ຊົມເຊີຍ ປະຖົມສົມບູນ ບ້ານພອນໄຊ ນະຄອນ ຫຼວງພະບາງ ໄດ້ຮັບອາຄານຮຽນຫຼັງໃໝ່



ຫຼວງພະບາງ: ເມື່ອວັນທີ 12 ກັນຍາ 2020 ຜ່ານມາທີ່ໂຮງຮຽນປະຖົມສົມບູນ ບ້ານ ພອນໄຊ ນະຄອນຫຼວງພະບາງໄດ້ຈັດພິທີມອບ-ຮັບອາຄານຮຽນຫຼັງໃໝ່ ໂດຍການໃຫ້ກຽດກ່າວມອບຂອງ ທ່ານ ປ ອ ຄໍາແພງ ໄຊສົມແພງ ກໍາມະການສູນການພັກ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ກ່າວຮັບໂດຍ ທ່ານ ຈັກສຸກ ພັນໂດລັກ ກໍາມະການພັກແຂວງ, ເລຂາພັກນະຄອນ ເຈົ້ານະຄອນ ຫຼວງພະບາງ, ໃຫ້ກຽດເຂົ້າຮ່ວມມີ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ, ປະທານສະພາປະຊາຊົນແຂວງ, ການນໍາຂອງແຂວງ, ນະຄອນ ຫຼວງພະບາງ,ຜູ້ອໍານວນການໂຮງຮຽນ, ອຳນາດການປົກຄອງບ້ານ,ກຸ່ມ,ຄະນະພັດທະນາການສຶກສາ,ສະມາຄົມພໍ່ແມ່ນນັກຮຽນ,ພະນັກງານ,ຄູ-ອາຈານ,ນ້ອງນ້ອຍນັກຮຽນຕະຫຼອດຮອດພໍ່ແມ່ປະຊາຊົນ ແລະ ແຂກຖືກເຊີນເຂົ້າຮ່ວມເປັນສັກຂີພິຍານ.

ໂຮງຮຽນ ປະຖົມສຶກສາ ບ້ານ ພອນໄຊ ເປັນໂຮງຮຽນແຫ່ງໜຶ່ງທີ່ຂຶ້ນ ກັບເຂດ ສຶກສາປາກເຊືອງ ນະຄອນ ຫຼວງພະບາງ ໂຮງຮຽນແຫ່ງນີ້ໄດ້ຮັບການສ້າງຕັ້ງຂຶ້ນໃນປີ 1975, ເຊິ່ງປະກອບມີ ເນື້ອທີ່ທັງໝົດ 2416 ຕາແມັດ, ມີຈໍານວນ 240 ຄອບຄົວ, ມີປະຊາກອນທັັັງໝົດ 1200 ຄົນ, ຍິງ 627 ຄົນ, ໃນນັ້ນມີເດັກເກນອາຍຸເຂົ້າຮຽນ 1 – 10 ປີ ລວມມີ 299 ຄົນ, ຍິງ 152 ຄົນ ມີຄວາມຕ້ອງການຫ້ອງຮຽນ ເພື່ອແກ້ໄຂບັນຫາດັ່ງກ່າວ ທ່ານ ປ ອ ຄໍາແພງ ໄຊສົມແພງ ພ້ອມດ້ວຍຄອບຄົວ ເປັນຜູ້ໃຫ້ທຶນປຸກສ້າງ ເຊິ່ງການກໍ່ສ້າງດັ່ງກ່າວໄດ້ເລີ່ມລົງມືໃນວັນທີ 2 ມິຖຸນາ 2013 ແລະ ສໍາເລັດລົງໃນວັນທີ 25 ກັນຍາ 2013 ໃຊ້ເວລາການກໍ່ສ້າງທັງໝົດ 5 ເດືອນ. ອາຄານຫຼັງນີ້ເປັນອາຄານຖາວອນ, ຄານຄໍດິນ,ພື້ນເບຕົງເສີມເຫຼັກ ແລະ ເພດານແຜ່ນລຽບ,ຫຼັງຄາມຸງດ້ວຍກະເບື້ອງສີແດງ,ຕົວອາຄານປະກອບມີ 2ຫ້ອງ, 1 ຫ້ອງຮຽນ ແລະ 1 ຫ້ອງການ, ຂະໜາດຫ້ອງຮຽນ 7,50 ແມັດ x 12 ແມັດ, ລວມມູນຄ່າການກໍ່ສ້າງທັງໝົດ 243 ລ້ານກ່ວາກີບ.ໃນ ນັ້ນທ່ານຍັງໄດ້ມອບຮັບອຸປະກອນການຮຽນ - ການສອນ ຈໍານວນໜຶ່ງ ລວມມູນຄ່າ 16 ລ້ານກວ່າກີບ.

ໂອກາດດັ່ງກ່າວ, ທ່ານ ຈັນສຸກ ພັນໂດລັກ ໄດ້ກ່າວສະແດງຄວາມຂອບອົກຂອບໃຈ ແລະ ຮູ້ບຸນຄຸນມາຍັງທ່ານ ປ ອ ຄໍາແພງ ໄຊສົມແພງພ້ອມດ້ວຍຄອບຄົວ ຜູ້ໃຫ້ທຶນທີ່ເຫັນໄດ້ຄວາມສຳຄັນຂອງວຽກງານການສຶກສາ ໂດຍສະເພາະ ໂຮງຮຽນ ປະຖົມ ບ້ານ ພອນໄຊ ນະຄອນຫຼວງພະບາງ ແຂວງ ຫຼວງພະບາງ ພ້ອມກັນນັ້ນທ່ານໄດ້ຮຽກຮ້ອງມາຍັງ ຫ້ອງການສຶກສາທິການ ແລະ ກິລາ ນະຄອນ ຫຼວງພະບາງ , ອໍານາດການປົກຄອງບ້ານ, ພະນັກງານຄູ-ຈານ ແລະ ພໍ່ແມ່ປະຊາຊົນບັນດາເຜົ່າ ຈົ່ງໄດ້ພ້ອມກັບປົກປັກຮັກສາອາຄານຮຽນຫຼັງໃໝ່ນີ້ໃຫ້ມີຄວາມສະອາດສວຍງາມ, ສ້າງໃຫ້ເປັນໂຮງຮຽນສີຂຽວ ກາຍເປັນໂຮງຮຽນຕົວແບບ ແລະ ໃຊ້ໄດ້ຍາວນານ, ພ້ອມກັນສົ່ງລູກຫຼານໃຫ້ໄດ້ເຂົ້າຮຽນຕາມເການອາຍຸ, ສ້າງໃຫ້ໄດ້ນັກຮຽນເກັງ, ດີມີຄຸນນະພາບ ເພື່ອເປັນຜູ້ສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນອະນາຄົດ.

ພາບແລະຂ່າວ: ພະແນກສຶກສາທິການ ແລະ ກິລາ ແຂວງຫຼວງພະບາງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com

Post a Comment

0 Comments