ຫ້ອງການຄຸ້ມຄອງນັກສຶກສາ ມຊ ຖອດຖອນວຽກງານຄຸ້ມຄອງລະບຽບວິໄນ ແລະ ພັດທະນານັກສຶກສາ



ຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ (ມຊ) ຖອດຖອນວຽກງານຄຸ້ມຄອງລະບຽບວິໄນ ແລະ ພັດທະນານັກສຶກສາພາຍໃນ ປະຈຳສົກສຶກສາ 2019-2020 ແລະ ວາງທິດທາງແຜນການໃນຕໍ່ໜ້າ (2020-2021) ພ້ອມທັງປຶກສາຫາບັນຫາວຽກງານທີ່ສຳຄັນຕ່າງໆໃຫ້ພັດທະນາຂຶ້ນເທື່ອລະກ້າວ.


Image may contain: 2 people, people sitting, table, drink, child and indoor


ເມື່ອວັນທີ 19 ສິງຫາ ຜ່ານມາທີ່ຫ້ອງປະຊຸມສຳນັກງານອະທິການບໍດີມະຫາວິທະຍາໄລແຫ່ງຊາດໄດ້ມີກອງປະຊຸມຖອດຖອນບົດຮຽນວຽກງານຄຸ້ມຄອງລະບຽບວິໄນ ແລະ ພັດທະນານັກສຶກສາ, ໂດຍພາຍໃຕ້ການເປັນປະທານຂອງທ່ານ ຮສ ໂພສີ ທິບດາວັນ ຮອງອະທິການບໍດີມະຫາວິທະຍາໄລແຫ່ງຊາດ, ມີທ່ານ ຄຳແສນ ສຸດທະວົງຫົວໜ້າຫ້ອງການຄຸ້ມຄອງນັກສຶກສາມະຫາວິທະຍາໄລແຫ່ງຊາດ, ພ້ອມດ້ວຍບັນດາຜູ້ຕາງໜ້າຈາກພະແນກຄຸ້ມຄອງນັກສຶກສາແຕ່ລະຄະນະວິຊາພາຍໃນ ມຊ ເຂົ້າຮ່ວມ.


ການຈັດກອງປະຊຸມໃນຄັ້ງນີ້, ແມ່ນເພື່ອເປັນການສະຫຼຸບ ແລະ ຖອດຖອນບົດຮຽນວຽກງານຄຸ້ມຄອງລະບຽບວິໄນ ແລະ ພັດທະນານັກສຶກສາພາຍໃນ ປະຈຳສົກສຶກສາ 2019-2020 ແລະ ວາງແຜນການໃນຕໍ່ໜ້າ (2020-2021) ໃຫ້ລະອຽດ ພ້ອມທັງປຶກສາຫາລື ຄົ້ນຄວ້າວຽກງານຕ່າງໆທີ່ຈະຕ້ອງຈັດຕັ້ງປະຕິບັດໃນຕໍ່ໜ້າໃຫ້ມີປະສິດທີຜົນຂຶ້ນ.


Image may contain: 22 people, indoor


ໃນກອງປະຊຸມ ທ່ານ ກວດເພັດ ພວງມາລາ ຮອງຫົວໜ້າຫ້ອງການຄຸ້ມຄອງນັກສຶກສາໄດ້ຜ່ານບົດສະຫຼຸບຂອງພະແນກຄຸ້ມຄອງລະບຽບວິໄນ ແລະ ພັດທະນານັກສຶກສາ ມຊ ປະຈຳສົກສຶກສາ 2019-2020, ຊຶ່ງໃນໄລຍະຜ່ານມາໄດ້ຖືເອົາວຽກງານສຶກສາອົບຮົມແນວຄິດເປັນວຽກສຳຄັນ ແລະ ໄດ້ດຳເນີນການສຶກສາອົບຮົມແນວຄິດດ້ວຍຫຼາຍຮູບການໃຫ້ນັກສຶກສາໂດຍແທດເໝາະກັບສະພາບຄວາມເປັນຈິງ, ຖືເອົາວຽກງານແນວຄິດຕິດພັນເຂົ້າໃນວຽກງານວິຊາສະເພາະຂອງນັກສຶກສາ, ໄດ້ເຂົ້າຮ່ວມການຈັດຕັ້ງປະຖົມນິເທດກົດລະບຽບໃຫ້ແກ່ນັກສຶກສາພາຍໃນ, ຈັດພິມແຜ່ນພັບທີ່ມີຂໍ້ມູນພື້ນຖານໃນເບື້ອຕົ້ນ 7 ຢ່າງ ກ່ຽວກັບກົດລະບຽບນັກສຶກສາ ເພື່ອໃຫ້ນັກສຶກສາໃນໄລຍະການລົງທະບຽບນັກສຶກສາປີທີ 1 ໄດ້ຮັບຮູ້, ຕິດຕາມ ແລະ ກວດກາການປະຕິບັດກົດລະບຽບການນຸ່ງຖືຂອງນັກສຶກສາແຕ່ລະຄະນະວິຊາ, ໄດ້ຮ່ວມມືກັບໂຮງງານເພັດປະກາຍ ໃນການບໍລິການຂາຍເຄື່ອງນຸ່ງນັກສຶກສາລາຄາຖືກໃຫ້ແກ່ນັກສຶກສາ ມຊ ແລະ ໃນສົກ 2019-2020 ໄດ້ຂາຍເຄື່ອງນຸ່ງຊຸດນັກສຶກສາທັງໝົດ 3.787 ຊຸດ, ຮ່ວມມືກັບພາກສ່ວນກ່ຽວຂ້ອງ ໃນການຜະລິດສາຍແອວກາ ມຊ ມາຈຳໜ່າຍ ແລະ ບໍລິການໃຫ້ແກ່ນັກສຶກສາ ມຊ ສົກ 2019-2020, ໄດ້ຂາຍສາຍແອວໃຫ້ນັກສຶກສາ ທັງໝົດ 5.153 ເສັ້ນ, ຮ່ວມມືກັບໂຮງຮຽນສອນຂັບລົດໄອທີຄອມກ່ຽວກັບການສິດສອນ ແລະ ການສອບເສັງເອົາໃບຂັບຂີ່ລົດຈັກ-ລົດໃຫຍ່ໃຫ້ແກ່ພະນັກງານ, ຄູອາຈານ ແລະ ນັກສຶກສາໃນໄລຍະທົດລອງ 3 ເດືອນ (ເດືອນ 6-8 ປີ 2019), ຊຶ່ງມີຜູ້ທີ່ມາລົງທະບຽນສອບເສັງໝົດ 57 ຄົນ.


ສ່ວນທິດທາງແຜນການໃນຕໍ່ໜ້າ ແມ່ນຈະສືບຕໍ່ຜັນຂະຫຍາຍຈຸດດີໃນໄລຍະຜ່ານມາ ແລະ ແກ້ໄຂຈຸດອ່ອນໃນຕໍ່ໜ້າຂອງວຽກງານຕ່າງໆ ຮ່ວມກັບພະແນກຄຸ້ມຄອງນັກສຶກສາແຕ່ລະຄະນະວິຊາ, ສືບຕໍ່ປັບປຸງວິທີການເຮັດວຽກໃຫ້ມີຄວາມໜັກແໜ້ນ ເຂັ້ມແຂງທາງດ້ານແນວຄິດການເມືອງ, ການຈັດຕັ້ງ, ປຸກລະດົມສ້າງຂະບວນການເຄື່ອນໄຫວຮັບປະກັນໜ້າທີ່ໃຈກາງທາງດ້ານວິຊາສະເພາະ ຄື: ການຄົ້ນຄວ້າຮໍ່າຮຽນ ແລະ ສືບຕໍ່ເຊີດຊູຖານະບົດບາດ ລັກສະນະນຳໜ້າຂອງພະແນກໃຫ້ໜັກແໜ້ນ, ເຂັ້ມແຂງ ແລະ ມີຄວາມເປັນເອກະພາບທັງພາຍໃນ ແລະ ພາຍນອກ. ນອກຈາກນັ້ນ, ຜູ້ເຂົ້າຮ່ວມແຕ່ລະພາກສ່ວນຍັງໄດ້ປຶກສາຫາລື ແລະ ປະກອບຄຳຄິດຄຳເຫັນ ເພື່ອໃຫ້ໄດ້ເນື້ອທີ່ຄົບຖ້ວນ ສົມບູນ ແລະ ເປັນໄປຕາມແຜນທີ່ວາງໄວ້.



ບົວລະພາ



















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments