ປກສ ເມືອງໂພນໂຮງ ຈັບຜູ່ຄ້າຂາຍຢາເສບຕິດ ໄດ້ອີກ 3 ຄົນ



ໃນວັນທີ 25 ສິງຫາ 2020 ຜ່ານມານີ້ ເຈົ້າໜ້າທີ່ຕຳຫຼວດໜ່ວຍງານສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ເມືອງໂພນໂຮງ ແຂວງ ວຽງຈັນ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຢູ່ ບ້ານ ນາເລົາ ເມືອງໂພນໂຮງ  ມີຄົນເຄື່ອນໄຫວຊື້-ຂາຍຢາເສບຕິດ (ປະເພດຢາບ້າ) ຈາກນັ້ນ ເຈົ້າໜ້າທີ່ວິຊາສະເພາະຈຶ່ງໄດ້ລົງຕິດຕາມເຫັນວ່າມີມູນຄວາມຈິງແທ້ ເຈົ້າໜ້າທີ່ຈຶ່ງໄດ້ຈັບຕົວ ທ້າວ ກ້າວຊົ່ງ 46 ປີ ອາຊີບ ຊາວນາ, ນາງ ເບົ້າລໍ່ 43 ປີ ອາຊີບ ຊາວນາ (ຜົວເມຍ) ແລະ ນາງ ຊີລໍ່ ຫຼື ຢົວລໍ່ ອາຍຸ 36 ປີ ອາຊີບ ຄ້າຂາຍ ທັງ 3 ແມ່ນຢູ່ ບ້ານນາເລົາ ເມືອງ ໂພນໂຮງ ແຂວງ ວຽງຈັນ ພ້ອມຂອງກາງຢາບ້າ ຈຳນວນ 2.425 ເມັດ ແລະ ໜາກຝ່າ 1 ໜ່ວຍ ມາທຳການສືບສວນ-ສອບສວນ.



ຜ່ານການສືບສວນ-ສອບສວນ ຂອງເຈົ້າໜ້າທີ່ຕຳຫຼວດ ທ້າວ ກ້າວຊົ່ງ ແລະ ນາງ ເບົ້າລໍ່ ໄດ້ຮັບສາລະພາບວ່າ: ຢາບ້າຈຳນວນດັ່ງກ່າວ ແມ່ນເປັນຂອງພວກກ່ຽວແທ້ ເຊິ່ງໄດ້ຊື້ຢາບ້ານຳ ນາງ ຊີລໍ່ ຫຼື ຢົວລໍ່ ຈຳນວນ 5 ຖົງ ເທົ່າກັບ 1000 ເມັດ ໃນລາຄາ 1.500.000 ກີບ  ພາຍຫຼັງໄດ້ຢາບ້າມາແລ້ວ ກໍໄດ້ນຳເອົາຢາບ້າມາແຟັກໃສ່ຖົງຢາງແລ້ວໄປຂາຍໃຫ້ກັບຊາວໜຸ່ມທົ່ວໄປຢູ່ພາຍໃນບ້ານ ແລະ ບ້ານໃກ້ຄຽງ ຂາຍເມັດ 5000 ກີບ. ຕົກມາໃນວັນທີ 25 ສິງຫາ 2020 ພວກກ່ຽວ ຈຶ່ງຖືກເຈົ້າໜ້າທີ່ຈັບຕົວພ້ອມຂອງກາງຢາບ້າ 736 ເມັດ ແລະ ໜາກຝ່າ 1 ໜ່ວຍ ທີ່ຊຸກເຊື້ອງຢູ່ໃນເຮືອນພວກກ່ຽວເອງ



ນາງ ຊີລໍ່ ຫຼື ຢົວລໍ່ ໄດ້ຮັບສາລະພາບວ່າ ຢາບ້າ ຈໍານວນ 1.689 ເມັດ ເປັນຂອງຜູ້ກ່ຽວແທ້ ຜູ້ກ່ຽວໄດ້ໂທລະສັບສັ່ງຊື້ນຳຄົນບໍ່ຊາບຊື່ບໍ່ຮູ້ບ້ານ ຈຳນວນ 8 ຖົງ ເທົ່າກັບ 1.600 ເມັດ ໃນລາຄາ 2.240.000 ກີບ ເຊິ່ງໄດ້ນັດຊື້-ຂາຍ ຢາບ້າ ດັ່ງກ່າວ ຢູ່ທາງຊອຍ ບ້ານນາເລົາ ເມືອງໂພນໂຮງ ເມື່ອໄດ້ຢາມາແລ້ວຜູ້ກ່ຽວກໍ່ໄດ້ເອົາຢາບ້າທີ່ຊື້ມານັ້ນໄປຂາຍໃຫ້ ທ້າວ ກ້າວຊົົ່ງ ແລະ ນາງ ເບົ້າລໍ່(ຜົວເມຍ) ຢູ່ບ້ານ ນາເລົ່າ ຈໍານວນ 5 ຖົງ ເທົ່າກັບ 1000 ເມັດ ໃນລາຄາ 1.500.000 ກີບ ສ່ວນຢາບ້າອີກ 3 ຖົງ ເທົ່າກັບ 600 ເມັດ ຜູ້ກ່ຽວແມ່ນໄດ້ເອົາໄປຂາຍໃຫ້ກັບຊາວໜຸ່ມທົ່ວໄປ ໃນເມັດລະ 5000 ກີບ ຈຸດຂາຍແມ່ນຢູ່ເຮືອນຜູ້ກ່ຽວເອງ ເມື່ອຂາຍຢາບ້າໜົດແລ້ວ ຜູ້ກ່ຽວຈຶ່ງໄດ້ໂທລະສັບສັ່ງຊື້ ຢາບ້າ ຈຳນວນ 7 ຖົງ ເທົ່າກັບ 1.400 ເມັດ ນຳຄົນບໍ່ສາບຊື່ ມາຂາຍໃຫ້ຊາວໜຸ່ມອີກ ແຕ່ຄັ້ງນີ້ແມ່ນໄດ້ຕິດໜີ້ກ່ອນ ເມື່ອໄດ້ຢາບ້າມາແລ້ວ ຜູ້ກ່ຽວກໍ່ໄດ້ກັບມາເຮືອນ ແລະໄດ້ເອົາຢາບ້າມາລວມໃສ່ກັບ ຢາບ້າທີ່ຂາຍບໍ່ທັນໜົດ ແລ້ວໄດ້ເອົາໄປຊຸກເຊື່ອງໄວ້ໃນເຮືອນຂອງຜູ້ກ່ຽວ ຕົກມາໃນວັນທີ 27 ສິງຫາ 2020 ຜູ້ກ່ຽວຈຶ່ງຖືກເຈົ້າໜ້າທີ່ກັກຕົວ ພ້ອມຂອງກາງຢາບ້າ 1.689 ເມັດ ທີ່ຊຸກເຊື່ອງຢູ່ໃນເຮືອນຂອງຜູ້ກ່ຽວ



ປະຈຸບັນເຈົ້າໜ້າທີ່ຕຳຫຼວດກອງບັນຊາການ ປກສ ເມືອງໂພນໂຮງ ໄດ້ສະຫຼຸບສັງລວມຂໍ້ມູນຫຼັກຖານພວກຖືກຫາທັງ 3 ຄົນ ແລະ ຂອງກາງຢາບ້າ ຈຳນວນ 2.425 ເມັດ, ໜາກຝ່າ 1 ໜ່ວຍ ສົ່ງໃຫ້ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ຫ້ອງຕຳຫຼວດ ປກສ ແຂວງ ວຽງຈັນ ເພື່ອສົ່ງໄອຍະການສັ່ງຟ້ອງສານຕັດສິນຕາມຂັ້ນຕອນຂອງກົດໜາຍໃນຂັ້ນຕໍ່ໄປ.

ຂ່າວ ປກສ ແຂວງວຽງຈັນ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments