ທ່ານ ສັນ​ຕິ​ພາບ​ ພົມ​ວິ​ຫານ ລົງ​ຊີ້​ນຳ​ວຽ​ກ​ງານ​ຢູ່​ເມື​ອງ​ທ່າ ​ປ​າງ​ທອງ



ໃນວັນທີ 7 ສິງຫາ 2020, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມຄະນະໄດ້ລົງເຄື່ອນໄຫວຊີ້ນຳວຽກງານຢູ່ທີ່ເມືອງທ່າປາງທອງ ພ້ອມທັງຕິດຕາມສະພາບການຟື້ນຟູຊົນລະປະທານເຊສາລາລອງ ໂດຍການຕ້ອນ ຮັບຈາກທ່ານ ຄຳປະສົງ ຂົງຄຳ ເຈົ້າເມືອງທ່າປາງທອງ ພ້ອມຄະນະການນຳ ແລະ ພາກສ່ວນຕ່າງໆທີ່ກ່ຽວຂ້ອງຂອງເມືອງ.

Image may contain: 7 people, people standing, outdoor and nature

ໂອກາດນີ້, ທ່ານ ເຈົ້າເມືອງ ທ່າປາງທອງກໍ່ໄດ້ລາຍງານໃຫ້ຮູ້ສະພາບການພົ້ນເດັ່ນພາຍໃນເມືອງໂດຍສັງເຂບວ່າ: ມາຮອດປະຈຸບັນ, ການປັັກດຳເຂົ້ານາປີຂອງປະຊາຊົນປະຕິບັດໄດ້ແລ້ວ 72,79% ຂອງເນື້ອທີ່ນາທັງໝົດ, ຕົກກ້າໄດ້ 100% ແຕ່ຍ້ອນເກີດສະພາບແຫ້ງແລ້ງເຮັດໃຫ້ກ້າຕາຍເຖິງ 20%, ການປູກພືດລະດູຝົນປະຕິບັດໄດ້ 96,23% ຂອງເນື້ອທີ່ແຜນການ, ທາງດ້ານການກໍ່ສ້າງໂຮງຮຽນມັດທະຍົມຕົ້ນທົ່ງປາງ ທີ່ຕັ້ງຢູ່ກຸ່ມບ້ານທີ 3 ຫ້ວຍໝື່ນຄາດວ່າຈະໃຫ້ສຳເລັດໃນທ້າຍເດືອນສິງຫາປີນີ້; ສຳລັບການສ້ອມແປງ ຄອງຊົນລະປະທານເຊສາລາລອງ ແລະ ການກໍ່ສ້າງຄອງເໝືອງເອົານ້ຳເຂົ້າສູນເຕັກນິກ ປະຈຸບັນປະຕິບັດສຳເລັດແລ້ວ 50% ຂອງໜ້າວຽກທັງໝົດໃນນີ້ການສ້ອມແປງຄອງເໝືອງແມ່ມີ 3 ຈຸດ, ຍາວ900 ແມັດ, ກໍ່ສ້າງຄອງເໝືອງເອົານ້ຳເຂົ້າສູນເຕັກນິກມີຄວາມຍາວ 1.100 ແມັດ, ລວມມູນຄ່າທັງໝົດ 4,8 ຕື້ກີບເຊິ່ງນຳໃຊ້ຮ່ວງງົບປະມານສ້ອມແປງສຸກເສີນໄພພິບັດປີ 2019, 

Image may contain: 7 people, people standing, hat, shoes and outdoor

ໂດຍ ໄດ້ເລີ່ມລົງມືສ້ອມແປງມາແຕ່ ເດືອນພະຈິກ 2019 ແລະ ຄາດວ່າຈະໃຫ້ສຳເລັດໃນ ເດືອນຕຸລາ 2020 ໂດຍ​ແມ່ນ​ບໍ​ລິ​ສັດ​ວັນ​ວິ​ໄລ​ກໍ່​ສ້າງ ແລະ​ ສ້ອມ​ແປງ​ຊົນ​ລະ​ປະ​ທານຈຳ​ ກັດ ​ເປັນ​ຜູ້​ຮັບ​ເໝົາ​ການກໍ່ສ້າງ​ ສ້ອມ​ແປງ. ພ້ອມດຽວກັນນີ້, ເມືອງທ່າປາງທອງພວກເຮົາ ຍັງໄດ້ເອົາໃຈໃສ່ໃນການຕິດ ຕາມເຝົ້າລະວັງ ແລະປະຕິບັດ ມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ແລະ ພະຍາດໄຂ້ຍຸງລາຍຊຶ່ງໃນປະຈຸບັນພາຍໃນເມືອງຍັງມີປະກົດການລັກລອບເຂົ້າເມືອງຂອງຄົນຕ່າງປະເທດ ແລະ ພົບກໍລະນີໄຂ້ຍຸງ ເກີດຂຶ້ນທົ່ວເມືອງຈຳນວນ 52 ກໍລະນີ.

Image may contain: one or more people, sky and outdoor

ຈາກນັ້ນ, ທ່ານ ສັນຕິພາບ ພົມວິຫານ ກໍ່ໄດ້ກ່າວມີຄຳເຫັນຊີ້ນຳຕໍ່ເມືອງໂດຍທ່ານໄດ້ມີຄວາມເປັນຫ່ວງເປັນໃຍຕໍ່ສະພາບການດຳລົງຊີວິດຂອງພໍ່ແມ່ປະຊາຊົນບັນດາເຜົ່າໃນນີ້ທ່ານໄດ້ເນັ້ນຢ້ຳໃຫ້ເມືອງສືບຕໍ່ເອົາໃຈໃສ່ຕໍ່ການປະຕິບັດມາດຕະການສະກັດກັ້ນພະຍາດ ໄຂ້ຍຸງລາຍ ໂດຍສະເພາະແມ່ນການທຳລາຍໜອນນ້ຳຍຸງລາຍ ອັນສຳຄັນແມ່ນໃຫ້ມີການໂຄສະນາສຸຂະສຶກສາໃຫ້ປະຊາຊົນມີຄວາມຮັບຮູ້ເຂົ້າໃຈເຖິງໄພອັນຕະລາຍຂອງພະຍາດ ດັ່ງກ່າວພ້ອມທັງຕື່ນຕົວເຂົ້າຮ່ວມໃນຂະບວນການປ້ອງກັນພະຍາດດັ່ງກ່າວໃຫ້ຫຼາຍຂຶ້ນກວ່າເກົ່າ, ຕໍ່ກັບພະຍາດໂຄວິດ-19 ທາງແຂວງ ແມ່ນມີຄວາມເປັນຫ່ວງທີ່ສຸດເນື່ອງຈາກໃນທົ່ວໂລກຍັງສືບຕໍ່ມີການແຜ່ລະບາດ ແລະ ໃນປະເທດອ້ອມຂ້າງພວກເຮົາແມ່ນໄດ້ມີການລະບາດຮອບສອງແລ້ວສະນັ້ນ, ພວກເຮົາທຸກຄົນຕ້ອງໄດ້ມີສະຕິຕື່ນຕົວນຳກັນ ແລະ ພ້ອມກັນສືບຕໍ່ປະຕິບັດມາດຕະການໃນການປ້ອງກັນ, ຄວບຄຸມການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດໂດຍໃຫ້ປິດຮ້ານບໍລິການກິນດື່ມ, ຮ້ານອາຫານຊຶ່ງຈາກການຮັບຟັງການລາຍງານເຫັນວ່າຍັງມີປະກົດການຄົນຕ່າງປະເທດ, ຄົນຕ່າງດ້າວລັກລອບ ເຂົ້າມາໃນເມືອງ ທ່າປາງທອງ ເຊິ່ງລ້ວນແລ້ວມາຈາກປະເທດທີ່ມີການລະບາດຂອງພະຍາດໂຄວິດ-19 ສະນັ້ນ, ເມືອງຕ້ອງໄດ້ລົງຕິດຕາມກວດກາຢ່າງຈິງຈັງພ້ອມທັງເກັບກຳຕົວເລກສະຖິຕິຄົນຕ່າງປະເທດ, ຕ່າງດ້າວທີ່ເຂົ້າມາພາຍໃນເມືອງຄືນໃໝ່ຫາກວ່າຄົນ ໃດບໍ່ມີເອກະສານ ຫຼື ວ່າເຂົ້າມາກາຍກຳນົດ, ເຂົ້າ​ມາບໍ່ຖືກຕ້ອງຕ້ອງສົ່ງກັບຄືນປະເທດຢ່າງເປັນທາງການ, ທາງດ້ານແຮງງານລາວທີ່ກັບຄືນປະເທດພາຍຫຼັງຜ່ານການກັກກັນໂຕແລ້ວ, ຕ້ອງໄດ້ຊຸກຍູ້ເຂົາເຈົ້າທຳການຜະລິດກະສິກຳເນື່ອງຈາກວ່າສ່ວນຫຼວງຫຼາຍແມ່ນມີເງື່ອນໄຂ ແລະ ຕິດພັນກັບການປູກ-ການລ້ຽງພ້ອມນີ້, ກໍ່ໃຫ້ເມືອງເອົາໃຈໃສ່ກະກຽມຄວາມພ້ອມດ້ານຕ່າງໆເພື່ອຕ້ານແລ້ງ-ຕ້ານຖ້ວມ. ສຳລັບການສ້ອມແປງຄອງເໝືອງຊົນລະປະທານເຊສາລາລອງ ທ່ານ ເຈົ້າແຂວງ ກໍ່ໄດ້ເນັ້ນຢ້ຳໃຫ້ເອົາໃຈໃສ່ໃນການຈັດຕັ້ງປະຕິບັດການສ້ອມແປງເພື່ອໃຫ້ສຳເລັດຕາມແຜນການທີ່ວາງໄວ້ທັງຍັງຕ້ອງຮັບປະກັນຄຸນະພາບ ແລະ ຖືກຕາມເຕັກນິກວິຊາການ.

Image may contain: 5 people, people standing and outdoor

ຕໍ່ມາ, ທ່ານເຈົ້າແຂວງ ພ້ອມຄະນະກໍ່ໄດ້ເດີນທາງລົງຕິດຕາມສະພາບການຟື້ນຟູຊົນລະປະທານເຊສາລາລອງ (ສູນເຕັກນິກ, ການກໍ່ສ້າງຄອງເໝືອງເອົານ້ຳເຂົ້າສູນເຕັກນິກ ແລະ ຈຸດສ້ອມແປງຄອງເໝືອງ), ລົງຢ້ຽມຢາມການກໍ່ສ້າງໂຮງຮຽນມັດທະຍົມຕົ້ນທົ່ງປາງ ແລະ ຕິດຕາມເບິ່ງອ່າງເກັບນ້ຳຊົນປະທານເຊກືທີ່ຂຶ້ນກັບຈຸດສຸມເຊກື-ພູມະລີຕື່ມອີກ.





















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments