳແຕ່ລະຂັ້ນ.




















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments