ແຂວງຄຳມ່ວນ ຈັດກອງປະຊຸມປະເມີນຄວາມຄືບໜ້າ ຂອງການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກ ຕາມແລວທາງອະນຸພາກຟື້ນແມ່ນໍ້າຂອງ


ແຫລ່ງຂ່າວຈາກແຂວງຄຳມ່ວນໃຫ້ຮູ້ວ່າ: ແຂວງຄຳມ່ວນ ຈັດກອງປະຊຸມ ປະເມີນຄວາມຄືບໜ້າຂອງການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກຕາມແລວທາງອະນຸພາກຟື້ນແມ່ນໍ້າຂອງ IV ໃນວັນທີ 25 ສິງຫາ 2020 ໂດຍມີ ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ, ທ່ານ ວຽງນາມ ດວງພະຈັນ ຫົວໜ້າກົມເຄຫາ ແລະ ຜັງເມືອງກະຊວງໂຍທາທິການ ແລະ ຂົນສົ່ງ, ມີບັນດາຊ່ຽວຊານຈາກໂຄງການ, ພະແນກການ, ຂະແໜງການຕ່າງໆກ່ຽວຂ້ອງເຂົ້າຮ່ວມ.

Image may contain: 1 person, indoor

ການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກປະກອບມີ 5 ກິດຈະກໍາຫລັກຄື: ກໍ່ສ້າງຮ່ອງລະບາຍນໍ້າໃນຕົວເມືອງ 5 ສາຍຮ່ອງ, ມີຄວາມຍາວປະມານ 9 ກິໂລແມັດ, ຕິດຕັ້ງປະຕູນໍ້າ ແລະ ຈັກດູດນໍ້າ 4 ແຫ່ງ, ກໍ່ສ້າງອ່າງບຳບັດນໍ້າເປື້ອນແບບບໍ່ລວມສູນຂະໜາດນ້ອຍ 4 ແຫ່ງສາມາດບຳບັດນໍ້າເປື້ອນໄດ້ປະມານ 200 ແມັດກ້ອນຕໍ່ມື້, ປັບປຸງສະໜາມກໍາຈັດຂີ້ເຫຍື້ອແບບສຸຂະອະນາໄມ ເຊິ່ງສາມາດບັນຈຸປະມານ 300.000 ແມັດກ້ອນ, ໃນນີ້ລວມທັງການສ້າງເສັ້ນທາງ, ຄອງລະບາຍນໍ້າ, ຫ້ອງການພ້ອມທັງປະກອບພາຫະນະໃນການເກັບມ້ຽນຂີ້ເຫຍື້ອ, ລົດອັດບົດຂີ້ເຫຍື້ອ; ກໍ່ສ້າງປ້ອງກັນຕາຝັ່ງເຈື່ອນແມ່ນໍ້າຂອງ 4 ແຫ່ງ, ມີຄວາມຍາວປະມານ 4 ກິໂລແມັດ, ປັບປຸງຟື້ນຟູບູລະນະໃຈກາງຕົວເມືອງເກົ່າ ແລະ ອະນຸລັກມໍລະດົກຂອງຕົວເມືອງ ເພື່ອເປັນສູນກາງການທ່ອງທ່ຽວ, ສົ່ງເສີມການທ່ອງທ່ຽວແບບຍືນຍົງ ແລະ ປ້າຍບອກທິດທາງການສັນຈອນຕ່າງໆພາຍໃນຕົວເມືອງ. ສໍາລັບຄວາມຄືບໜ້າຂອງບັນດາກິດຈະກຳຕ່າງໆ ໂດຍສ່ວນໃຫຍ່ແມ່ນໄດ້ສໍາເລັດໃນການສໍາຫລວດ, ວັດແທກ, ເກັບກໍາຂໍ້ມູນ, ການອອກແບບນຳສະເໜີຊ່ຽວຊານທີ່ປຶກສາເພື່ອກວດກາ ແລະ ປັບປຸງໃຫ້ແທດເໝາະກັບພື້ນທີ່ຕົວຈິງລວມເຖິງການຄິດໄລ່ມູນຄ່າຊົດເຊີຍໃຫ້ປະຊາຊົນທີ່ຖືກຜົນກະທົບຈາກໂຄງການ.

Image may contain: 2 people, people sitting, table and indoor

ໂຄງການພັດທະນາຕົວເມືອງຕາມແລວທາງອະນຸພາກຟື້ນແມ່ນໍ້າຂອງ IV ແມ່ນໂຄງການສົມທົບທຶນລະຫວ່າງທະນາຄານພັດທະນາອາຊີ ກັບ ລັດຖະບານແຫ່ງ ສ ປປ ລາວ ເຊິ່ງປະກອບມີ 2 ຕົວເມືອງຄື: ເມືອງປາກຊັນ ແຂວງບໍລິຄຳໄຊ ແລະ ເມືອງທ່າແຂກ ແຂວງຄຳມ່ວນລວມມູນຄ່າທັງໝົດ 54,06 ລ້ານໂດລາ, ເຊິ່ງມີໄລຍະເວລາໃນການຈັດຕັ້ງປະຕິບັດ 5 ປີ (2019-2023) ມີຈຸດປະສົງໃນການເສີມສ້າງໃຫ້ມີການແຂ່ງຂັນຂອງແລວທາງອະນຸພາກຟື້ນແມ່ນໍ້າຂອງ ໂດຍຜ່ານໂຄງລ່າງພື້ນຖານດ້ານສິ່ງແວດລ້ອມຕົວເມືອງ ຕາມແລວທາງເສດຖະກິດເໜືອ-ໃຕ້ ທີ່ເຊື່ອມ ສປປ ລາວ ກັບ ສປ ຈີນ, ໄທ ແລະ ມຽນມາ.

ຂ່າວ: ກອງຄຳ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments