ລັດຖະມົນຕີກະຊວງ ຍທຂ ລົງເຄື່ອນໄຫວຕິດຕາມ ການຈັດຕັ້ງປະຕິບັດໂຄງການກໍ່ສ້າງທາງແຕ່ເຊບັ້ງນວນ-ຕຸ້ມລານ



ມາໃນວັນທີ 25 ສິງຫາ 2020 ນີ້, ທ່ານ ປອ ບຸນຈັນ ສິນທະວົງ ກໍາມະການສູນກາງພັກລັດຖະມົນຕີກະຊວງໂຍ​ທາ​ທິການ ແລະ ຂົນສົ່ງ ໄດ້ລົງຕິດຕາມການຈັດຕັ້ງໂຄງການກໍ່ສ້າງທາງເລກທີ 2,6313 ແຕ່ແຍກທາງ 13 ໃຕ້ບ້ານເຊບັ້ງນວນຫາເມືອງທ່າປາງທອງແຂວງສະຫວັນນະເຂດຫາເມືອງ ຕຸ້ມລານ ແຂວງສາລະວັນ ໂດຍ ການຕ້ອນຮັບຂອງທ່ານ ຄຳປະສົງ ຂົງຄຳ ເລຂາພັກເມືອງເຈົ້າເມືອງທ່າປາງທອງ, ມີບັນດາຄະນະບໍລິຫານງານພັກເມືອງ, ຄະນະກອງບັນຊາການປກຊ-ປກສ, ຫົວໜ້າ, ຮອງຫົວໜ້າຫ້ອງການ ແລະ ຂະແໜງການທີ່ກ່ຽວຂ້ອງໃຫ້ການຕ້ອນຮັບຢ່າງອົບອຸ່ນ. 

Image may contain: 8 people, people standing, cloud, sky and outdoor

ໂຄງການການກໍ່ສ້າງເສັ້ນທາງດັ່ງກ່າວມີລວງຍາວເກືອບ 90 ກິໂລແມັດ, ສາມາດແລ່ນດ້ວຍຄວາມໄວ 80 ກິໂລ ແມັດຕໍ່ຊົ່ວໂມງ, ຮັບນ້ຳໜັກ 9,1 ໂຕນຕໍ່ເພົາ, ໂດຍທົ່ວໄປເປັນທາງ​ປູຢາງມີຄວາມກວ້າງ 7 ແມັດ, ສະເພາະທາງໃນເຂດເທດສະບານເມືອງທ່າປາງທອງ 3 ກິໂລແມັດແມ່ນມີໜ້າທາງປູຢາງກວ້າງ 9 ແມັດ ຊຶ່ງປະກອບດ້ວຍທາງຄົນຍ່າງ ແລະ ໄຟເຍືອງທາງ, ​ຊຶ່ງ​ມີ​ການກໍ່ສ້າງຂົວເບຕົງ 19 ແຫ່ງ, ມີລວງຍາວ 470 ແມັດ, ກໍ່ສ້າງທໍ່ລະບາຍນ້ຳລອດທາງ, ກໍ່ສ້າງພື້ນຖານໂຄງລ່າງເມືອງທ່່າປາງທອງ (ສ້າງສູນຝຶກອົບຮົມເຕັກນິກ ກະສິກຳເຊສາລະລອງ), ລວມມີມູນຄ່າການກໍ່ສ້າງທັງໝົດ 60 ລ້ານໂດລາສະຫະລັດ ທີ່ໄດ້ຮັບການສະໜັບສະໜູນກູ້ຢືມທຶນຈາກບໍລິສັດນໍລິນໂກ ສປ ຈີນ, ເຊິ່ງໄດ້ເຊັນສັນຍາຮັບເໝົາກໍ່ສ້າງກັນໃນວັນທີ 3 ພຶດສະພາ 2017 ແລະໄດ້ເລີ່ມລົງມືການກໍ່ສ້າງຕົວຈິງໃນວັນທີ 1 ຕຸລາ 2017, ຄາດວ່າຈະໃຫ້ສຳເລັດໃນວັນທີ 1 ຕຸລາ 2020. 

ເຊິ່ງມາຮອດປະ ຈຸບັນການຈັດຕັ້ງປະຕິບັດໂຄງການແມ່ນມີຄວາມຄືບໜ້າ ແລ້ວ 95%, ໃນນີ້ບັນດາໜ້າ ວຽກຕ່າງໆກໍ່ໄດ້ສຳເລັດໄປ ແລ້ວເຊັ່ນ: ວຽກກໍ່ສ້າງຊັ້ນທາງ ໃນແຕ່ລະຊັ້ນ, ການກໍ່ສ້າງຂົວ ເບຕົງ 19 ແຫ່ງ, ກໍ່ສ້າງກັນເຈື່ອນ ຫົວຂົວສຳເລັດ 13 ແຫ່ງ, ກໍ່ສ້າງ ແລະຕິດຕັ້ງຫຼັກປ້ອງກັນໄພ 302 ຕົ້ນ, ກໍ່ສ້າງ ແລະ ຕິດຕັ້ງຫຼັກກິໂລແມັດໄດ້ 20 ຕົ້ນ, ຕິດປ້າຍຈະລາຈອນ 128 ຕົ້ນ ແລະ ຕິດຕັ້ງເສົາໄຟເຍືອງທາງໃນເທສະບານເມືອງທ່າປາງທອງສຳເລັດ 100 %.
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments