ເມືອງໄຊບູລີ ຈັດກອງປະຊຸມປຶກສາຫາລື, ຄົ້ນຄວ້າຜ່ານເນື້ອໃນໃສ່ປື້ມປະຫວັດຄວາມເປັນມາຂອງເມືອງໃຫ້ສົມບູນ



ເພື່ອເປັນການອະນຸລັກປົກປັກຮັກສາແຫຼ່ງມໍລະດົກທາງດ້ານວັດທະນະທໍາທ້ອງຖິ່ນກໍ່ຄືດິນແດນໄຊບູລີໃນສະໄໝບູຮານ, ສະນັ້ນມາໃນວັນທີ 21 ສິງຫາ 2020 ນີ້, ຢູ່ທີ່ຫ້ອງປະຊຸມຊັ້ນສອງຂອງຫ້ອງວ່າການປົກຄອງເມືອງໄຊບູລີແຂວງສະຫວັນນະເຂດໄດ້ຈັດກອງປະຊຸມຜ່ານເນື້ອໃນປື້ມປະຫວັດຄວາມເປັນມາຂອງເມືອງເພື່ອເປັນການເອກະສານອ້າງອີງເຖິງດິນແດນໄຊບູລີສະໄໝບູຮານໂດຍພາຍໃຕ້ການໃຫ້ກຽດເຂົ້າຮ່ວມເປັນປະທານຂອງທ່ານ ປອ ຄໍາເຜີຍ ຜັນທະຈອນ ຮອງເລຂາພັກແຂວງປະທານສະພາປະຊາຊົນແຂວງທັງເປັນຜູ້ຄົ້ນຄວ້າປະຫວັດສາດຂອງແຂວງ, ມີບັນດາອະດີດການນໍາຂອງແຂວງ, ພະແນກການກ່ຽວຂ້ອງແຂວງ, ບັນດາການນໍາຂັ້ນເມືອງ, ອະດີດການນໍາເມືອງພະນັກງານບໍານານອາວຸໂສ, ບັນດາຫົວໜ້າຫ້ອງການທີ່ກ່ຽວຂ້ອງອ້ອມຂ້າງເມືອງ ເຂົ້າຮ່ວມ

Image may contain: 5 people, people sitting and indoor

ຈຸດປະສົງໃນການຈັດກອງປະຊຸມໃນຄັ້ງນີ້, ກໍ່ເພື່ອລະດົມແນວຄິດຂອງຫຼາຍພາກສ່ວນ, ເປັນຕົ້ນແມ່ນການໃຫ້ຂໍ້ມູນໃນການຂຽນປື້ມປະຫວັດຄວາມເປັນມາຂອງດິນແດນໄຊບູລີໃນສະໄໝບູຮານ, ໃນນັ້ນທ່ານ ອະນຸຊາ ປະທຸມມະແສງ ພະນັກງານບໍານານ ອາວຸໂສ ອະດີດຮອງເຈົ້າໄຊບູລີ ທັງເປັນຜູ້ຄົ້ນຄວ້າປະສາດຂອງເມືອງກໍ່ໄດ້ໃຫ້ຮູ້ວ່າ: ດິນແດນໄຊບູລີ ສະໄໝບູຮານມີປະຫວັດ ແລະ ຄວາມເປັນມາຄື: ສະໄໝອານາຈັກສີໂຄດຕະບູນ (ກ່ອນໜ້ານີ້ປະມານ 3.000 ປີ ) ໄຊບູລີເປັນເມືອງໜຶ່ງເຊິ່ງກວມເອົາເຂດແຫຼ່ງອະລິຍະທໍາທີ່ເກົ່າແກ່ຄື ອານາຈັກສີໂຄດຕະບູນຕາມປະຫວັດທີ່ກ່າວຂານກັນມາ ແລະ ສີລາຈາລຶກໃນບົດຂຽນຈາກປື້ມພົງສາວະດານ, ເປັນຈຸດທີ່ຕັ້ງຂອງຣາຊະທານີເມືອງຫຼວງແຫ່ງອານາຈັກສີໂຄດຕະບູນໃນພື້ນທີ່ບ້ານໜອງເຮືອທອງ ແລະ ບ້ານນາຂະໜາຍໃນປັດຈຸບັນ, ຕາມລໍາເຊບັ້ງໄຟຂື້ນໄປຫ່າງຈາກແມ່ນໍ້າຂອງ 15 ກິໂລແມັດ, ດິນແດນແຫ່ງນີ້ເຄີຍເປັນເມືອງທີ່ມີຄວາມຈະເລີນຮຸ່ງເຮືອງທາງດ້ານເສດຖະກິດ-ສັງຄົມ, ວັດທະນະທໍາ ແລະ ມີຄວາມເຂັ້ມແຂງທາງດ້ານການສູ້ຮົບ, ເຊິ່ງປັດຈຸບັນກໍ່ຍັງມີຫຼັກຖານໃຫ້ເຫັນຢ່າງຈະແຈ້ງ ຄື ມີຄັນຄູ ຊຶ່ງເຊື່ອວ່າ ແມ່ນກໍາແພງເມືອງ ມີຄວາມຍາວເຖິງ 2.484 ແມັດ, ມີຮອງຮອຍເສດຊາກໂລຫະເຄື່ອງສະຕາອາວຸດ ແລະ ສໍາຄັນແມ່ນໄດ້ພົບເຫັນເຄື່ອງທີ່ເປັນວັດຖຸບູຮານປະເພດເຄື່ອງເອ້ຍ້ອງເຄື່ອງໃຊ້ທີ່ສໍາຄັນຂອງພະຣາຊາໃນສະໄໝບູຮານ ແລະ ຍັງມີຫຼາຍຈຸດທີ່ພົບເຫັນເປັນຕົ້ນແມ່ນໄບເສມາ ວັດກະຕຶບບ້ານກາງ ສີໄຄ ນາມ່ວງ ແລະອື່ນໆ ທີ່ສະແດງໃຫ້ເຫັນວ່າດິນແດນແຫ່ງນີ້ເປັນດິນແດນທີ່ມີຄວາມຈະເລີນຮຸ່ງເຮືອງໃນເມື່ອກ່ອນ

Image may contain: 20 people, people standing, crowd and outdoor

ຈົນມາຮອດວັນທີ 13 ກໍລະກົດ ປີ ຄສ 1987 ເມືອງໄຊບູລີ ໄດ້ປະກາດສ້າງຕັ້ງຂຶ້ນ ທີ່ບ້ານແກ້ງກະເບົາປະກອບ ມີ 10 ຕາແສງ, 71 ບ້ານ, ມີພົນລະເມືອງທັງໝົດ 33.476 ຄົນ, ຍິງ 17.672 ຄົນ, ໂດຍແມ່ນທ່ານ ສູນທອນ ພະທິທັກເປັນເລຂາພັກເມືອງເຈົ້າເມືອງຄົນທໍາອິດຕໍ່ມາໃນ ປີ ຄສ 2008 ແມ່ນໄດ້ຍ້າຍສໍານັກງານອົງການປົກຄອງເມືອງມາຢູ່ບ້ານເຄືອເຂົາກາດເຊິ່ງຕິດກັບທາງເລກທີ 13 ໃນປັດຈຸບັນ, ຈາກນັ້ນກອງປະຊຸມ ບັນດາຜູ້ຄົ້ນຄວ້າປະຫວັດສາດຂອງແຂວງ-ເມືອງ ຍັງໄດ້ປະກອບຄໍາຄິດຄໍາເຫັນໃສ່ປື້ມປະຫວັດດັ່ງກ່າວ, ໃນນັ້ນໄດ້ເວົ້າເຖິງໂຄງສ້າງຂອງບົດ, ປະຫວັດຄວາມເປັນມາ, ສັບຄໍາເວົ້າພາສາຂຽນ, ເນື້ອໃນ, ການໃສ່ຫົວຂໍ້ທີ່ຖືກຕ້ອງ, ເຂົ້າໃຈງ່າຍ, ໂອກາດດຽວກັນນີ້ ທ່ານ ປອ ຄໍາເຜີຍ ຜັນທະຈອນ ຮອງເລຂາພັກແຂວງ ປະທານສະພາປະຊາຊົນ ແຂວງສະຫວັນນະເຂດ ຍັງໄດ້ໃຫ້ຮູ້ວ່າ: ການຂຽນປື້ມປະຫວັດສາດຂອງເມືອງ, ຕ້ອງເປັນການຂຽນແບບວິທະຍາສາດ, ຈະຕ້ອງໄດ້ຮີບໂຮມເອົາບັນດາຂໍ້ມູນ, ເລື່ອງເລົ່າຂານຕ່າງໆ ທີ່ກ່ຽວພັນກັບກາກໍາເນີດ ແລະ ທີ່ມາຂອງເມືອງ, ການຂຽນຕ້ອງຮູ້ທີ່ໄປທີ່ມາຂອງປະຫວັດນັ້ນໆ , ຜູ້ຂຽນຈະຕ້ອງໄດ້ອະທິບາຍ, ມີເນື້ອໃນສາມາດພິສູດໄດ້, ຢຶດໝັ້ນໃນຫຼັກການຂຽນໃນສັດຈະວິພາກ, ເພື່ອເປັນຂໍ້ມູນໃນການອະນຸລັກຮັກສາແຫຼ່ງມໍໍລະດົກວັດທະນະທໍາອັນດີງາມໄວ້, ທັງນີ້ກໍ່ເພື່ອໃຫ້ຜູ້ໄດ້ອ່ານໄດ້ຮຽນຮູ້ປະຫວັດຄວາມເປັນມາຂອງເມືອງ ກໍ່ຄືທ້ອງຖິ່ນນັ້ນໆ ໃຫ້ຄວາມສົນໃຈທີ່ຢາກຈະສຶກສາ ພ້ອທັງບົ່ງບອກເຖິງເອກະລັກເອກອ້າງຂອງເມືອງ ເພື່ອພີມອອກສູ່ສາຍຕາຂອງສັງຄົມຢ່າງກວ້າງຂວາງ .





ພາບ ແລະຂ່າວ ຄໍາກອນ ພອນມາລາ



















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments