ຄະນະນຳກະຊວງການຕ່າງປະເທດ ເຂົ້າອວຍພອນທູດຫວຽດນາມ ປະຈຳລາວ



ໃນ​ຕອນ​ເຊົ້າ​ຂອງ​ວັນ​ທີ 1 ກັນຍາ​ນີ້ ທີ່ສະຖານ​ເອກ​ອັກ​ຄະ​ລັດ​ຖະ​ທູດແຫ່ງ ສສ ຫວຽດນາມ ປະ​ຈໍາ ສປປ ລາວ, ສະຫາຍ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດແຫ່ງ ສປປ ລາວ ໄດ້​ນໍາ​ພາຄະ​ນະໄປ​ອວຍພອນສະຫາຍ ຫ​ງວຽນ ບ໋າ ຮຸ່ງ ເອກ​ອັກ​ຄະ​ລັດ​ຖະ​ທູດ ແຫ່ງ  ສສ ຫວຽດນາມ ປະ​ຈໍາ ສປປ ລາວ, ເນື່ອງ​ໃນ​ໂອກາດວັນ​ສະຖາປະນາ ສສ ຫວຽດນາມ ຄົບຮອບ 75 ປີ (2/9/1945-2/9/2020)  ແລະ ວັນ​ການ​ທູດ ສສ ຫວຽດນາມຄົບຮອບ 75 ປີ (28/8/1945-28/8/2020).

Image may contain: 2 people, people standing, suit and indoor

   ໃນ​ໂອກາດ​ດັ່ງກ່າວ, ສະຫາຍ ສະເຫຼີມໄຊ ກົມ​ມະ​ສິດ ໄດ້​ຕາງໜ້າ​ໃຫ້​ຄະນະ​ພັກ, ຄະນະ​ນໍາ ແລະ ພະນັກງານ​ກະຊວງ​ການ​ຕ່າງປະເທດແຫ່ງ ສປປ ລາວ ສະແດງ​ຄວາມ​ຊົມເຊີຍວັນ​ສະຖາປະນາ ສສ ຫວຽດນາມ ແລະ ວັນ​ການ​ທູດ ສສ ຫວຽດນາມ ຄົບຮອບ 75 ປີ ຢ່າງ​ສຸດ​ໃຈ. ພ້ອມ​ນັ້ນ, ສະຫາຍ ສະເຫຼີມ​ໄຊ ກົມ​ມະ​ສິດ ໄດ້​ສະແດງ​ຄວາມ​ຊົມເຊີຍ ຕໍ່​ຜົນ​ສໍາ​ເລັດ​ອັນ​ໃຫຍ່​ຫຼວງ​ໃນ​ຫຼາຍ​ດ້ານ​ຂອງ ສສ ຫວຽດນາມ ທີ່​ສາມາດ​ຍາດ​ມາ​ໄດ້​ໃນ​ຕະຫຼອດ 75 ປີ ຜ່ານ​ມາ ເຊັ່ນ: ເສດຖະກິດ​ຂະຫຍາຍຕົວ​ໄວ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ພັດທະນາ ແລະ ປັບປຸງ​ໃຫ້​ດີ​ຂຶ້ນ​ເປັນ​ກ້າວໆ. ນອກຈາກ​ນັ້ນ, ສະຫາຍ ສະເຫຼີມ​ໄຊ ກົມ​ມະ​ສິດ ຍັງ​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນ​ສໍາ​ເລັດ​ທີ່​ຂະແໜງການ​ຕ່າງປະເທດ​ຍາດ​ມາ​ໄດ້​ໃນ​ຕະຫຼອດ​ໄລຍະ 75 ປີ ຜ່ານ​ມາ ທີ່​ເຮັດ​ໃຫ້​ບົດບາດ, ຊື່​ສຽງ ແລະ ອິດ​ທິ​ພົນ ຂອງ ສສ ຫວຽດນາມ ນັບ​ມື້​ນັບ​ສູງ​ເດັ່ນ​ຂຶ້ນ​ໃນ​ເວທີ​ພາກ​ພື້ນ ແລະ ສາກົນ ຊຶ່ງ​ປະກອບສ່ວນ​ອັນ​ສໍາ​ຄັນ​ໃຫ້​ແກ່​ການ​ພັດທະນາ​ເສດ​ຖະ​ກິດ​-​ສັງຄົມ ຂອງ ສສ ຫວຽດນາມ, ພິເສດ ປີ 2020 ນີ້ ສສ ຫວຽດນາມ ໄດ້​ຮັບ​ກຽດ​ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດ​ອາ​ຊຽນ, ກອງ​ປະຊຸມ​ໄອ​ປາ ຄັ້ງ​ທີ 36, ທັງ​ເປັນ​ສະມາຊິກ​ບໍ່​ຖາວອນ​ຂອງ​ສະພາ​ຄວາມ​ໝັ້ນຄົງ, ສສ ຫວຽດນາມ ສາມາດ​ຈັດ​ບັນດາ​ກອງ​ປະຊຸມ​ດັ່ງກ່າວ ໃນ​ຮູບ​ແບບ​ໃໝ່​ຜ່ານ​ລະບົບ​ອອນ​ລາຍ (Video Conference) ໄດ້​ຢ່າງ​ດີເລີດ ໃນ​ທ່າມກາງ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19. ພິເສດ, ສະຫາຍ ສະເຫຼີມ​ໄຊ ກົມ​ມະ​ສິດ ຍັງ​ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ ຕໍ່​ການ​ຮ່ວມ​ມື​ກັນ​ຢ່າງ​ສະໜິດ​ແໜ້ນ ແລະ ມີ​ປະສິດທິພາບ​ສູງ ລະຫວ່າງ ກະຊວງ​ການ​ຕ່າງປະເທດ​ລາວ ກັບ ສະຖານທູດ​ຫວຽດນາມ ໃນ​ໄລຍະ​ຜ່ານ​ມາ, ເຮັດ​ໃຫ້​ສາມາດ​ຊຸກຍູ້​ການ​ພົວພັນ​ອັນ​ເປັນ​ມູນເຊື້ອ​ທີ່​ດີ ລະຫວ່າງ​ສອງ​ຝ່າຍ ໃຫ້​ຂະຫຍາຍຕົວ ແລະ ມີ​ຜົນ​ສໍາ​ເລັດ​ຫຼາຍ​ດ້ານ. ຊົມເຊີຍ ແລະ ຕີ​ລາຄາ​ສູງ ຕໍ່​ການ​ຊ່ວຍເຫຼືອ​ຢ່າງ​ທັນ​ການ ຂອງ ສສ ຫວຽດນາມ ຕໍ່ ສປປ ລາວ ໃນ​ໄລຍະ​ຜ່ານ​ມາ ໂດຍ​ສະເພາະໃນ​​ໄລຍະ​ການ​ລະບາດ​ຂອງ​ພະຍາດ​ໂຄ​ວິດ-19 ເຖິງ​ວ່າ ຫວຽດນາມ ຈະ​ໄດ້​ຮັບ​ຜົນ​ກະທົບ​ຈາກ​ພະຍາດ​ດັ່ງກ່າວ​ເຊັ່ນ​ກັນ ແຕ່​ກໍ​ຍັງ​ໃຫ້ການ​ຊ່ວຍເຫຼືອ​ແກ່ ສປປ ລາວ ເປັນຕົ້ນ ໄດ້​ສົ່ງ​ຄະນະ​ແພດ​ຊ່ຽວຊານ, ຢາ​ປົວ​ພະຍາດ ພ້ອມ​ທັງ​ອຸປະກອນ​ການ​ແພດ​ມາ​ຊ່ວຍ​ລັດຖະບານ​ລາວ. ພ້ອມ​ ນີ້, ສະຫາຍ ສະເຫຼີມ​ໄຊ ກົມ​ມະ​ສິດ ກໍໄດ້​ສະແດງ​ຄວາມ​ເຫັນໃຈ​ຕໍ່ ສສ ຫວຽດນາມ ທີ່​ຫວ່າງ​ບໍ່​ດົນ​ມາ​ນີ້ ໄດ້​ພົບ​ຜູ້​ຕິດເຊື້ອ​ພະຍາດ​ໂຄ​ວິດ-19 ຮອບ​ໃໝ່ ແລະ ໄດ້​ສະແດງ​ຄວາມ​ເຊື່ອ​ໝັ້ນ​ຢ່າງ​ໜັກ​ແໜ້ນ​ວ່າ ດ້ວຍ​ຄວາມ​ເອົາໃຈໃສ່​ຢ່າງ​ໃກ້ຊິດ ແລະ ການ​ນໍາ​ພາ​ອັນ​ສະຫຼາດ​ສ່ອງ​ໃສ​ຂອງ ການ​ນໍາ​ພັກ​-​ລັດ, ສສ ຫວຽດນາມ ຈະ​ສາມາດ​ຄວບ​ຄຸມພະ​ຍາດ​ດັ່ງກ່າວ​ໄດ້​ຢ່າງ​ສິ້ນ​ເຊີງ ແລະ ຟື້ນ​ຟູ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ກັບ​ຄືນ​ສູ່​ສະພາບ​ປົກ​ກະ​ຕິ.

   ໃນ​ໂອກາດ​ດຽວ​ກັນ​ນີ້, ສະຫາຍ ຫ​ງວຽນ ບ໋າ ຮຸ່ງ ກໍ​ໄດ້​ສະແດງ​ຄວາມ​ຂອບໃຈ​ຢ່າງ​ຍິ່ງຕໍ່​ການ​ມາ​ອວຍພອນ​ຄັ້ງ​ນີ້ ຂອງ ສະຫາຍ  ສະເຫຼີມ​ໄຊ ກົມ​ມະ​ສິດ ແລະ ຄະ​ນະ. ສະແດງ​ຄວາມ​ຂອບໃຈ ແລະ ຊົມເຊີຍ ຕໍ່​ການ​ໃຫ້​ຄວາມ​ສໍາ​ຄັນ​ອັນ​ຈິງ​ໃຈ​ຂອງ ພັກ​-​ລັດຖະບານ ແຫ່ງ ສປປ ລາວ ແລະ ຊົມເຊີຍ​ຕໍ່​ການ​ຈັດ​ພິທີ​ໂຮມ​ຊຸມນຸມ ແລະ ບັນດາ​ກິດ​ຈະ​ກໍາ​ຕ່າງໆ ເພື່ອ​ສະເຫຼີມສະຫຼອງ​ວັນຊາດ ສສ ຫວຽດນາມ ຄົບຮອບ 75 ປີ, ເປັນຕົ້ນ​ແມ່ນ ການວາງສະແດງ​ຮູບ​ພາບ​ການ​ພົວພັນ​ຮ່ວມ​ມື ລາວ​-​ຫວຽດນາມ, ຫວຽດນາມ​-​ລາວ. ພ້ອມ​ທັງ, ຕີ​ລາຄາ​ສູງ​ຕໍ່​ການ​ພົວພັນ​ຮ່ວມ​ມື ລະຫວ່າງ ສອງ​ປະເທດ ຫວຽດນາມ​-​ລາວ ໃນ​ໄລຍະ​ຜ່ານ​ມາ ແລະ ຫວັງ​ຢ່າງ​ຍິ່ງ​ວ່າ ສາຍພົວພັນ​ມິດຕະພາບ​ອັນ​ເປັນ​ມູນເຊື້ອ, ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານລະ ຫວ່າງ ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ຫວຽດນາມ​-​ລາວ ນັບ​ມື້​ຈະ​ໄດ້​ຮັບ​ການ​ຖະໜຸຖະໜອມ​ບໍາ​ລຸງ​ສ້າງ ແລະ ໄດ້​ຮັບ​ການ​ເຊີດ​ຊູ​ຢ່າງ​ບໍ່​ຢຸດ​ຢັ້ງ.  

   ໃນ​ຕອນ​ທ້າຍ, ສະຫາຍ ສະເຫຼີມ​ໄຊ ກົມ​ມະ​ສິດ ກໍໄດ້​ອວຍພອນ​ໃຫ້ ສະຫາຍ ຫ​ງວຽນ ບ໋າຮຸ່ງ ພ້ອມ​ດ້ວຍ​ພະນັກງານ​ສະຖານທູດ​ທຸກ​ສະຫາຍ ແລະ ຜ່ານ​ສະຫາຍ ໄປ​ຍັງ​ການ​ນໍາ​ພັກ​-​ລັດ ຂອງ ຫວຽດນາມ ຈົ່ງ​ມີ​ສຸຂະພາບ​ແຂງແຮງ ແລະ ປະສົບ​ຜົນ​ສໍາ​ເລັດ​ໃໝ່ ໃນ​ໜ້າທີ່​ອັນ​ມີ​ກຽດ​ຂອງ​ຕົນ, ພ້ອມ​ທັງ​ອວຍພອນ​ແດ່​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ, ສອງ​ລັດກໍຄື​ປະຊາຊົນ​ສອງ​ຊາດ ລາວ​-​ຫວຽດນາມ, ຫວຽດນາມ​-​ລາວ ຈົ່ງ​ສືບຕໍ່​ໄດ້​ຮັບ​ຜົນ​ສໍາ​ເລັດ​ໃໝ່ ຍິ່ງ​ໃຫຍ່​ກວ່າ​ເກົ່າ ໃນ​ຊຸມ​ປີ​ຕໍ່ໆ​ໄປ.
(ຂ່າວ: ກະ​ຊວງ​ການ​ຕ່າງ​ປະ​ເທດ)

















------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments