ຄະນະນຳຂອງແຂວງຫຼວງພະບາງ ຢ້ຽມຢາມ ແລະເຮັດວຽກຢູ່ເມືອງ ວຽງຄໍາ





ວັນທີ  25 ສິງຫາ 2020 ນີ້, ທ່ານ ຄໍາຂັນ ຈັນທະວີສຸກ ເຈົ້າແຂວງຫລວງພະບາງ ພ້ອມດ້ວຍຄະນະໄດ້ເຄື່ອນໄຫວຊຸກຍູ້ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 12 ແລະແຜນພັດທະນາເສດຖະກິດ ຂອງເມືອງວຽງຄໍາ ໃນໄລຍະ 6 ເດືອນຕົ້ນປີ, ໂດຍໄດ້ຮັບການຕ້ອນຮັບຈາກ ທ່ານ ຊາຍພອນ ຈັນທຸມມາ ເຈົ້າເມືອງວຽງຄໍາ ພ້ອມດ້ວຍຄະນະນຳຂອງເມືອງ ຢູ່ສະໂມສອນໃຫຍ່ຂອງເມືອງ. ໂອກາດນີ້ ທ່ານເຈົ້າເມືອງໆວຽງຄໍາ ໄດ້ລາຍງານສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 12 ຂອງອົງຄະນະພັກເມືອງ, ແຜນພັດທະນາເສດຖະກິດ-ສັງຄົມ ແລະການຊຸກຍູ້ການຜະລິດລະດູຝົນ, ທ່ານກ່າວວ່າ: ພາຍຫຼັງສໍາເລັດກອງປະຊຸມໃຫຍ່ອົງຄະນະພັກເມືອງ ຄັ້ງທີ 12 ຄະນະນໍາຂອເມືອງ ໄດ້ຜັນຂະຫຍາຍ ເນື້ອໃນມະຕິກອງປະຊຸມໃຫຍ່ ເປັນແຜນດໍາເນີນງານ ແລະ ເປັນໂຄງການລະອຽດ ໃນແຕ່ຂົງເຂດວຽກງານ, ພ້ອມກໍານົດພາລະບົດບາດ, ແບ່ງຄວາມຮັບຜິດຊອບ ໃຫ້ຄະນະບໍລິຫານງານພັກເມືອງນໍາພາ-ຊີ້ນໍາ ແລະດໍາເນີນກອງປະຊຸມຄົບຄະນະ ບໍລິຫານງານເປີດກວ້າງສຳເລັດແລ້ວ 4 ຄັ້ງ ແລະຫັນລົງຮາກຖານການເມືອງຕາມຂະແໜງການຕິດພັນກັບຂະບວນການໃຫຍ່ 2 ຄັ້ງ, ໂດຍໄດ້ເຜີຍແຜ່ ຜົນສຳເລັດມະຕິກອງປະຊຸມໃຫຍ່ຂອງອົງຄະນະພັກເມືອງ, ພ້ອມທັງລົງຊຸກຍູ້ ໃນການຫາງຫາກະກຽມ ເຂົ້າສູ່ການຜະລິດລະດູຝົນ ຫັນຈາກການປູກການລ້ຽງແບບເກົ່າ ບໍ່ມີຈຸດສຸມ ມາເປັນກຸ່ມຜະລິດຂອງປະຊາຊົນ ທີ່ມີຈຸດສຸມ, ຊຸກຍູ້ ບັນດາກຸ່ມການຜະລິດ ນໍາເອົານິຕິກໍາ ທີ່ສໍາຄັນ ເພື່ອໄປສຶກສາອົບຮົມ ໃຫ້ເປົ້າໝາຍ ແລະ ປະຊາຊົນ ກ່ຽວກັບ ການເຝົ້າລະວັງ ແລະຕອບຕ້ານພະຍາດລະບາດ ເປັນຕົ້ນ ພະຍາດໂຄວິດ 19, ເກັບກໍາຂໍ້ມູນຄອບຄົວ, ບ້ານທຸກຍາກ, ບ້ານພັດທະນາ ຕາມແຜນວາງໄວ້ໃນປີ 2020 ມີທັງໝົດ 86 ໂຄງການ ປະຕິບັດແລ້ວ 44 ໂຄງການ ເທົ່າກັບ 51,16% ,

ຈາກນັ້ນບັນດາຫົວໜ້າຫ້ອງການແຕ່ລະຂົງເຂດພາຍໃນເມືອງວຽງຄໍາ ກໍ່ໄດ້ພັດປ່ຽນກັນຂຶ້ນລາຍງານສະພາບລວມໂດຍຫຍໍ້ຂອງວຽກງານວິຊາສະເພາະຂອງຕົນເພື່ອພັດທະນາເມືອງວຽງຄໍາພັດທະນາເທື່ອລະກ້າວ. ຕອນທ້າຍ ທ່ານ ຄໍາຂັນ ຈັນທະວີສຸກ ໄດ້ໃຫ້ທິດຊີ້ນໍາຕໍ່ຄະນະນຳຂອງເມືອງ ສຸມໃສ່ການຊີ້ນຳວຽກງານຮອບດ້ານ ເພື່ອໃຫ້ເມືອງວຽງຄຳໄດ້ຮັບການພັດທະນາດີຂື້ນ ອັນສຳຄັນຕ້ອງສືບຕໍ່ຜັນຂະຫຍາຍມະຕິກອງປະຊຸມຂອງພັກແຕ່ລະຂັ້ນ ໃຫ້ເປັນແຜນງານ ໂຄການອັນລະອຽດ ເພື່ອສະດວກໃນການປະຕິບັດວຽກງານຂອງແຕ່ລະຂົງເຂດວຽກງານ ໃຫ້ມີຜົນສຳເລັດ ຕາມຄາດໝາຍທີ່ວາງໄວ້.

ໂອກາດການລົງຢ້ຽມຢາມ ແລະເຮັດວຽກຢູ່ເມືອງວຽງຄໍາ ຄັ້ງນີ້ ຕາງໜ້າພະແນກການຂອງແຂວງ ແລະຫ້ອງການຂອງເມືອງ ໄດ້ປະກອບຄຳເຫັນໃນຂົງເຂດວຽກງານທີ່ຮັບຜິດຊອບ ເພື່ອໃຫ້ຄະນະນຳຂອງເມືອງ ແລະແຂວງຊອກຫາວິທີແກ້ໄຂຂໍ້ຄົງຄ້າງໃນຕໍ່ໜ້າ ທ່ານເຈົ້າແຂວງຫຼວງພະບາງພ້ອມດ້ວຍຄະນະ ໄດ້ໄປຢ້ຽມຢາມພື້ນຖານການຜະລິດຂອງປະຊາຊົນຕື່ມອີກ.

ຂ່າວ: ທະນູສີນ ອິດທິພົນ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments