ກະຊວງປ້ອງກັນປະເທດ ມອບທຶນກໍ່ສ້າງເຂື່ອນຂັງນ້ຳໃຫ້ກອງບັນຊາການທະຫານແຂວງ ຈຳປາສັກ.


ພິທີມອບ-ຮັບທຶນກໍ່ສ້າງ ເຂື່ອນຂັງນໍ້າຢູ່ກອງພັນຕີພິເສດ 709 ທີ່ຂຶ້ນກັບກອງບັນຊາການທະຫານແຂວງຈໍາປາສັກ. ຈາກ ກະຊວງປ້ອງກັນປະເທດໄດ້ຈັດຂຶ້ນທີ່ຫ້ອງປະຊຸມຂອງກອງບັນຊາການທະຫານແຂວງຈໍາປາສັກ. ໃນວັນທີ 31 ກໍລະກົດນີ້, ໂດຍ ການເປັນປະທານຂອງ ສະຫາຍ ພົນຕີ ປອ ວົງຄໍາ ພົມມະກອນ ຄະນະປະຈໍາພັກ ກະຊວງປ້ອງກັນປະເທດ, ຫົວໜ້າກົມໃຫຍ່ພະລາທິການກອງທັບ, ມີສະຫາຍພົນຈັດຕະວາສຸໄກ ພິມມະສານ ກໍາມະການພັກແຂວງ, ຮອງປະທານ ປ້ອງກັນຊາດ-ປ້ອງກັນຄວາມ ສະຫງົບແຂວງ, ເລຂາຄະນະພັກກອງບັນຊາການ, ຫົວໜ້າການທະຫານກອງບັນຊາການທະຫານແຂວງຈໍາປາສັກ, ມີຄະນະນໍາຈາກກົມກໍ່ສ້າງກົມໃຫຍ່ພະລາທິການກອງທັບ, ມີຄະນະພັກ- ຄະນະບັນຊາ 5 ຫ້ອງກອງບັນຊາການເຂົ້າຮ່ວມ. ສະຫາຍພົນຈັດຕະວາ ສຸໄກ ພິມມະສານ ໄດ້ລາຍງານພາລະບົດບາດ ແລະ ສະພາບການຢູ່ກອງບັນຊາການທະຫານແຂວງຈຳປາສັກໃຫ້ຮັບຊາບໂດຍຫຍໍ້. 


ເປັນຕົ້ນແມ່ນສະພາບບໍລິເວນຊາຍ ແດນໃນປັດຈຸບັນໄດ້ເອົາໃຈໃສ່ຈັດຕັ້ງກໍາລັງເຄື່ອນໄຫວຕາມຂອບເຂດບໍລິເວນຊາຍແດນທີ່ກົມ ກອງຮັບຜິດຊອບ. ລົງເຄື່ອນໄຫວຊີ້ນໍາການດໍາເນີນຊີວິດການເມືອງຂອງແຕ່ລະກົມກອງ, ຫັນກໍາລັງລົງກໍ່ສ້າງຮາກຖານ, ສ້າງເຂດຊາຍແດນໃຫ້ມີຄວາມສະຫງົບຮອບດ້ານຕິດພັນກັບການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ- 19. ພ້ອມນັ້ນ, ໄດ້ປັບປຸງກໍ່ສ້າງຄ້າຍຄູໃຫ້ມີຄວາມແໜ້ນໜາຖາວອນ. ຄຽງຄູ່ກັບການສ້າງເສດຖະກິດພາຍໃນກົມກອງໂດຍຖືເອົາວຽກງານ 4 ປູກ 4 ລ້ຽງ ເພິ່ງຕົນເອງກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງສາມາດຮັບປະກັນດ້ານສະບຽງອາຫານໃຫ້ອ້າຍນ້ອງທີ່ກໍາ ລັງປະຕິບັດໜ້າທີ່ຢູ່ເຂດທຸລະການດານຫ່າງໄກສອກຫຼີກ. 


ໂອກາດນີ້, ສະຫາຍ ພົນຕີ ປອ ວົງຄໍາ ພົມມະກອນ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຫຼາຍບັນຫາເປັນຕົ້ນດ້ານການເມືອງ-ນໍາພາແນວຄິດໃຫ້ຖືເປັນບັນຫາສໍາຄັນຕາມທິດຊີ້ນໍາ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ, ເອົາໃຈໃສ່ສ້າງເສດຖະກິດກົມກອງໃຫ້ມີຄວາມເຕີບໃຫຍ່ເຂັ້ມແຂງສືບຕໍ່ປັບປຸງກໍ່ສ້າງກົມກອງໃຫ້ມີທ່າກ້າວຂຶ້ນຢ່າງບໍ່ຢຸດຢັ້ງ.  ໃນຕອນທ້າຍ ສະຫາຍ ພົນຕີ ປອ ວົງຄໍາ ພົມມະກອນ ໄດ້ກ່າວມອບເງິນຈໍານວນ 360.000.000 ກີບ ໃຫ້ແກ່ກອງບັນຊາການທະຫານແຂວງຈຳປາສັກ ໄປມອບຕໍ່ໃຫ້ກອງພັນຕີພິເສດ 709 ເພື່ອເປັນທຶນສົມທົບໃນການກໍ່ສ້າງເຂື່ອນ ຂັງນໍ້າຢູ່ກອງພັນຕີພິເສດ 709 ທະຫານແຂວງຈໍາປາສັກ. ກ່າວຮັບໂດຍ ສະຫາຍ ພົນຈັດຕະວາສຸໄກ ພິມມະສານ ພ້ອມທັງກ່າວຄວາມຂອບໃຈ ແລະ ຮູ້ບຸນຄຸນ ຢ່າງສູງມາຍັງຄະນະພັກ-ຄະນະນໍາກະຊວງປ້ອງກັນປະເທດທີ່ມີຄວາມເປັນຫ່ວງເປັນໃຍ ແລະ ຈະນໍາເອົາເງິນຈໍານວນດັ່ງ ກ່າວໄປໝູນໃຊ້ເຂົ້າໃນການປັບປຸງກໍ່ສ້າງກໍາລັງ-ກໍ່ສ້າງກົມກອງໃຫ້ມີໃບໜ້າອັນໃໝ່ກ້າວຂຶ້ນຢ່າງບໍ່ຢຸດຢັ້ງ.


ໂດຍ: ດາວົງ ບຸດຕະລົງ























------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments